1, 2. Nemene la aqane atrune la ëje i Akötresie ngöne la Traduction du monde nouveau?

 AME ngöne la Drai Angedic e hmakany ne 2 Diseba 1947, hnene la ketre neköi lapa ne la itre trejine hna iën ngöne la Bethela ne Brooklyn e Neweyok, hna mekune troa kuca la ketre huliwa ka tru. Tha huliwa ka hmaloi kö, celë hi matre ame ju fe kö ngöne la 12 lao macatre, hnei angatre hna isine matre eatre pi la huliwa cili. Haawe, ame hë lo 13 Maac 1960, angatre ha umuthe la huliwa ne ujë Tusi Hmitrötr. Köni treu thupene lai, ene lo 18 Juun 1960, hnei Nathan Knorr hna amamane kowe la itre atrene la asabele e Manchester, Agele, lo götrane tixenuë ne la Tusi Hmitrötr, Traduction du monde nouveau (qene papale). Hnene la atre cile fë la cainöj hna qaja amamane la mekuna ne la itre atrene asë la icasikeu me hape: ‘Ketre drai ne madrine la kowe la Itretre Anyipicine e cailo fen asë!’ Ame la ketre kepine matre tru la madrine qa ngöne la aqane ujëne la Tusi Hmitrötr ka hnyipixe, tre, kolo ha mama lapa la sipu ëje i Akötresie.

² Ame ngöne la nyimu Tusi Hmitrötr hna xome trije ëje i Akötresie. Ngo hnene la itre hlue i Iehova itre hna iën, hna cile catre kowe la itre nyinyithina i Satana ka thele troa apatrene trije la ëje i Akötresie. Celë hi aqane kuca i angeice lai matre thatre pi la ëje i Akötresie hnene la atr. Hna qaja hnene la itre trenge ewekë ka nyiqaane la Traduction du monde nouveau ka hape: “Ame la pane kepine matre kuca jë la Tusi Hmitrötre celë, tre, ene la troa amë hmaca la ëje i Akötresie ngöne la sipu göhnene ej.” Eje hi laka, a 7 000 nge hetre munëne lao mama la ëje i Akötresie, Iehova, e hnine la Traduction du monde nouveau. Drei la eloine la aqane atrune la ëje ne la Tretretro së e hnengödrai, ene Iehova!

3. (a) Nemene la aqane trotrohnine hnene la itre trejin la aliene la ëje i Akötresie? (b) Tro sa trotrohnine tune kaa la hna qaja ngöne Esodo 3:13, 14? (Wange ju la itre mekune hna eköhagen, “ Aliene La Ëje i Akötresie.”)

³ Trotrohnine hë ekö hnene la Itretre Ini Tusi Hmitrötr la aliene la ëje i Akötresie, “ini la ka eje.” (Eso. 3:14, Crampon) Haawe, hnene la Ita Ne Thup ne 1 Januare 1926, hna qaja ka hape: “Ame la aliene la ëje i Iehova, tre, . . . ka pë qaane me ka pë pun.” Ngo, ame ju fe kö la kola nyiqaane ujëne la Traduction du monde nouveau, Iehova fe hi lai a xatuane la itre hlue i Nyidrë troa atrehmekune la aliene la ëje i Nyidrë, laka, Akötresie ka mel, nge trene aja nge ka  huliwa. Angatr a atre la aliene la ëje i Iehova, kola hape, “Ka Aejëne Nyidrë.” Eje hi laka, hnei Nyidrëti hna hamë emelene la nöjei ewekë e koho hnengödrai me e celë fen, nge Nyidrëti pala hi a kuca matre troa eatre la aja i Nyidrë. Pine nemene matre nyipi ewekë catre troa atrune la ëje i Akötresie, nge tro sa hane atrune ej tune kaa?

4, 5. (a) Nemene la hne së hna sipone la easa thithi ka hape: “Epi hmitröte la atesiwa i Cilie”? (b) Eue nge tune kaa la aqane ahmitrötrëne Akötresie la ëje i Nyidrë?

