MEKENE 3
Iehova a Amamane La Aja i Nyidrë
1, 2. Nemene la aqane amamane Iehova la aja i Nyidrë kowe la itre atr?
AME la itre keme me thin ka ihnim, tre, angatr a ce ithanatane me itre nekö i angatre la itre mekune thatraqane la hnepe lapa. Ngo, angatr a thupëne matre tha tro kö angatr a hamëne menune la itre ithanata. Angatre hi a hamëne la itre hnepe mekune ka ijije koi nyudren troa trotrohnin.
2 Ketre tune mina fe, Iehova a amamane trongëne la aja i Nyidrë kowe la itre atr. Ngo Nyidrëti hi a amaman, e atre hi Nyidrëti laka, ijine hë tro angatr a hane atre. Tro sa pane ce wange la itre ijine ka tru ne la mele ne la atr, la Iehova a amamane la itre nyipici göne la Baselaia.
Pine Nemene Matre Nyipi Ewekë La Baselaia?
3, 4. Hnei Iehova kö hna eköthe amë la aqane trongene la mel? Qeje pengöne jë.
3 Tha mekuna i Iehova kö ngöne la qaan troa acile la Baselaia Ne La Mesia. Pine nemen? Pine laka tha hnei Iehova kö ekö hna mekune troa hetrenyi la icilekeu memine la musi Nyidrë. Hnei Nyidrëti hna xupe la itre atr cememine la atreine troa isa ië mekun, me qaja koi Adamu me Eva la aja i Nyidrë kowe la itre atr, me hape: “Manapi me hate, me atiqane la fene hnengödrai, me xom’ acon’ ej.” (Gen. 1:28) Hnei Iehova fe hna amekötine koi nyidro troa mele thenge la itre tulu ne mel göi loi me ngazo. (Gen. 2:16, 17) Ijije hi tro Adamu me Eva a mele nyipici. Maine hnei nyidroti ju me itre matra i nyidro hna mele nyipici, tha nyipi ewekë kö koi së la Baselaia hna cilëne hnei Keriso matre troa eatrëne la aja i Akötresie, nge ketre tro ha tiqa la fene hnene la itre atr ka pexej, nge ka nyihlue i Iehova.
4 Tha hnene kö la icilekeu i Satana, me Adamu, me Eva hna sewe Iehova troa aeatrëne la aja i Nyidrë, ene la troa atiqane la fene hnene la itre atr ka pexej. Hnei Iehova pe hna thele la ketre jëne troa aeatrëne lo lai aja i Nyidrë. Ame la aja i Nyidrë, tre, tha ceitu kö me ketre loto ka nyinyape ngöne la ketre gojenyi ka tro kowe la ketre götran, nge hna ajolëne hnene la ketre isinöe hna amekölene agöne hnei ketre atr. Ame Iehova, e qaja ha Nyidrë la aja i Nyidrë, pëkö ketre e celë fen me e hnengödrai ka atreine troa sewe Nyidrë. (E jë la Isaia 55:11.) E traqa ju hetre ewekë ka thupe gojeny, tro hmaca kö Iehova. a (Eso. 3:14, 15) E ka loi koi Nyidrë, Nyidrëti a ithuemacane la itre hlue i Nyidrë la ketre jëne ka hnyipixe ka troa aeatrëne la aja i Nyidrë.
5. Nemene la hnei Nyidrëti hna canga mekune thupene la icilekeu e Edena?
5 Thupene jë hi la hna icilekeu e Edena, Iehova a mekune jë troa acile la Baselaia. (Mat. 25:34) Ame ngöne la ijine cili, kösë lo luuzi hë la fen, e cili hi la Iehova a nyiqaane amamane la jia ne huliwa hnei Nyidrëti hna troa xome matre troa acile hmaca lo mele hna aluuzine ekö, me apatrene la itre akötr hna axulune hnene la pi musi Satana. (Gen. 3:14-19) Tha hnei Iehova kö hna a ca tro amamane asë la itre ithuemacanyi göne la Baselaia.
