1, 2. Nemene la huliwa ka tru hnei Iesu hna qaja amë hë, nge nemene la hnyinge ka nyipi ewekë hna amejën?

 HNA majemine hnene la itre hene ne politik troa thingehnaeane la itre ewekë, ngo tha eatrëne pe. Itre xane a ajane troa eatrën, ngo thatreine pe. Tha ceitu kö me Iesu Keriso Joxu, ka eatrëne pala hi la itre ithanata i nyidrë.

² Ame hë la kola acili Joxu Iesu lo 1914, Iesu hi lai a eatrëne la ketre hnei nyidrëti hna perofetan, 1 900 hë lao macatre enehila. Qëmekene tro Iesu a mec, hnei nyidrëti hna qaja amë hë ka hape: “Tro ha cainöjëne la maca ka loi celë ne la [B]aselaia e cailo fene nyine anyipicine kowe la nöjei nöj.” (Mat. 24:14) Ame hë la kola eatre la itre ithanata cili, tre, hatrene hi lai ka hape, musi hë Iesu ngöne la Baselaia. Ngo, pine laka, ame ngöne la itre drai ne la pun, ijine kola jilapane la fene hnene la thiina ne ka tha imeku, me pë ihnim, me tha nyipi ewekë Akötresie, tre, hetre ketre hnyinge ka tru hna amejën: Nemene la aqane tro la Joxu a hnëkëne la itretre cainöje ka hetre hni ne ajan? (Mat. 24:12; 2 Tim. 3:1-5) Ka nyipi ewekë la troa atre la aqane sa la hnyinge celë, ke, eje a ketr hnyawa la mele ne la nöjei nyipi Keresiano.

3. Nemene la mejiune ka eje thei Iesu ka mama ngöne la itre ithanata i nyidrë, nge qaa ka la mejiune i nyidrë?

³ Pane wange hmaca jë la itre hna qaja hnei Iesu. Mama kö ngöne la hnaewekë hna hape, “tro ha cainöjëne” la mejiune ka eje thei nyidrë? Tha luelue kö Iesu laka, troa tru hnei ka troa ce huliwa me nyidrë ngöne la itre drai ne la pun. Qaa kaa la mejiune i nyidrë? Ka xulu qa ngöne la hnei nyidrëti hna ce mele me Tretretro i nyidrë. (Ioane 12:45; 14:9) Qëmekene tro nyidrëti ekö a uti kowe la fen, hnei nyidrëti hna sipu öhne laka hetre mejiune i Iehova kowe la itre hlue i Nyidrë ka huujëne la mele i angatre troa kuca la aja i Nyidrë. Tro sa ce wange la aqane amamane Iehova la mejiune cili.

4. Nemene la huliwa hnei Iehova hna upe la angetre Isaraela troa hane sajuën, nge nemene la aqane ujë i angatr?

⁴ Pane mekune hmaca jë lo Iehova a xatua Mose troa cane la uma ne heta, lo hnë traqa itronyi ne hmi koi Iehova hnene la nöje Isaraela. Jëne Mose, hnei Iehova hna könëne la nöjei atr troa sajuëne la huliwa. Öni Mose koi angatr: “Ame la itete hni ka ajane tro angat’ a tro fë la ite ahnahna thatraqai Iehova.” Nemene hë la thangane lai? Itre atr “pala hi a tro fë xanëne . . . o hmakany.” Tru  catre la hnei angatre hna traqa fë, “ame hna aseju la nöje troa tro fë.” (Eso. 35:5; 36:3, 6) Hna amamane hnene la angetre Isaraela ka hape, tha gufa kö la Iehova a mejiune koi angatr.

5, 6. Tune la hna qaja ngöne Salamo 110:1-3, nemene la thiina hna troa öhne hnei Iehova me Iesu thene la itre nyipi Keresiano ngöne la itre drai ne la pun?