⁴ Aja i Iehova troa atrune la ëje i Nyidrë. Eje hi laka pane aja i Nyidrëti hi lai troa ahmitrötrëne la ëje i Nyidrë, tune la aqane amamane hnyawa Iesu ngöne la thith hna hape, Tretretro i Anganyihunieti, kola hape: “Epi hmitröte la atesiwa i Cilie.” (Mat. 6:9, MN) Nemene lai hne së hna sipone ngöne la thith?

⁵ Tune lo hne së hna ce wange hë ngöne la Mekene 1 ne la itusi celë, ame la hna hape, “Epi hmitröte la atesiwa i Cilie” tre, ketre ewekë lai hna sipone ngöne lo thith, nge ka ihmeku la sipo cili memine la aja i Iehova. Ame la lue xan, tre kola hape: “Epi traqa pi la Baselaia i Cilie. Epi tro fe a eje la aja i Cilie.” (Mat. 6:10) Haawe, tune la easa sipo Iehova troa kuca matre traqa pi la Baselaia i Nyidrë, nge matre eatre pi la aja i Nyidrë, ketre tune mina fe easa sipone tro Nyidrëti a kuca matre troa ahmitrötrëne la ëje i Nyidrë. Easa lai a sipone tro Iehova a kuca matre patre asë pi la nöjei ewekë ka adrone la ëje i Nyidrë qaane ekö lo kola icilekeu e Edena. Nemene la aqane tro Iehova a sa la thithi cili? Öni Nyidrë: “Tro ni a ahmitötëne la ëjeng’ atraqat, lo hna angazone thei angete etheni.” (Ezek. 36:23; 38:23) Ame e Amagedo ngöne la Nyidrëti a apatrene la iangazo, tro Nyidrëti e cili a ahmitrötrëne la ëje i Nyidrë qëmekene la nöjei hna xup asë.

6. Tro sa ahmitrötrëne tune kaa la ëje i Akötresie?

⁶ Ame ngöne la mele ne la atr, hnei Iehova hna aijijëne la itre hlue i Nyidrëti troa hane ahmitrötrëne la ëje i Nyidrë. Thatreine kö tro sa kuca hmaca la ketre ewekë matre tro ej a hmitrötr, ke, ka hmitrötre catre hë la ëje i Nyidrë. Nga nemene hö la aqane tro sa hane ahmitrötrën? Öni Isaia: “Tro nyipunie a ahmitötë Iehova ne sabaoth.” Nge Iehova a qaja göne la itre hlue i Nyidrë: “Tro angat’ a ahmitötëne la ëjeng . . . me qouene la Akötesi Isaraela.” (Is. 8:13; 29:23) Haawe, easa ahmitrötrëne la ëje i Akötresie la easa wangatrune catrëne eje hune la nöjei ëj asë, me metrötrëne la aliene ej, me xatuane la itre xa atr troa hane ahmitrötrën ej. Easa amamane la xou me metrötre së kowe la ëje i Akötresie ngöne la easa atrehmekunyi Iehova Atre Mus koi së, me drengethenge Nyidrë cememine la hni ka pexej.—Ite edomë 3:1; Hna ama. 4:11.

7, 8. (a) Pine nemene matre tha canga aijijëne kö Akötresie la itre hlue i Nyidrë troa xome la ëje i Nyidrë? (b) Nemene la nyine tro sa ce wange enehila?

⁷ Qaane lo 1870, hnene la itre hlue i Akötresie hna amë hnine la itre zonale i angatre la ëje i Nyidrë. Kola mama la ëje i Iehova hnine lo Ita Ne Thup ne Ogas 1879 memine la nyima hna hëne ka  hape, Nyima Ne La Jajinyi Ka Xötrei Faipoipo (qene Papale) ka mama lo macatre cili. Ngo, qëmekene tro Iehova a aijijëne la itre hlue i Nyidrë troa hë angatre hnene la ëje ka hmitrötre i Nyidrë, hnei Nyidrëti hna waipengöi angatre hnyawa matre tha tro kö angatr a xome gufane la ëje i Nyidrë. Nemene la aqane hnëkëne Iehova la Itretre Ini Tusi Hmitrötr cili matre troa xome la ëje i Nyidrë?