Iehova a Nyiqaane Amamane La Nyipici Göi Baselaia
6. Nemene la hnei Iehova hna thingehnaean, ngo nemene la ewekë tha hnei Nyidrëti kö hna qaja amaman?
6 Ame ju kö lo pane hna perofetan, hnei Iehova hna thingehnaeane ka hape, tro la ‘matran’ a waja fica la un. (E jë la Genese 3:15.) Ngo ame pe, ame ngöne la ijine cili, tha mama pala kö ka hape drei lai matran, memine la matra i Satana. Ngo tha hnei Iehova kö hna hamëne la itre xa ithuemacanyi göne lai uti hë traqa koi 2 000 lao macatre. b
7. Pine nemene matre kola ië Aberahama, nge nemene la ini ka tru hne së xome qa ngöne lai?
7 Haawe, hnei Iehova hna ië Aberahama matre jëne angeic, tro ha traqa la matran. Hna ië Aberahama, ke, hnei angeice “hna denge thenge la tenge ewekë [i Iehova].” (Gen. 22:18) Hetre ini ka tru hne së hna xome qa ngön: Iehova a amamane hmekuje hi la aja i Nyidrë kowe la itre ka xou me metrötrë Nyidrë.—E jë la Salamo 25:14.
8, 9. Nemene la itre ithuemacanyi hna hamëne hnei Iehova koi Aberahama me Iakobo göne la matran?
8 Ame lo Iehova a ithanata koi Aberahama, enehmu i Nyidrë jëne la ketre angela, hnei Nyidrëti hna hamëne lo pane ithuemacanyi ka tru göne lo matran hna thingehnaean, laka ketre atr la matran elany. (Gen. 22:15-17; Iako. 2:23) Ngo tro la atr cili, a waja ficane tune kaa la un? Drei lo lai un? Tro pë hë la itre ithuemacanyi thupen a amamane hnyawa koi së göne la itre hnyinge cili.
9 Hnei Iehova hna amekötine ka hape, tro la matran hna thingehnaean a traqa jëne Iakobo, api Aberahama, ketre atr ka catre lapaune koi Akötresie. (Gen. 28:13-22) Jëne Iakobo, hnei Iehova hna amamane ka hape, tro la Matran Hna Thingehnaean a traqa qaathei Iuda, nekö i Iakobo. Hnei Iakobo hna perofetane ka hape, tro la matra i Iuda cili a kapa “la tö,” ketre hatrene la musi ne la joxu, nge “tro ha la nöjei nöj’ a denge thenge anganyidë.” (Gen. 49:1, 10) Jëne la hna ithanata celë, Iehova a amamane la ketre ithuemacanyi ka hape, tro ha joxu la Matran Hna Thingehnaean.
10, 11. Pine nemene matre hnei Iehova hna qaja amamane la aja i Nyidrë koi Davita me Daniela?
10 Kola traqa koi 650 lao macatre thupe i Iuda, hnei Iehova hna amamane la itre xa ithuemacanyi göne la aja i Nyidrë koi Davita Joxu, ketre matra i Iuda. Hnei Iehova hna qeje pengöi Davita ceitu me “ate tune la hni [N]yidë.” (1 Sam. 13:14; 17:12; Ite hu. 13:22) Qa ngöne laka, hetrenyi Davita la xoue me metrötre koi Akötresie, hnei Iehova hna axeciëne troa isisinyikeu me angeic, me thingehnaeane koi angeice ka hape, tro la ketre matra i angeic a mus uti hë epine palua.—2 Sam. 7:8, 12-16.
11 Kola traqa koi 500 lao macatre thupen, hnei Iehova hna nyi jëne Daniela perofeta matre troa qaja amamane la macatre ne troa mama e celë fen la Iana i Akötresie, ene la Mesia. (Dan. 9:25) Pine nemene matre Iehova a amamane la aja i Nyidrë koi Daniela? Pine laka Nyidrëti a xome ceitu Daniela me atr “hna hanyi[n],” ke, atraqatre la metrötre i Daniela koi Iehova, nge angeice pala hi a catre nyihlue i Nyidrë.—Dan. 6:16; 9:22, 23.
