NYIPUNIETI a cainöj ngöne itre hnalapa trootro, nge ho jë hi la ketre trutru qa ga nany. Kola easenyi trootro la trutru. Epuni ha nyiqaane ithanata memine la atr, ngo kola xei la ka ce cainöje me epun, ke, ca loto i polis ka traqa me cil ezi epun. Kola uti la polis me hnyinge ka hape: “Epuni hi la ka xötrë uma trootro matre troa qeje Tusi Hmitrötr? Hetre ka eetre pine la tronge i epun!” Epuni a sa amenyikeny me qaja ka hape Itretre Anyipici Iehova epun. Nemene ju hë la ewekë ka traqa?

Qanyine kö la hna amekötine hnei mus. Nemene la aqane goëene la Itretre Anyipici Iehova hnei mus? Hna nue kö la hmi angatr? Maine jë hna nue la hmi thupene la hna lepe ekö la itre trejine trahmanyi me föe, pine la hnei angatr hna iuti sai “me acatene la maca ka loi.” (Fil. 1:7) Kola acatrene la lapaune së asë hnene la aqane kapa la maca ka loi ngöne la itre hna kootr e cailo fen. Easa troa wange ngöne la xötre mekene celë, la aqane trongene la itre hna kootr. Tro hë së a öhne e cili la ketre nyine anyipicine laka ka mele la Baselaia, ke, maine ju thatreine jë kö tro sa hune ngöne la itre hna kootre cili!