GÖTRANE 4
Hni Hna Ahleuhleun—“Nyipi Sië Ni Pi Qa Ngöne La Menung”
“Eje hi laka lolo hë la mele huni enehila, ke hetre huliwange hë ka hnyipixe, ngazo pe, hnene la huliwa cili hna huli ni kowe la itre huliwa ka ngazo. Eni ha hane atrune la itre feete ka tru, me itre feete hna atrune hnene la nöj, nge goi lö fe ni koi uma hmitrötr. Fotre hë lao macatre ne tha sine hmaca kö ni la itre huliwa i Akötresie. Kolo pala hi a tro la itre drai, nge xecie hë koi ni ka hape, thatreine hmaca kö tro Iehova a nue la itre ngazong. Ketre, tha patre kö itre ej ngöne la mekunang. Eje hi laka, eni pë hë la a mel atre laka, eni a huliwa menu.”—Martha.
THA fene ehnefe kö la troa mele fë la hni ka hleuhleu. Öni Davita Joxu: “Ke elë hë hune henge la ite ngazong, nge hacepi hë it’ eje koi ni tune la ehnefe ka hace.” (Salamo 38:4) Atraqatre la hleuhleu thene la itre xa Keresiano, matre ame koi angatr, thatreine kö Iehova troa nue la ngazo i angatr. (2 Korinito 2:7) Hapeu, nyipici kö lai? Nge maine nyipici laka hnei epuni hna kuca la ngazo, ngo hapeu, kolo kö lai a hape, nanyi catre hë epuni qaathei Iehova matre tha ijiji Nyidrëti hë troa senge la itre ngazo i epun?
“Tro Sha Ishehyin”
Tha ka nuetrije kö Iehova la itre atr ka ietrane la itre ngazo i angatr. Nyidrëti a ithanata koi angatr. Ame ngöne la ceitune i Iesu göne la nekön ka mejengön, hnei nyidrëti hna aceitunë Iehova me ketre kem trene ihnim, nge hna trotriji hnei kuku göi troa melëne la mele qene tratraij. Ame hë e thupen, mekune hmaca jë hi nyën troa bëek. “Öhnyi nyënë hë hnei keme i nyën, nge nanyi pete kö, ame hnei [nyidrë] hna utipi nyën, me nyenyap, me kei hune la nyinawa i nyën, me idemi me nyën.” (Luka 15:11-20) Hapeu epun, pi tro hë epuni a easenyi koi Iehova, ngo epuni a ngazo fë laka “nanyi” hë epun qaathei Nyidrë? Tune la keme ngöne la ceitune i Iesu, hetre utipine i Iehova koi epun. Atraqatre la aja i Nyidrë troa kepe epuni hmaca.
Ngo, tune kaa ju hë e mekune ju epun ka hape, tru catre pala ha la itre ngazo i epun, matre thatreine hë Iehova troa nuetrije itre ej? Hanawange la aqane ihë i Iehova ngöne Isaia 1:18: “Öni Iehova, ka hape, Trohemi enehila, tro sha ishenyin ; maine tune la ka palulu la ite ngazo i nyipunie, tro ha wië tune la kiona.” Nyipici, ame la ewekë ka palulu ngöne la iheetre ka wië, pëkö ka atreine troa köletrij. Ngo ame la ngazo, tune ju hë ej la ka palulu, ngo atreine pala hi Iehova awiën.
Tha aja i Iehova kö troa goeë epuni a mele cememine la hni hna akötrën, ene la mekuthetheu hna ahleuhleun. Ngo, hapeu, ijije kö troa axapone la hni epun e nue pi Iehova la ngazo i epun, matre hetrenyi hmaca jë la mekuthetheue ka wië? Tro sa pane ce wange la lue ewekë hna kuca hnei Davita Joxu. Ame la hnapan, öni nyidrë: “Hnenge hna amamane la ngazonge koi [Iehova].” (Salamo 32:5) Pane mekune jë, ase hë Iehova lo hë epuni troa easenyi koi Nyidrë ngöne la thith, me “troa ishenyin” me Nyidrë. Nyipiewekëne ju lai ihë. Qaja amamane jë la itre ngazo i epuni koi Iehova, nge fe jë la hni epuni koi Nyidrë. Thupene la hna melëne la ewekë celë, öni Davita ngöne la thith: “Nyipi sië ni pi qa ngöne la menung . . . tha tro kö cilieti a sixane la hni hna thë fë me hna hutra hnyija.”—Salamo 51:2, 17.