12. Nemene la hna upi Daniela troa kuca, nge pine nemen?
12 Hnei Iehova hna upe jëne la uati hmitrötr la itre perofeta ka tui Daniela matre troa cinyihane la itre ithuemacanyi göne la matran, ene la Mesia. Ngo ame pe, tha ijine petre kö tro Iehova a aijijëne la itre hlue i Nyidrë troa trotrohnine hnyawa asë la aliene la hnei angatre hna cinyihan. Thupene la hnei Daniela hna meköle goeëne la kola acile la Baselaia i Akötresie, hna upi angeice troa pelehatrene lo lai hna perofetane uti hë la ijine hna sa hnei Iehova. Ame ngöne la ijine cili, tre, “troa kekë [mana]” la nyipi atrehmekun.—Dan. 12:4.
Hnei Iehova hna upe la itre atr ka tui Daniela, troa cinyihane la itre ithuemacanyi göne la Baselaia Ne La Mesia
Iesu a Amamane Hnyawa La Aja i Akötresie
13. (a) Drei lo la matran hna thingehnaean? (b) Nemene la aqane amamane Iesu la nyipici göne la hna perofetane ngöne Genese 3:15?
13 Hnei Iehova hna amamane hnyawa ka hape, Iesu hi la matran hna thingehnaean, lo matra i Davita ka troa Joxu. (Luka 1:30-33; 3:21, 22) Ame lo Iesu a nyiqaane cainöj, kösë kola fetra la jö, ene la kola mama la atrehmekune göne la aja i Akötresie. (Mat. 4:13-17) Hnei Iesu hna qaja amamane la pengöne la “un” hna qaja ngöne Genese 3:14, 15, me hëne ka hape Diabolo lo “Ate ihumuth,” “keme ne [la thoi].” (Ioane 8:44) Ame ngöne la tusi Hna Amamane, lo itre ewekë hnei nyidrë hna amamane koi Ioane, nyidrëti a amamane hnyawa ka hape, ame la “une ekö,” tre, “Diabolo nge Satana.” c (E jë la Hna Amamane 1:1; 12:9.) Ame pala hi ngöne la itre hna meköle goeëne hnei Ioane, Iesu a amamane la aqane tro nyidrë, lo matran hna thingehnaean, a eatrëne hnyawa elanyi lo hna perofetane ekö e Edena, laka troa wajafici Satana.—Hna ama. 20:7-10.
14-16. Hnene kö la Itretre drei Iesu ekö hna wangatrehmekune pala hi la itre nyipici hna amamane hnei Iesu? Qeje pengöne jë.
14 Tune la hne së hna ce wange hë ngöne la mekene 1 ne la itusi celë, hnei Iesu hna ithanatane atrune la Baselaia. Ngo ame itre xa ijin, tha qaja asë kö nyidrëti la nöjei ithuemacanyi hnene la itretre drei nyidrë hna ajan troa atre. Ame la itre nyipici hna amamane hnei Iesu koi angatr, tre, kola mama hnyawa pë hë la alien thupene la itre hadredre lao macatre. Tro sa pane ce wange la itre xa ceitun.
