EPUNI a öhne la kola goe catre hnene la ka inine la Tusi Hmitrötr la angeic a trotrohnine la aliene la xötre hnei epuni hna ce e. Angeic a pane cil, me qaja ka hape, “Eö lai a nyipici! Tusi Hmitrötr a qaja ka hape, tro sa mele epine palua ngöne la Paradraiso, ngo e celë fen?” Kola dredrehnyima hnene la sine tronge i epun, me hape, “Ngo ame eö ke, nemene la hnei eö hna trotrohnine e cahu hna qaja hnei Tusi Hmitrötr?” Kola sesëkötre hnene la hnainin, me nangenange la he, me hape, “Thatreine fe kö ni mekune laka, tha ase fe kö hane ini ni ekö la ewekë cili!” Mekune hmaca jë hi epuni lo itre wiike ka ase hë, lo angeice a sesëkötre tune lai lo angeice a atre ka hape, ame la ëje i Akötresie, tre Iehova.

Ala nyimu the së la itre ka hane melëne hë la itre ewekë cili. Itre ewekë lai ka amekunë së laka, hetrenyi së la ketre ahnahna ka sisitria, ene la troa atrehmekune la nyipici! Ngo, hna tune kaa matre traqa pi koi epuni la ahnahna cili? Ame ngöne la xötre mekene celë, tro sa ce ithanatane la hnyinge cili. Kola mama jëne la elualaine la itre ini hna kapa trongëne hnene la nöje i Akötresie, laka, cile hë la Baselaia i Akötresie. Ame ngöne la ca hadredre lao macatre, hnene la Joxu ne ej, Iesu Keriso, hna hmekëne matre tro la nöje i Akötresie a kapa pala hi la itre ini göne la nyipici.