Ame la hnaaluen, hnei Davita hna kapa la ixatua qaathei Nathana perofeta, qene qaja i Akötresie. (2 Samuela 12:13) Iehova a hamëne koi së enehila la itre qatre thup ngöne la ekalesia, itre hna inin me hnëkën göi troa xatuane la itre ka ietra matre troa imelekeu hmaca me Iehova. E tro epuni a thele ixatua thene la itre qatre thup, tro angatre lai a ce xome me epun la itre mekene tus, me thithi sai epun. Tro hë lai a akeukawane la hni epun, me aene trootro la itre mekune i epun ka iathixötrë, nge tro ha lolo hmaca la aqane imelekeu i epuni me Iehova.—Iakobo 5:14-16.
Aja i Iehova fe troa tingetinge la hni epun hnene la hna hetrenyi la mekuthetheu ka wië
“Manathithi La Ate e Hna Apatene La Hna Shashaith”
Nyipici laka, ewekë ka tha hmaloi kö la troa qaja amamane la itre ngazo i epun koi Iehova, me wange la itre qatre thup. Ka jole fe hi ekö lo koi Davita. Hetre hnepe ijine hnei nyidrë hna pane “lapa thaup” fë la itre ngazo i nyidrë. (Salamo 32:3) Ngo, ase jë hi nyidrëti qaja amamane la itre ngazo i nyidrë, me wenë amekötine la jë i nyidrë, ame hnei nyidrëti hna öhnyi thangane ka loi qa ngön.
Ame la ketre manathith ka tru hnei Davita hna kapa, tre ene la troa hetrenyi hmaca la madrin. Öni nyidrë: “Manathithi la ate e hna apatene la hna shashaith, me hna he la ngazo i angeic.” (Salamo 32:1) Öni nyidrëti fe e thith ka hape: “Joxu [Iehova] fe, tro cilieti a fē la ukeineqeng, nge tro la qeng’ a amamane la nyine atrunyi cilie.” (Salamo 51:15) Hnene laka, tingetinge hë la hni Davita qa ngöne la itre mekune ka iathixötrë, nge tru fe la ole i nyidrë kowe la aqane nuetrije Iehova la ngazo i nyidrë, ame hna upi nyidrë troa qeje Iehova kowe la itre atr.
Aja i Iehova fe troa tingetinge la hni epun hnene la hna hetrenyi la mekuthetheu ka wië. Ketre, aja i Nyidrë tro epuni a qeje Nyidrë me itre hnei Nyidrëti hna troa kuca kowe la itre atr, cememine la hni ka nyipici me madrin atraqatr. Ngo tha itre ewekë kö la nyine troa kuca cememine la hni ka hleuhleu. (Salamo 65:1-4) The thëthëhmine kö la ihë i Nyidrë lo kola hape, ‘Ujë jë matre troa köle trije la nöjei ngazo i nyipunie, matre traqa pi la itre ijine akeukawane celë qaathei Iehova.’—Ite Huliwa 3:19.
Celë hi lo ka traqa koi Martha. Öni angeic: “Hnene la neköng trahmanyi hna iupi fë pala hi koi ni la itre Ita Ne Thup me Réveillez-vous ! Tro ju pë hë la itre drai, nge ketre kolo fe a loi trootro la aqane imelekeunge me Iehova. Ame lo ka ajolë ni catre troa bëek, tre ene la troa qaja amamane la nöjei ngazo hnenge hna kuca. Haawe, eni pë hë a thithi fë jë koi Iehova, matre sipo Nyidrëti troa sengetrije la itre ngazong. Thatreine kö ni mekune ka hape, fotre lao macatre ne lapa ananyi Iehova ni. Kola amamane hnene la hnenge hna melën ka hape, ngacama nyimu macatre ne lapa ananyi Iehova hnene la ketre atr, ngo ijije pala hi tro angeic a bëeke hmaca koi Akötresie, nge troa xöle kapa angeic hnei Nyidrë.”
