1, 2. Nemene la ewekë hna saze ngöne la Ita Ne Thup ne Januare 1895, nge hna kapa tune kaa hnene la itre trejin?

 KOLA goe catr hnei John Bohnet, ketre atre ini Tusi Hmitrötr, la nyidrëti a kapa lo Ita Ne Thup ne Januare 1895. Ame ngöne la icetrön, tre, ketre pengöne kö la aqane amamane la ketre phare ka hudrume me thinane la hnagejë e hnenyipajidr ngöne ketre ijine ngazo drai. Nge e hnine la zonal cili hna cinyihane fe la taane ka tru hna hape, “Aqane Kuca Ka Hnyipixe.”

² Madrine catre John Bohnet, ene pe nyidrëti a cinyanyi ju koi Russell ka hape: “Mingöminge me lolo la aqane mama la Phare!” John Brown la ketre atr inine la Tusi Hmitrötr, hnei nyidrëti hna qaja la icetrön ne la zonal, öni nyidrë: “Canga huli së hi. Kola kaca tran lai Phare hnene la itre hoke ne gejë ngöne la ijine wene, ngo tha enienije pi kö, pine laka, catrecatr la hna nyitrepen.” Ame kowe la itre trejin ewekë lai ka saze ngöne lai macatre, ngo tha hna hmaca kö e cili. Ame lo Nofeba, hetrenyi la ketre ewekë ka tru hna saze. Ngo kolo mina fe a qeje hnagejë ka holehol.

3, 4. Nemene la jol hna amexeje hnine lo Ita Ne Thup ne 15 Nofeba 1895, nge nemene la hna saze e thupen?

³ Qea la hna pane qaja hnene la ketre tane mekun ne la Ita Ne Thup ne 15 Nofeba 1895, la ketre jole ka tru. Kola pane enienijëne la organizasio matre kolo ha troa thë la casi ne la Itretre Ini Tusi Hmitrötr. Itre trejin a isipi hnëqa me thele troa elemekene la ekalesia. Hna xatua angatre troa trotrohnine la aqane troa cile kowe la jole cili, ketre jole ka aciane la gomegom e hnine la ekalesia. Kola aceitunëne hnene lo lai zonal la organizasio memine la ketre he. Ej a amamane hnyawa laka, tha hna hnëkëne kö hnene la itre trejine ka elemekene la he troa qëmeke kowe la itre ijine ngazo drai. Nemene hë la nyine tro angatr a kuca?

⁴ Kola qaja hnene la tane mekune ka hape, ame la hna pane kuca hnene la kapen ka maca, tre, ene la troa pane goeëne la itre ewekë nyine troa xom e traqa ju lö la he, nge troa wange la itre nyine kuca matre troa hnëkë e traqa jë catrehnine la eny. Ceitune hi lai memine la itre ka elemekene la organizasio, laka, tro angatr a hnëkëne hnyawa la itre ekalesia matre troa atreine cile kowe la itre ijine jol. Celë hi kepine matre ithuemacanyi jë hi hnene la tane mekun, laka, hetre nyine troa canga saze. Kola amekötine ka hape,  “ame ngöne la nöjei gurup, troa iëne la itre qatre thup ka troa thupëne la hna axö mamoe.”—Ite hu. 20:28.

5. (a) Pine nemene matre ka lolo catre la pane hna amekötine thatraqane la itre qatre thup? (b) Nemene la itre hnying nyine tro sa ce wang?

⁵ Lolo catre la pane hna amekötine cili thatraqane la itre qatre thup, ke, kola troa acatrene hnyawa la itre ekalesia. Ej a xatuane la itre trejine trahmanyi troa xomiujine hnyawa la itre ekalesia ngöne la ijine kola kaca trane itre ej hnene la Pane Isi Ka Tru. Ame pë hë ngöne la itre macatre ka nyimutre, hetrenyi la itre xa ewekë ka lolo hna kuca matre troa eköthe hnyawa me tro loi la huliwa. Celë hi itre ewekë lai ka xatua së matre tro pala hi sa nyihlue i Iehova hnyawa. Nemene la hna perofetane hnei Tusi Hmitrötr göne la itre ewekë cili? Nemene la itre ewekë ka saze hne së hna hane melën? Nge nemene la thangane lai koi së?