⁵ Hapeue fe ngöne la itre drai ne la pun, tro fe kö Iehova a hane öhne thene la itre hlue i Nyidrë la hni ne aja cili? Eje hi! Kola e la 1 000 lao macatre qëmekene troa hnaho Iesu e celë fen, hnei Iehova hna upi Davita jëne la uati hmitrötre troa cinyihane la ijine troa nyiqaane la musi ne la Mesia. (E jë la Salamo 110:1-2.) Troa hetre ithupëjia me Iesu, Joxu hna hnyipi acil, nge tro angatr a icilekeu me nyidrë. Ngo ame pe, troa hetre ka troa ce huliwa me nyidrë. Tha tro kö a musinë angatre troa nyihluene la Joxu. Goi tro fe la itre nekö trahmanyi me jajinyi a sipu nue la mele i angatre troa ce huliwa me nyidrë, nge mana catr angatre matre ceitui angatre memine la wene lepanyi hune ihaö e hmahmakany. a (E jë la Salamo 110:3, MN.) b

⁶ Atre hnyawa hi Iesu ka hape, ame lo hna perofetane ngöne Salamo 110, tre, kola eatre hui nyidrë. (Mat. 22:42-45) Haawe, ka xecie hnyawa koi Iesu ka hape, troa hetre ka troa huujëne xanë angatre kö troa cainöjëne la maca ka loi e cailo fen. Nemene la hna amamane hnene la itre ewekë ka tru ka traqa? Hnene kö la Joxu hna hnëkëne la itretre cainöj ngöne la itre drai ne la pune celë?

7. Ase jë hi acili Joxu Iesu, nemene la hna kuca hnei nyidrë matre troa hnëkëne la itretre drei nyidrë?

⁷ Ase jë hi acili Joxu Iesu, nyidrëti a hnëkëne ju la itretre drei nyidrë thatraqane la huliwa ka tru nyine troa kuca. Tune la hne së hë hna ce wange ngöne la Mekene 2, hnei nyidrë hna kuca la huliwa ne waipengön me inyidrawa qaane lo 1914 uti hë lo kola xejë la macatre 1919. (Mal. 3:1-4) Ame hë lo 1919, nyidrë a acile la hlue ka nyipici troa elemekene la itretre drei nyidrë. (Mat. 24:45) Qaane ju hi la ijine cili, hnene la hlue ka nyipici hna thawa la xeni ne la u, jëne  la itre cainöje ngöne la itre asabele, me jëne fe la itre itus. Itre eje pala hi a amamane hnyawa la hnëqa ne la nöjei Keresiano, ene la troa isa eatrëne la huliwa ne cainöj.

8-10. Nemene la aqane ithuecatr ekö hnene la itre asabele göi troa cainöj? Hamëne jë la ketre ceitun. (Wange ju fe la itre mekune hna eköhagen, “ Itre Asabele Ekö Ka Iupi Troa Catre Cainöj.”)

⁸ Itre Cainöje ngöne la itre asabele. Ka aja ixatua la Itretre Ini Tusi Hmitrötr matre angatr a traqa troa sine la asabele e Cedar Point, Ohio, Etazini, qaane la 1 koi 8 Semitrepa 1919, pane asabele ka tru i angatre hi lai thupene lo Pane Isi Ka Tru. Ame ngöne la hnaaluene drai, hnei Rutherford hna cile fë la ketre cainöj, nge e cili, nyidrëti a ithanata meköti kowe la iatrene la asabele, me hape: “Ame la hnëqa ne la Keresiano e celë fen, tre, ene la troa cainöjëne la maca ne la baselaia i Joxu.”

⁹ Ame la ewekë ka tru ne la asabele cili, tre, kolo cainöje hna cile fë hnei Rutherford ngöne la hnaakönine drai, hna hape, “Thatraqane La Itretre Ce Huliwa,” hna fejane la tane mekune cili ngöne la Ita Ne Thup hna hape, “Cainöjëne Jë La Baselaia.” Öni nyidrë: “Ame ngöne la mele ne la Keresiano, angeic a thele ewekë, me hape, Hnauëne la eni pi e celë fen? Ame la aqane troa sa, tre, hnene la Joxu hna upi ni troa ukeineqë i nyidrë göi troa tro fë la maca ne iloi kowe la fen. Haawe, hnëqange ka tru la troa qaja la maca celë.”

¹⁰ Ame ngöne la cainöje cili, hnei Rutherford hna cile fë la ketre ithuemacanyi kowe la iatren ka hape, hetre ketre zonal ka hnyipixe l’Âge d’Or (Réveillez-vous ! enehila) hna troa kuca göi troa xatuane la itre atr troa atrehmekune ka hape, Baselaia hmekuje hi la atre troa nyinyine la itre akötre ne la atr. Thupene lai, nyidrëti a hnyingëne ju kowe la iatrene la asabele, ka hape, Drei la ka ajane troa tro fë trongëne la zonale celë. Kola qeje pengöne e thupen la asabele cili ka hape: “Nyine haine la ewekë ka traqa. Aca ce cile jë hi la ala sikisi thauzane lao atr.” c Mama pi hi ka hape, hetre itre ka ajane troa ce huliwa memine la Joxu, göi troa cainöjëne la Baselaia i nyidrë!