15 Ame lo 33 M.K., hnei Iesu hna qaja amamane ka hape, ame la itre ka troa ce musi memine la Joxu ne la Baselaia i Akötresie, tre, itre atr ka qaa celë fen, nge ka elë hnengödrai eë matre troa itre u. Ngo, tha canga trotrohnine kö la itretre drei nyidrë la ithuemacanyi cili. (Dan. 7:18; Ioane 14:2-5) Ame fe ngöne la macatre cili, hnei Iesu hna amamane jëne la itre ceitun, laka, tro pë hë a acile la Baselaia itre macatre ka nyimutre thupene lo hnei nyidrëti hna elë hnengödrai eë. (Mat. 25:14, 19; Luka 19:11, 12) Tha trotrohnine kö itretre drei nyidrë la mekune ka tru cili, nge ame hë e thupen, lo mele hmaca i Iesu, angatr a hnyingë nyidrë me hape: “Hape u, ijinë hë la tro cilieti a ajoxunyi angete Isaraela hmaca ?” Ngo, tha hnei Iesu kö hna qaja asë la itre ithuemacanyi ngöne la ijine cili. (Ite hu. 1:6, 7) Hnei Iesu fe hna hane qaja ka hape, troa hetrenyi la ketre lapa, ene la “ite xa mamoe,” ka tha hane fe kö sine lo lapa ne la itre “mamoe ka xalaithe,” ene la itre itretre ce musi me nyidrë. (Ioane 10:16; Luka 12:32) Tro pë hë a trotrohnine hnyawa hnene la itretre drei Iesu la pengöne la lue lapa cili e thupene hë la hna acile la Baselaia lo 1914.
16 Ijije hi tro Iesu a qaja la nöjei ithuemacanyi hna ajane hnene la itretre drei nyidrë lo nyidrëti petre kö e celë fen, ngo atre hnyawa hi nyidrë laka, thatreine kö angatre troa kapa lai. (Ioane 16:12) Maine nyipici laka, nyimu ithuemacanyi pi hë hna hamëne göne la Baselaia ngöne la hneijine i Iesu, ngo ame pe, tha ijine tro petre kö a mana la atrehmekune cili.
Kola Mana La Nyipi Atrehmekune Ngöne “La Ijine La Pun”
17. Nemene la nyine tro sa kuca matre tro sa trotrohnine la itre nyipici göne la Baselaia, ngo nemene fe la ka nyipi ewekë?
17 Hnei Iehova hna thingehnaeane koi Daniela ka hape, ame ngöne “la ijine la pun,” tre, nyimutre la itre ka “troa nyenyape agö,” nge troa mana “la inamacan,” ene la troa atrehmekune la aja i Akötresie. (Dan. 12:4) Ame la itre ka ajane la atrehmekune cili, tre, nyipi ewekë tro angatr a catre thele ej. Hnene la ketre itus hna qaja ka hape, ame la qene Heberu ne la hnaewekë hna hape, “troa nyenyape agö,” tre, kola qaja la aqane e me inine hnyawa hnene la ketre atr la ketre itus. Ngo inine hnyawa ju hë së la Tusi Hmitrötr, thatreine pi kö së troa trotrohnine hnyawa la itre nyipici göne la Baselaia; Iehova la ka xatua së troa trotrohnin.—E jë la Mataio 13:11.
18. Nemene la aqane amamane la lapaune me ipië hnene la itre ka xoue Iehova?
18 Hnei Iehova hna amamane pala hi la itre nyipici göne la Baselaia ngöne la itre macatre qëmekene lo 1914, nge Nyidrëti pala hi a amamane itre eje ngöne la itre drai ne la pun. Tune la hna troa amamane hnene la mekene 4 me 5 ne la itusi celë, ame ngöne la itre macatre ka ase hë ka ca hadredr, anyimua wenë amekötine hnene la nöje i Akötresie la itre aqane trotrohnine angatre la itre xa nyipici. Kolo kö lai a hape, tha Iehova kö a sajuë angatr? Ohea! Nyipici laka, Nyidrëti a sajuë angatr. Pine nemen? Pine laka, ame la itre ka xoue Iehova, tre, hnei angatre hna catre lapaun me ipië, lue thiina lai hnei Iehova hna ajan. (Heb. 11:6; Iako. 4:6) Tha luelue kö la itre hlue i Iehova laka, troa eatr asë la itre hna thingehnaeane hnene la Wesi Ula i Akötresie. Nge angatr a ipië ngöne la angatr a atrehmekune laka, tha trotrohnine hnyawa kö angatre la aqane troa eatre elanyi la itre hna thingehnaeane cili. Kola mama la thiina ka ipië cili ngöne lo Ita Ne Thup ne 1 Maac 1925, kola hape: “Atre hnyawa hi së ka hape, tro kö la Joxu a qeje pengön, nge tro kö Nyidrëti a sipu qaja la aliene la Wesi Ula i Nyidrë kowe la itre hlue i Nyidrë thenge la aja i Nyidrë, nge ngöne la ijine hnei Nyidrëti hna sa.”