6, 7. (a) Nemene la aliene Isaia 60:17? (b) Nemene la hna amamane hnene la lue hnëewekë, “itete thup” me “itete musi”?

⁶ Tune lo hne së hna ce wange hë ngöne la mekene 9, hnei Isaia hna ahnithe ka hape, tro Iehova a akökötrene la nöje i Nyidrë. (Is. 60:22) Ngo hetre hnei Iehova pala kö hna troa kuca. Ame ngöne la hna perofetane cili, Öni Iehova: “Tro ni a hamë gole hnane la kopa, nge tro ni a hamë sileva hnane la fao, nge kopa hnane la sinö, nge fao hnane la etë ; nge tro ni a celohmëne la itete thupe i ’ö mate tingeting, memine la itete musi thei ’ö mate meköt.” (Is. 60:17) Nemene la aliene la hna perofetane celë? Hna eatre tune kaa koi së enehila?

⁷ Ame ngöne lo hna perofetane hnei Isaia, tre, hna isa nyihnane la itre ewekë hnene la ketre. Tha kolo kö a nyihnane la ewekë ka ngazo hnene la ewekë ka lolo, ngo kolo pe a nyihnane la ka lolo hnene la ka sisitria. Ame la kola nyihnane la kopa hnene la gool, tre, kolo lai a asisitrian ej, nge hna kuca ceitune hi lai memine la itre xan. Jëne la ceitune celë, Iehova hi lai a ahnithe ka hape, troa tro loi trootro la aqane trongene la nöje i Nyidrë. Ngöne nemene götran? Ame la kola qaja la “Itete thup” memine la “itete musi,” Iehova hi lai a amamane ka hape, ame la itre hna troa kuca aloin, tre, kola qaja la aqane thupën la nöje i Nyidrë memine la aqane troa eköth.

8. (a) Drei la hna qaja hnei Isaia perofeta? (b) Tro sa kepe thangan tune kaa la itre hna saze? (Wange ju fe la itre mekune hna eköhagen, “ Hnei Angeice Hna Kapa La Ihaji.”)

⁸ Drei la atrekë mekunane la troa saze la itre ewekë e hnine la organizasio? Iehova a qaja ka hape: “Tro ni a hamë gole, . . . nge tro ni a hamë sileva, . . . nge tro ni a celohmëne . . . mate tingeting.” Ame la itre ewekë ka lolo hna eköthe trongën e hnine la itre ekalesia, tre, tha ka xulu kö qaathei atr, ngo Iehova kö la qaane la itre huliwa cili. Nge Nyidrëti a eköthe la itre ewekë cili qaane lo Nyidrëti a acili Joxu Iesu, Hupuna i Nyidrë. Nemene la itre thangane ka loi hne së hna kapa qa ngöne la itre hna kuca hnei Iehova? Kola qaja hnene lai xötre ka hape, ame la itre ewekë cili, tre, itre ej a hamëne la “tingeting” memine la “meköt.” Pine laka easa trongëne la itre hna amekötine hnei Iehova memine la itre ewekë hna saze e hnine la ekalesia, haawe, tingetinge hë la mele së e hnin.  Nge pine laka easa ajane la meköt, ene pe upi së jë fe hi troa hane nyihlue Iehova lo Akötresie hna hëne hnei Paulo ka hape, “Akötesieti ine la tingeting.”—Fil. 4:9.