11, 12. Nemene la hna qaja hnene la Ita Ne Thup ne 1920 göi ijine troa nyiqaane kuca lo huliwa hna ahnithe ekö hnei Iesu?

¹¹ Itre itus hna fejan. Kola mama hnyawa trootro hnine la Ita ne thup la enyipiewekëne lo huliwa hnei Iesu hna ahnith, ene la huliwa ne tro fë la maca ka loi ne la Baselaia i Akötresie. Tro sa ce wange la itre hna kuca qaane lo 1920.

¹² Nemene la maca hna troa qaja ka eatrëne lo hna thingehnaeane ngöne Mataio 24:14? Hna nyiqaane eu la huliwa cili? Ame la tane la Ita Ne Thup ne 1 Julai 1920, ke “Evangelia ne la Baselaia.” Ame la mekune hna ithanatane tre: “Ame la maca ka loi hna qaja, tre, ene la pune la itre ewekë hnapan nge Baselaia ne la Mesia hna acil.” Kola amamane hnyawa hnene la tane mekune cili la ijine troa cainöjëne la maca, me hape: “Troa qaja la maca celë akawane lo isi ka tru [Pane Isi Ka Tru] memine la ‘Aköt Atraqat.’ ” Ketre, kola qaja mina fe ka hape: “Enehila hi la ijine . . . troa cainöjëne la maca ka loi e cailo fen kowe la itre Hmi Keresiano Göi Ëjen.”

13. Nemene la aqane ithuecatrene la Ita Ne Thup ne 1921 kowe la itre hna iën matre sipu huujë angatre xane kö?

¹³ Hna musinëne kö la itre hlue i Akötresie troa kuca lo lai huliwa hna ahnithe hnei Iesu? Ohea. Hnene la Ita Ne Thup ne  15 Maac 1921 hna hape, “Loi e troa catr” hna ithuecatrene la itre Keresiano hna iën troa huujë angatre xane kö. Kola upi angatre troa isa hnyinge ka hape: “Tune kaa lo lai huliwa cili, eni kö a hane wangatrun me isine troa hane xom ej?” Kola sisedrëne hnene lo Ita Ne Thup ka hape: “Tha sihngödri kö koi huni laka, ame la epuni a xome la huliwa cili [ceitune me ketre hnëqa ka tru] tro hë epuni a tui Ieremia, lo kola aceitunëne la wesi ula ne la Joxu me ‘eë ka mele hna thinge hnine la itre june i angeic.’ Kösë kola uku angeic troa cainöj, matre thatreine hë angeice lapa fë.” (Iere. 20:9) Kola amamane hnene la ithuecatre cili laka, mejiune Iehova me Iesu kowe la itre ka ce huliwa nyipici kowe la Baselaia.

14, 15. Nemene la hnene la Ita Ne Thup ne 1922, hna upe la itre Keresiano hna iën troa kuca?

¹⁴ Nemene la aqane troa tro fë hnene la itre nyipi Keresiano la maca kowe la itre xaa atr? Hnene la Ita Ne Thup ne 15 ogas 1922 ka xoxopatr ngo ka catre pe, hna nyi tane ka hape, “Ka Nyipi ewekë Catre La Huliwa,” hna upe la itre hna iën troa “tro fë la maca hna fejan kowe la itre atr me ithanata koi angatre ngöne la itre hnalapa i angatr, me hane thuemacanyi angatr, ka hape, calemi hë la Baselaia ne hnengödrai.”

¹⁵ Mama hnyawa ha qaane lo macatre 1919, laka, hnei Keriso hna upe la hlue ka nyipici me ka inamacan troa anyimua amexeje laka, ame la hnëqa memine la huliwa ne la Keresiano e celë fen, tre, troa tro fë la maca ne Baselaia. Haawe, nemene jë la aqane troa kapa la ithuecatr hnene lo itretre ini Tusi Hmitrötr ekö?