“Tro kö la Joxu . . . a sipu qaja la aliene la Wesi Ula i Nyidrë kowe la itre hlue i Nyidrë thenge la aja i Nyidrë, nge ngöne la ijine hnei Nyidrëti hna sa”
19. Nemene la hnei Iehova hna aijijë së enehila troa trotrohnin, nge pine nemen?
19 Ame lo kola acile la Baselaia lo 1914, sine hi la hna trotrohnine hnene la itre hlue i Akötresie göne la aqane troa eatre la itre hna perofetane göne la Baselaia. (1 Kor. 13:9, 10, 12) Hnene laka tru catre la aja së troa eatre la itre hna thingehnaeane hnei Akötresie, haawe, ame itre xa ijin, tria kö la itre mekune hne së hna trotrohnin. Ame ngöne la itre macatre ka ase hë, kola mama hnyawa la enyipicine la itre ithanata hna qaja ngöne lo lai Ita Ne Thup ekö. Kola qaja hnene lai taane mekune ka hape: “Ketre ini la koi së, tro hi sa trotrohnine elanyi la hna perofetane e tro eje a eatr maine eatre hë.” Easë hnyawa ha ngöne pune la fene celë, nge nyimutre la itre hna perofetane göne la Baselaia ka eatre hë, nge kolo pala hi a eatre enehila la itre xan. Qa ngöne laka ka ipië la itre hlue i Akötresie, nge hetre hni ne ajane i angatre troa ameköti angatr, haawe, hnei Iehova hna aijijë angatre troa trotrohnine hnyawa la aja i Nyidrë. Eje hi laka, mana ha la nyipi atrehmekun!
Itre Ini Ka Hnyipixe a Nyihnyawane La Nöje i Akötresie
20, 21. Nemene la thangane la itre ini ka hnyipixe kowe la itre pane Keresiano?
20 Ketre itupathi koi së la Iehova a wenë amekötine la aqane trotrohnine së la itre nyipici. Hapeu, tro kö la lapaune së me ipië a upi së troa kapa la itre ini cili? Hna cile kowe la itupathi cili hnene la itre Keresiano ka mele ngöne la hneijine ne lo itre pane Keresiano. Pane mekune jë laka, epuni la ketre atre Iudra ka hmi Keresiano ka mele ngöne la ijine cili. Ka tru koi epuni la Trenge Wathebo i Mose, nge tru la madrine i epuni troa ketre atrene la nöje Isaraela. Nge kapa jë fe hi epuni la itre tusi Paulo ka qaja koi epuni ka hape, tha epuni hmaca kö a troa hane mele fene la Trenge Wathebo. Ketre, ase hë Iehova nuetrije la nöje Isaraela ngöne la götrane ngönetrei me kapa pena ha la nöje Isaraela ngöne la götrane u. Angetre Iuda me angetre Ethen la itre atrene lai Isaraela ngöne la götrane u. (Rom. 10:12; 11:17-24; Gal. 6:15, 16; Kol. 2:13, 14) Maine epuni ju fe, nemene la aqane tro epuni lai a ujë?
21 Hna kapa la itre mekune i Paulo hnene la itre Keresiano ka ipië, nge hna amanathithi angatre hnei Iehova. (Ite hu. 13:48) Ame itre xan, hnei angatre hna cile kowe la itre mekune ka hnyipixe, me catre fë la sipu aqane trotrohnine hnei angatr. (Gal. 5:7-12) Maine tha saze kö hnene la itre atr cili la aqane mekune i angatr, tro ha luuzi koi angatre la manathith, ene la troa ce musi me Keriso.—2 Pet. 2:1.