9. Nemene la nyipi trepene la aqane cas me aqane eköthe hnyawa la itre ekalesia, nge pine nemen?

⁹ Paulo a qeje Iehova ngöne la angeic a cinyihane ka hape: “Tha qa thei Akötesieti kö la menumenu, ngo loi la tingeting.” (1 Kor. 14:33) Tha Paulo kö a qaja la eisapengönene la imenumenu memine la ewekë hna eköthe hnyawa, ngo ene pe la imenumenu memine la tingeting. Pine nemen? Pine laka, tha hnene kö laka, hna eköthe hnyawa la ketre ewekë, ke, tro ha hetrenyi la tingeting. Drei la ketre ceitun, tro wengë hnyawa ju hë la itre soc kowe la hna isi, ngo atre hi së laka, isi la pun ngo tha tingetinge kö. Celë hi matre, tha tro pi kö la itre Keresiano a thëthëhmine ka hape, maine hna eköthe hnyawa la ketre ewekë, ngo e patre kö la tingeting, canga tro hi a ethitr me patr la ewekë cili. Ngo ame kö la tingetinge i Akötresie, tre, ka acile hutine la ewekë hna eköthe hnyawa. Haawe, easa madrine atraqatr laka, hna eatrongëne la organizasio nge hna nyidrawane ej hnene la “Akötesieti tene tingeting”! (Rom. 15:33) Ame la tingetinge hna hamëne hnei Akötresie, ke, celë hi trepene la ewekë hna eköthe hnyawa memine la caas hne së hna hniine catrën e hnine la itre ekalesia e cailo fen.—Sal. 29:11.

10. (a) Nemene la itre ewekë hna saze ekö hnine la organizasio? (Wange ju la itre mekune hna eköhagen, “ Aqane Iëne Ekö La Itre Qatre Thup.”) (b) Nemene la itre hnying hne së hna troa ce wang enehila?

¹⁰ Ame la itre mekune hna eköhagen ngöne la hna hape, “ Aqane Iëne Ekö La Itre Qatre Thup” tre, kola mama la itre hna eköthe aloine hnene la organizasio së ekö ngöne la qaan. Ngo nemene la aqane kuca Iehova jëne Iesu Joxu, matre tro pena ha ‘nyihnane hnei gole la kopa’? Hna acatrene tune kaa la tingeting me caas e hnine la itre ekalesia, hnene la itre hna saze cili? Nemene la aqane isa xatua epuni hnene itre ej troa nyihluene la “Akötesieti tene tingeting”?

11. (a) Nemene la hna saze thupene la hna pane inine la Tusi Hmitrötr? (b) Nemene la hna catre ajane troa kuca hnene la itre trejine ekö ka elemekene la organizasio?

¹¹ Qaane lo 1964 uti hë 1971, hnene la itre trejin ka elemekene la huliwa hna pane cilëne la ketre hnëqa ka tru, ene la troa pane inine la Tusi Hmitrötr. Ame la ketre hna troa atrepengöne hnyawa, tre, ene la aqane eköthe la pane ekalesia ngöne lo hneijine i Iesu. a Kola trotrohnine jëne la itre ini laka, hna thupëne la ekalesia hnene la ketre gurup maine lapa ne la itre qatre thup, ngo tha hnene kö la ala cas. (E jë la Filipi 1:1; 1 Timoteo 4:14.) Kolo ha trotrohnine hnyawa hnene la itre trejine ka elemekene la organizasio, ka hape, Iesu Joxu a amamai angatre la aqane troa eköthe aloine la nöje i Akötresie. Catre la aja ne la itre trejine cili troa xötrethenge la hna amekötin. Celë hi matre angatr a canga saze pi la itre ewekë matre troa eköthe la organizasio thenge la tulu hna hamëne hnene la Tusi Hmitrötr. Tro sa pane ce wange la itre ewekë hna saze ngöne lo itre macatre 1970.

12. (a) Nemene la hna saze thatraqane la itre trejine ka elemekene la huliwa? (b) Qaja jë la aqane eköthe enehila la Lapa Ne Xomi Meköt. (Wange ju la itre mekune hna eköhagen, “ Aqane Thupën La Itre Aja Ne La Baselaia Hnene La Lapa Ne Xomi Meköt.”)

¹² Ame la pane ewekë hna saze ekö, tre, thatraqane la itre trejine ka elemekene la huliwa. Ala sevene pala hi angatr, itre ka  cilëne la biero hna hape conseil d’administration ne la Watch Tower Bible and Tract Society of Pennsylvania. Ngo ame hë lo 1971, hna nyixane la itre atrene lo lai conseil, matre kola elë qa ngöne 7 koi 11, nge tha kolo hmaca kö a hëne la biero cili ka hape conseil d’administration. Pëkö ala casi e angatre ka troa draië pe kö hune la ketre, nge qane ju hi lai, kola saze perezida e nöjei macatre, thenge la aqane amë xötrëne la matai itus ne la itre ëje.