16. Nemene la aqane ujë ne lo itre xa qatre thup la kola upi angatre troa cainöj?

¹⁶ Ame ngöne lo itre macatre 1920 me 1930, hnene la itre xan hna cile kowe la mekune hna hape, tro asë hi la itre Keresiano hna iën a cainöje trootro. Hna qaja la ewekë ka traqa hnene la Ita Ne Thup ne 1 Nofeba 1927, kola hape: “Hetrenyi la itre ka xome la hnëqa ne qatre thup enehila e hnine la uma hmitrötr [ekalesia] . . . Xele angatre ma ithuecatre kowe la itre xan troa hane cainöje trootro, nge ketre xele fe angatre ma hane sine la huliwa cili. . . . Tha nyipiewekëne kö angatre lai mekun göi troa cainöjëne la maca i Akötresie ngöne la itre hnalapa trootro, me qaja la Joxu me Baselaia kowe la itre atr.” Önine mina fe la zonal: “Traqa ha la ijine kowe la itre trejine ka mele nyipici troa ananyi angatre me qaja koi angatre ka hape tha tro hmaca kö huni a hane mejiune kowe lo lai itre qatre thupe cili.” d

17, 18. Tune kaa la aqane kapa hnene la ekalesia la hna amekötine hnene la hlue ka nyipici me ka inamacan, nge nemene la aqane ujë ne la itre milio lao atr, ngöne la ca hadredr lao macatre ka ase hë?

¹⁷ Eloine pe, ala nyimu e hnine la ekalesia la itre ka kapa hnyawa la hna amekötin hnene hlue ka nyipici me ka inamacan. Ame koi angatr, hnëqa ka tru la troa hane tro fë la maca ne Baselaia. Drei la hna qaja hnene la Ita Ne Thup ne 15 Maac 1926, kola hape: “Loi e tro la itre trejine a hujëne la mele i angatr, . . . matre troa qaja la maca kowe la itre atr.” Hnene la itre trejine cili hna melëne la hna qaja ngöne Salamo 110:3 me hane isa amaman ka hape, angatre hi la itretre catre sajuëne la huliwa ne la Joxu.

 ¹⁸ Ame ngöne la itre macatre ka ca hadredr ka ase hë, itre milio la etrune la itre trejine ka nue la mele i angatre troa hane cainöjëne la Baselaia. Tro pë hë së a ce ithanatane ngöne la itre xa mekene la itusi celë, la aqane cainöje i angatr, ene la nöjei aqane tro fë la huliwa me itre jian; nge tro fe sa ce wange ka hape, nemene la itre thangane lai hna huliwa. Ngo tro së a pane ce ithanatane la kepin matre tru catre la itre trejine ka nue la mele i angatre troa cainöj, ngacama angatr a mele e nyipine la itre atr ka tha imeku. Ame ngöne la easa troa pane ce wange la kepin, nyipi ewekë tro sa isa thele ka hape, ‘Pine nemene matre eni a hane tro fë la maca ka loi kowe la itre xan?’

19. Pine nemene matre easa trongëne la eamo hna hamëne hnei Iesu, ene la troa ‘pane thele la baselaia i Akötresie’?

¹⁹ Hnei Iesu hna hamë eamo kowe la itretre drei nyidrë me hape, ‘Pane Thele Jë La Baselaia i Akötresie.’ (Mat. 6:33) Pine nemene matre ka nyipi ewekë catre koi së troa trongëne la eamo cili? Hnene laka, trotrohnine hnyawa ha së la enyipiewekëne la Baselaia, laka, eje hi la trepene la aja i Akötresie. Tune la hne së hna ce wange hë ngöne lo mekene ka ase hë, kola amamane trongëne hnene la uati hmitrötre la itre nyipici göne la Baselaia, hne së hna pi atre. Ame la kola ketr la hni së hnene la nyipici ne la Baselaia, canga saqe hi së amë panëne la Baselaia.

20. Hapeu, atre hnyawa hi Iesu la aqane troa kapa hnene la itretre drei nyidrë la eamo göi troa amë panëne la Baselaia?

²⁰ Atre hnyawa hi Iesu la aqane troa kapa hnene la itretre drei nyidrë la eamo göi troa amë panëne la Baselaia. Hnei nyidrëti hmaca kö hna amamai së la aqane troa trongën la eamo cili, ngöne lo ceitune i nyidrë hna hape, trengamo hna juetrën. (E jë la Mataio 13:44.) Ame ngöne la nöjei drai ne kola huliwa la atre eëny hna qaja ngöne lo ceitun, hnei angeic hna öhne la trengamo hna juetrën, ene pe canga tro mama ju hi koi angeic la etrune la trengamo cili. Nemene ju hë la hnei angeic hna kuca? “Ame hnei angeice hna troju me itöne la nöjei ewekë asë i angeice ke madinë hë, me itöne la hlapa cili.” Nemene ini nyine tro sa xom qa ngön? Ame la easa atre la nyipici göne la Baselaia me öhne laka mo ka tru alameken, tro hë lai a tru la aja së troa nuetrije lo itre ewekë hne së hna wangatrun, matre troa amë la itre huliwa thatraqane la Baselaia ngöne la sipu göhnen ej, ene la troa amë panëne ej ngöne la mele së. e

21, 22. Nemene la aqane amamane hnene la angetre sajuëne la Baselaia ka hape, angatr a thele panëne ej? Hamëne jë la ketre ceitun.

