AME ngöne la ketre hmakanyi ne drai ne mano, hlë jë hi epuni a mekune troa cainöj. Ngo epuni a luelue hnei kucakuca, nge kola ajane troa mano la hmakanyi cili! Epuni hi lai a thithi ju, me tro. Matre hnei epuni hë hna ce cainöje memine la ketre trejine ka qatre föe hë, nge ka mele nyipici. Ketri epuni ju hi hnene la lapaune i eahlo. Ame hë la epuni a cainöj ngöne la itre hnalapa trootro, mekune jë hi epuni ka hape, casi hi la pengöne maca hnene la itre trejine trahmanyi me föe hna tro fë e cailo fen, nge ceitune hi la itre itus hna tro fë, casi hi la pengöne ini hna kapa. Ame hmaca ha la kola bëeke kowe la hnalapa, egöcatre hë epun nge madrine hë epun pine laka tha hnei epuni kö hna lapa hnalapa!

Ame enehila, huliwa ka sisitria catre ne la Baselaia i Akötresie la huliwa ne cainöj. Hnei Iesu lo hna qaja amë ka hape, troa haöthe la fene hnene la huliwa ne cainöj ngöne la itre drai ne la pun. (Mat. 24:14) Nemene la aqane eatre la hna perofetane hnei nyidrë? Ame ngöne la xötre mekene celë, tro sa ce wange la itre atr, me itre aqane cainöj, me itre jia ne huliwa ka nyipi ewekë catre kowe la huliwa ne cainöj, itre ka xatuane la itre milio lao atr ngöne la fen troa atrehmekune ka hape, cile hë la Baselaia.