13. (a) Nemene la hna eköth amë qaane lo 1932 koi 1972? (b) Nemene la hna kuca hnene la Lapa Ne Xomi Meköt ngöne la macatre 1972?

¹³ Hetrenyi fe la ketre ewekë hna saze thatraqane la itre ekalesia asë. Qaane lo 1932 koi 1972, ame ngöne la nöjei ekalesia, tre, isa casi hi la itre trejine ka thupëne la ekalesia. Qëmekene lo 1936, hna hëne pala hi la trejine cili, ka hape atre ameköti huliwa. Thupene lai, hna saze trootro la ëje cili, koi atre nyihluene la gurup, atre nyihluene la ekalesia, ame hë la pun, tre, atre thupëne la ekalesia. Hnene la itre trejine cili ngöne la isa ekalesia i angatre hna nue asë la trengecatre i angatre matre troa thupëne la hna axö mamoe. Ame la angatr a axecië mekun thatraqane la ekalesia, tre, tha hane kö angatre ce ithanatane la itre mekun memine la itre xa trejin ne la ekalesia i angatr. Ngo ame hë lo 1972, kola saze la itre ewekë hnene la Lapa Ne Xomi Meköt. Nemene la hna saze?

14. (a) Nemene la hna saze lo 1 Okotropa 1972? (b) Nemene la aqane tro la kordinatör ne la lapa ne la itre qatre thup a trongëne la eamo ngöne la Filipi 2:3?

¹⁴ Hetre hna saze e hnine la ekalesia. Tha ala casi hmaca kö la ka troa thupëne ej, ngo kolo ha acile la itre trejine ka nyimutre.  Angatre la itre ka trongëne la itre hna amekötine hnei Akötresie matre troa itre qatre thup e hnine la ekalesia. Angatre hi lai lapa ne la itre qatre thup ka troa thupëne la ekalesia. Celë hi hna amekötine lai hna nyiqaane trongëne lo 1 Okotropa 1972. Ame enehila, tha tro kö la kordinatör ne la lapa ne la itre qatre thup a mekune ka hape, draië kö angeic hune la itre xa qatre thup, ngo tro pe angeic a ujë tune la “ka co.” (Luka 9:48) Ketre manathithi ka tru kowe la itre trejine asë e cailo fen, la itre trejine cili ka hni ka ipië!—Fil. 2:3.

15. (a) Nemene la itre manathith hna kapa hnene la itre ekalesia qa ngöne la hna eköthe la lapa ne la itre qatre thup? (b) Nemene la ka amamane ka hape ka maca mek la Joxu së?

¹⁵ Ame la kola saze matre troa eköthe la lapa ne la itre qatre thup, tre, celë hi ketre ewekë ka lolo catr. Tro sa ce wange la köni thangan: Ame la hnapan, ej a xatuane la itre qatre thup asë troa atrehmekune laka, maine angatr a xome la itre hnëqa, ngo ame kö la Taan la ekalesia, ke Iesu. (Efe. 5:23) Ame la hnaaluen, tune la hna qaja ngöne Ite Edomë 15:22, kola hape: “Kola acaten’ it’ eje [la itre mekun] hnene la itete ithanata ka ala nyimu.” Ame ngöne la kola ce ithanatane hnene la itre qatre thup la itre mekune göi mele ne la ekalesia ngöne la götrane u, nge angatr a wangatrune la itre mekune ne la itre xan, canga tro hi angatr a axeciëne la itre mekune thenge la itre trepene meköti ne la Tusi Hmitrötr. (Ite edomë 27:17) Iehova a amanathithine la itre mekune hna axeciën, nge hetre eloine itre ej. Ame la hnaakönin, pine laka, tru catre  trootro hë hnei trejine ka xome la hnëqa ne qatre thup, haawe, ijije hë kowe la organizasio troa xatuane la itre ekalesia ka aja qatre thup. (Is. 60:3-5) Pane mekune jë së laka, qaane lo 1971 uti hë 2013, kola elë la etrune la itre ekalesia, qa ngöne 27 000 koi 113 000! Ka maca mek la Joxu së, ke, nyidrëti a aijijëne troa hetrenyi la itretre thup, itre ixatua ngöne la ijine ka ijij.—Mika. 5:5.