²¹ Kola mama jëne la itre huliwa ngo tha itre hnaithanata hmekuje kö thene la itretre sajuëne la Baselaia, laka, angatr a thele panëne la Baselaia. Angatr a nue la mele i angatr, me atreine i angatr, me itre mo i angatre kowe la huliwa ne cainöjëne la Baselaia. Alanyim la angetre huujëne la mele i angatre matre tro pala hi angatr a catre cainöj o drai. Mama hnyawa ha kowe la itre ka catre cainöj la aqane amanathithi angatre hnei Iehova, qa ngöne la hnei angatre hna amë panëne la Baselaia. Tro sa ce wang la ketre hna melën ngöne la hneijine së.

²² Ngöne la itre macatre qëmekene troa traqa koi 1930, hnene la lue trefën Avery me Lovenia Bristow hna nyiqaane ce pionie  ngöne la götrane ailojë e Etazini. Ame hë itre macatre thupen, mekune hmaca jë hi Lovenia trejine föe, me hape: “Atraqatre la madrineng me Avery troa ce pionie ngöne la itre macatre qaane la ijine cili. Tru la itre ijine nyiho a isa thele ka hape, tro jë nyiho a itö xeni tune kaa me saas. Ngo, eje hi laka, hnei Iehova pala hi hna hamë nyiho la ka ijij. Nge, hnei nyiho pala hi hna catre fë la huliwa ne pionie. Hetrenyi pala hi nyiho la ka ijije thatraqane la mele i nyiho.” Mekune hmaca jë Lovenia la ijine nyidro a ce pionie e Pensacola e Floride, nge hna pë manie i nyidro me xen la ijine cili. Ame la nyidroti a bëeke hmaca kowe la sine roulotte hnei nyidroti hna lapa ngön, öhne ju hi nyidroti la lue bëekë xen me ca sine tus, kola hape: “Ihnimi hun, itre trejine ne la ekalesia ne Pensacola.” Ame la kola mekune hmaca hnei Lovenia la itre macatre ne pionie i nyidro, öni angeic: “Tha ase pi kö Iehova nue nyiho. Tha ase pi kö Nyidrëti thëthëhmine la aqane huliwa nyipici nyiho koi Nyidrë.”

23. Nemene la mekune ka eje e kuhu hni epun, la epuni a atre la nyipici göne la Baselaia, nge nemene la hnei epuni hna ajane catrëne troa kuca?

²³ Thatreine kö troa ceitune la itre huliwa hne së hna kuca ngöne la hna cainöj. Tha ceitu kö la pengöne la mele së. Ngo, loi e tro sa xome la huliwa ne cainöje ceitu me ketre manathith, ene la troa qaja trongëne la maca ka loi cememine la hni ka pexej. (Kol. 3:23) Pine laka, easa wangatrune la nyipici hne së hna atre göne la Baselaia, easa ajane troa kuca asë la hne së hna atreine matre troa huliwa catre ngöne la hna cainöj. Hapeu, celë kö la aja ka catre thei epuni lai?

24. Nemene la huliwa ka tru hna kuca hnene la Baselaia ngöne la itre drai ne la pun?

²⁴ Ame ngöne la ca hadredre lao macatre ka ase hë, hnene la Joxu hna eatrëne lo hnei nyidrëti hna perofetane hë ngöne Mataio 24:14. Nge tha hnei nyidrëti kö hna musinë së troa eatrëne lai. Ame la itretre drei nyidrë a tro trije la fene celë ka tha imeku, angatre fe hi lai a huujëne xanë angatre kö troa kuca la huliwa ne cainöj. Ame la huliwa ne cainöje hna kuca ngöne la fene hnengödrai, celë hi ketre hatrene laka, musi hë Iesu ngöne la Baselaia i nyidrë, nge celë hi ketre huliwa ka tru hna kuca hnene la Baselaia ngöne la itre drai ne la pun.