22. Nemene la mekuna i epuni göne la aqane amekötine hnei Iehova la aqane trotrohnine së la aja i Nyidrë?
22 Ame ngöne lo itre macatre ka ase hë, hnei Iehova hna amekötine la aqane trotrohnine së la Baselaia. Drei la ketre ceitun, hnei Nyidrëti hna xatua së troa trotrohnine hnyawa la ijine troa aisane la itre jinine la Baselaia qa ngöne la itre atr ka xel, tune la kola aisane la itre mamoe qa ngöne la itre gootr. Hnei Nyidrëti fe hna qaja koi së la ijine troa pexeje lo lai ala 144 000, memine la aliene la itre ceitun hna hamëne hnei Iesu göne la Baselaia, me ijine troa elë hnengödrai eë la wene puhnene la itre hna iën. d Nemene la aqane kapa epuni la itre ini cili ka hnyipixe? Hna acatrene kö la lapaune i epun? Mama hnyawa kö koi epuni laka, Iehova pala hi a inine la nöje i Nyidrë ka hni ka ipië? Maine eje hi, tro la itre mekune e hnine la itusi celë a acatrene la lapaune i epuni laka, Iehova a amamane trongëne hnyawa pala hi la aja i Nyidrë kowe la itre atr ka xoue Nyidrë.
a Ame la ëje i Akötresie, tre, ka xulu qa ngöne la hnaewekë qene Heberu, hna hape, “ka ej.” Ame la ëje i Iehova, tre, kolo mina fe a hape, Nyidrëti hi la ka eatrëne la itre hnei Nyidrëti hna thingehnaean. Wange ju la itre mekune hna eköhagen, hna hape, “Aliene La Ëje i Akötresie” ngöne la götrane 43.
b Ngacama nango qea catre la ijine cili koi së, ngo nyipi ewekë tro sa mekune ka hape, ame la itre xötre atr ngöne la ijine cili, tre, ka qeadridi catre la hna mel; hetrenyi la foa lao atr ka mele qaane lo ijine i Adamu uti hë Aberahama. Hnei Adamu hna ce mele me Lameka, keme i Noa. Nge hnei Lameka hna ce mele me Sema, nekö i Noa. Nge hnei Sema hna ce mele me Aberahama.—Gen. 5:5, 31; 9:29; 11:10, 11; 25:7.
c A eitrine lao mama ngöne la Itre Hna Cinyihan Qene Heberu la ëje i Satana. Ngo ame pena ha ngöne la Itre Hna Cinyihan Qene Heleni, tre, a thötre nge hetre munën lao mama la ëje i “Satana.” Celë hi matre, tha qaja atrunyi Satana kö ngöne la Itre Hna Cinyihan Qene Heberu, ngo kolo pe a qaja atrune la pengöne la Mesia. Ame hë la kola traqa hnene la Mesia, Iesu hi lai a amamane hnyawa la pengöi Satana, itre ithuemacanyi hna qaja ngöne la Itre Hna Cinyihan Qene Heleni.
d Maine epuni a aja itre xa ithuemacanyi göne la itre ini ka hnyipixe cili, wange ju la itre Ita Ne Thup ne 15 Julai 2013, götrane 9-14 me itre xane ju kö qene Wiwi tune la 15 Okotropa 1995, götrane 23-28; 15 Januare 2008, götrane 5-8; 15 Julai 2008, götrane 17-21.
You May Also Like
ITA NE THUP—NYINE ININ
Catre Jë Mejiune Kowe La Hna Huliwa Kow Hnene La Baselaia
Hnei Iehova hna jëne la seven lao isisinyikeu matre traqa pi la Baselaia ka troa eatrëne la aja i Iehova kowe la fen. Tro ha acatrene tune kaa la lapune së hnene la itre isisinyikeu celë?