16. (a) Nemene la hnëqa ne la itre qatre thup? (b) Nemene la aqane goeëne la Itretre Ini Tusi Hmitrötr la eamo hna hamëne hnei Iesu göi troa ‘ithuane la itre mamoe’?

¹⁶ Ame ngöne lo hneijine la itretre Ini Tusi Hmitrötr, hnene la itre qatre thup hna trotrohnine hnyawa laka, hnëqa i angatre troa xatuane la itre trejin troa mele nyipici koi Akötresie. (E jë la Galatia 6:10.) Ame lo 1908 hnene la ketre Ita Ne Thup hna qeje pengöne lo hnei Iesu hna ahnithe ka hape: “Thupëneju pë hë la ite mamoeng.” (Ioane 21:15-17) Kola qaja kowe la itre qatre thup ka hape: “Loi e tro pala hi a tru koi së lo hna ahnithe hnene la Joxu së. Nge loi e tro fe sa wangatrune la hnëqa së troa ithuane me thupëne la itretre drei nyidrë.” Ame fe lo 1925 hnene la ketre Ita Ne Thup hna amexeje kowe la itre qatre thup la hnëqa i angatr, ene la troa ketre atre thupë mamoe me hape: “Akötresie la atrekë ewekëne la ekalesia, . . .  nge tro asë hi la itre qatre thup a isa qeje thinane koi Nyidrë qa ngöne la hnëqa i angatr, la troa xatuane la itre trejin.”

17. Nemene la aqane xatuane la itre qatre thup matre tro angatr a atreine xome la hnëqa i angatr?

¹⁷ Ame ngöne la kola iwai trootro hnene la itre qatre thup, nemene la aqane xatua angatre hnene la organizasio troa xome la ‘sileva matre nyihnane la fao’? Hnene hi la hna ini angatr. Qaane lo 1959, hna nyiqaane la Ini Ne Cainöjëne La Baselaia thatraqane la itre qatre thup. Ame la taan la ketre ini, tre, “Loi e wangatrunyi angatr isa ala cas.” Kola ithuecatre kowe la itre qatre thup troa eköthe la ketre porogaram matre troa wange la itre trejin ngöne la itre hnalapa i angatr. Nge kolo fe a amamane hnyawa la itre aqane  troa kuca matre troa ithuecatr ngöne la ijine iwai. Ame hë lo 1966, hna ahnyipixene la Ini Ne Cainöjëne La Baselaia. Ame la ketre ini, tre, ene la troa nyipiewekëne la troa iwai hnene la itre qatre thup. Ame la hna qaja atrun, tre, tro la itre qatre thup a “thupëne hnyawa la hna axö mamoe i Akötresie cememine la ihnim, nge tha tro pi kö a wangacone la itre hnepe lapa i angatre memine fe la huliwa ne cainöj.” Qaane ju hi lai, kolo ha eköthe la itre xa ini thatraqane la itre qatre thup. Nemene hë la thangane la itre ini cili hna eköth hnene la organizasio i Iehova? Nyimutre catre hë la itre trejine ka cilëne la itre hnëqa ne qatre thup e hnine la ekalesia.

18. (a) Nemene la hnëqa ka tru hna athipe hnei Iehova kowe la itre qatre thup? (b) Pine nemene matre Iehova me Iesu a nyipine me hnime la itre qatre thup ka catre huliwa?

¹⁸ Hna acile la itre qatre thup hnei Iehova jëne Iesu, matre troa xome hnyawa la hnëqa ka tru, ene la troa eatrongëne la itre mamoe ngöne la hneijine së enehila, ketre hneijine ka jole catr. (Efe. 4:11, 12; 2 Tim. 3:1) Iehova me Iesu a nyipine me hnime la itre qatre thup ka catr me ka drengethenge la hna amekötine celë, hna hape: “Ithu ane jë la hnënge mamoe i Akötesie thei nyipunie . . . loi e göi aja kö . . . , nyine tulu ne la hnënge mamoe.” (1 Pet. 5:2, 3) Tro sa pane wange la lue xa götrane nyine troa mekune hnyawa hnene la itre qatre thup, ke, angatr a troa amamai tulu kowe la hnënge mamoe, me akökötrene la tingeting memine la madrin e hnine ekalesia.

19. Nemene la aqane goeëne së la itre qatre thup la angatr a ce cainöje me easë?

¹⁹ Ame la hnapan, itre qatre thup a cainöj memine la nöjei atrene la ekalesia. Hnei Luka hna cinyihane göi Iesu ka hape: “Nyidëti a trongëne la nöjei lapa, me nöjei hnalapa, kola cainöjën, me amamane la maca ka loi ne la baselaia i Akötesie, nge ce me nyidëti la ala luako.” (Luka 8:1) Itre qatre thup a tui Iesu memine la itre aposetolo, laka, angatr a ce cainöj  memine la itre trejin trahmanyi me föe. Atre hi angatre laka, aqane tro hi lai a sajuëne la aqane ujë ka lolo e hnine la ekalesia. Nemene la aqane goeë angatre hnene la itre atrene la ekalesia? Jeanine qatr la ketre trejine ka easenyi koi 90 lao macatre, öni eahlo: “Madrine catre ni la eni a ce cainöj memine la ketre qatre thup, ke, eni a pane hane porotrik me nyidrë me thele troa atre nyidrëti hnyawa.” Steven ketre trejine ka 30 lao macatre, a qaja ka hape: “Ame la eni a ce cainöj memine la ketre qatre thup ngöne la itre hnalapa trootro, drenge hi ni laka, hetre aja i nyidrë troa xatua ni. Nge celë hi ka amadrinë ni.”

20, 21. Nemene la aqane nyitipune lo atre thupë mamoe ngöne lo ceitune i Iesu hnene la itre qatre thup? Hamëne jë la ketre ceitun. (Wange ju la itre mekune hna eköhagen, “ Itre Wiike Ne Iwai Ka Lolo.”)

²⁰ Ame la hnaaluen, kola inine la itre qatre thup hnene la organizasio i Iehova troa hnehengazone la itre trejine ka nanyi hë qa ngöne la ekalesia. (Heb. 12:12) Pine nemene matre nyipi ewekë tro la itre qatre thup a xatuane la itre trejine cili ka kucakuca ngöne la götrane u, nge nemene la aqane tro angatr a ixatua? Hnei Iesu hna qeje pengöne lai ngöne lo ceitun ne la mamoe ka patr. (E jë la Luka 15:4-7.) Ame la kola mama kowe la atre thupë mamoe ka hape patre hë la ketre mamoe i angeic, angeic a tro nyimenyime jë troa ithel, kösë pëkö xa mamoe i angeic, nyëne hi. Nemene la aqane tro la itre qatre thup a nyitipune la atre thupë mamoe cili? Ka tru pala hi kowe la atre thupë mamoe la mamoe ka patr. Ceitune hi lai memine la trejine ka nanyi hë qa thene la nöje i Akötresie, laka, ka tru pala hi angeic kowe la itre qatre thup. Ame koi angatr, ceitui nyudreni me mamoe ka patr, ngo tha ka luzi kö. Ketre, tune la atre thupë mamoe ka mekune troa “thele la ka pat, uti hë e öhnë hë ej,” ame mina fe la itre qatre thup, ke, tha cile kö angatre troa canga xatuane la itre ka kucakuca me hamëne la ixatua koi nyudren.

²¹ Nemene la hna kuca hnene la atre thupë mamoe ngöne la angeic a öhne la mamoe ka patr? Angeic a nango xomi nyën me “atë hune la hnaiape i angeic,” me hane ami nyëne hmaca hnine la hna axö mamoe. Ketre tune mina fe la qatre thup, laka, jëne la itre trenge ithanata ka menyik, angeic a nango amejëne la ka kucakuca me ixatua matre troa bëeke hmaca kowe la ekalesia. Celë hi ewekë lai ka traqa koi Victor, ketre trejin qa Afrique ka nanyi hë qa ngöne la ekalesia. Öni angeic: “Ame ngöne la eitr lao macatre ne eni a nanazij, tre, tha mano kö la itre qatre thup xatua ni.” Nemene la ka ketr la hni angeic? Hnei angeic hna qaja ka hape: “John la ketre qatre thup ka ce sin me eni la Ini Koi Itre Pionie. Hnei angeic hna traqa matre tro nyiho a ce goeëne hmaca lo itre foto hna xom ngöne la ijine ini. Kola amekunë ni hmaca lo itre ewekë ka lolo hnenge hna kapa ekö, ene pe, eni a mekune hmaca lo madrinenge ekö, ngöne lo eni a nyihlue i Iehova.” Thupene ju fe kö lai hna wai angeic hnene la sine i angeic, hna bëeke hmaca hnei Victor kowe la ekalesia. Ame hë enehila, angeice hmaca ha a hane pionie. Drei la ketre tulu ka lolo ka amamane ka hape, ka  tru la itre qatre thup koi së, ke angatr a xatuane la madrine së.—2 Kor. 1:24. b

22. Tune kaa la aqane acatrene la cas e hnine la ekalesia hnene la meköt me tingeting? (Wange ju la itre mekune hna eköhagen, “ Nyiho a Hai.”)

²² Tune lo hne së hna ce wange hë ngöne la mekene celë, hnei Iehova hna ahnithe ka hape, tro pala hi a kökötre me mama hnyawa la meköt memine la tingeting thene la nöje i Nyidrë. (Is. 60:17) Lue thiina lai ka acatrene la caas e hnine la itre ekalesia. Hna tune kaa? Ame koi meköt, tre, atre hi së laka, ame la “Akötesi shë, te, Iehova ka cas.” (Deu. 6:4) Isa nöje së ju hë, ngo tha ka saze mekune kö Iehova göi meköt. Casi hi la hna amekötine hnei Nyidrë göi loi me ngazo, “ngöne la nöjei ekalesia asë i ange ka hmitöt.” (1 Kor. 14:33) Maine troa trongëne hnyawa la itre hna amekötine hnei Akötresie, tro ha kökötre la ekalesia. Ame koi tingeting, tre, tha aja i Joxu hmekuje kö tro sa madrine troa melëne la tingeting e hnine la ekalesia, ngo tro fe sa a hane “angete ailoin.” (Mat. 5:9) Celë hi kepine matre loi e “tro sha xöte thenge la ite ewekë ne tingeting.” Aqane tro hi së lai a iloi ngöne la kola isazikeu la itre mekuna së. (Rom. 14:19) Ketre, easë fe hi lai a hane sajuëne la tingeting memine la cas e hnine la ekalesia.—Is. 60:18.

23. Nemene la hna madrine kow hnene la itre hlue i Iehova enehila?

²³ Ame la kola amexeje hmaca ngöne lo Ita Ne Thup ne Nofeba 1895, la hna eköthe thatraqane la itre qatre thup, hnene la itre trejine ka elemekene la huliwa hna qaja la aja ka ej ekuhu itre hni angatr. Nemene la aja cili? Angatr a ajane me thithi matre tro lai aqane eköthe cili a xatuane la nöje i Akötresie troa “canga traqa kowe la cas ngöne la lapaun.” Ame la easa goeëne enehila la itre hna kuca ekö, easa madrine me olene atraqatr la aqane eköthe trootro la organizasio hnei Iehova jëne la Joxu së. Celë hi ka acatrene la casi së ngöne la easa hmi koi Nyidrë. (Sal. 99:4) Haawe, kola madrin enehila la itre hlue Iehova e cailo fen, troa tro ngöne la “ua ka cas,” me xötrethenge la “thupaca ka cas,” me nyihluene la “Akötesieti ine la tingeting” cememine la “hni ka cas.”—2 Kor. 12:18; e jë la Zefania 3:9.