⁸ E tro hmaca sa goeëne lo pune la itre macatre 1800 me xejë lo itre macatre 1900, easa öhne la Iehova a aijijëne la itre hlue i Nyidrëti troa trotrohnine hnyawa la itre nyipici ka tru, hmekune la ëje i Nyidrë. Tro sa ce wange la köni nyipici cili.

9, 10. (a) Pine nemene matre hna qaja atrunyi Iesu ngöne la itre pane Ita Ne Thup? (b) Nemene la ewekë hna saze qaane lo 1919, nge nemene hë la thangane lai? (Wange ju fe la itre mekune hna eköhagen, “ Aqane Atrune La Ëje i Akötresie Hnene La Ita Ne Thup.”)

⁹ Ame la hnapan, tre, hnene la itretre nyihlue i Iehova hna trotrohnine la enyipiewekëne la ëje i Akötresie. Ame ekö ngöne la qaan, ketre ini ka tru la thupene mel kowe la Itretre Ini Tusi Hmitrötr. Celë hi matre Iesu la hna qaja atrun hnene la Ita Ne Thup. Ame la macatre ne kola xötrei mama la Ita Ne Thup, tre anyimua mama kö la ëje i Iesu hune la ëje i Iehova. Ame göi Itretre Ini Tusi Hmitrötr ngöne la itre macatre cili, tre, kola qaja hnene la Ita Ne Thup ne 15 Maac 1976 ka hape, hnei angatre hna “wangatrune menune pala ha” la ëje i Iesu. Ngo e thupene hë, hnei Iehova hna xatua angatre troa atrehmekune la enyipiewekëne la ëje i Nyidrë e hnine la Tusi Hmitrötr. Nemene hë la thangane lai koi angatr? Önine fe lai tane mekune ne la Ita Ne Thup: “Qaane lo 1919, angatre hë a nyiqaane wangatrune la Tretretro ne la Mesia, ene Iehova.” Ame ngöne la itre macatre thupene 1919, hna sasaithe la 6 500 lao mama la ëje i Akötresie ngöne la Ita Ne Thup.

¹⁰ Ame la kola xome la ëje i Iehova hnene la itre trejin, angatre hi lai a amamane ka hape, ka tru koi angatre la ëje i Akötresie. Tui Mose ekö, hnei angatre hna mekune troa “amamane la atesiwa i Iehova.” (Deu. 32:3; Sal. 34:3) Ame la thangane lai, tune la hna thingehnaeane hnene la Tusi Hmitrötr, tha sihngödri kö koi Iehova la aqane hnin angatre la ëje i Nyidrë, ame hnei Nyidrëti hna hnimi angatre fe.—Sal. 119:132; Heb. 6:10.

11, 12. (a) Nemene la ka saze ngöne la itre itusi së thupene lo 1919? (b) Nemene la hnei Iehova hna amamane hnyawa kowe la itre hlue i Nyidrë, nge pine nemen?

¹¹ Ame la hnaaluen, hnene la itre nyipi Keresiano hna trotrohnine hnyawa la huliwa hna athipe koi angatre hnei Akötesie. Tha qea ju kö thupene la 1919, hnene la itre hna iën ka elemekene la huliwa hna waipengöne hnyawa la hna perofetane hnei Isaia. Thupene lai, hetre ketre hna qaja hmaca pena ha hnene la itre itusi së. Pine nemene matre ame la ewekë hna hnyipi qaja, tre, ketre “xeni [hna thawa] . . . ngöne la nyipi ijin”?—Mat. 24:45.

¹² Qëmekene lo 1919, tha hnene pala kö la Ita Ne Thup hna qeje pengöne atrune la itre ithanata i Isaia, hna hape: “Nyipunie la itete anyipici ni, öni Iehova, nge hluenge lo hnenge hna iën.” (E jë la Isaia 43:10-12.) Ngo thupene jë hi lo 1919, kolo ha nyiqaane ithanatane atrune la itre xötre celë hnene la itre itusi së, me thuecatrene la itre hna iëne asë troa kuca la huliwa hnei Iehova hna athipe koi angatr, ene la troa anyipici Nyidrë. Qaane hi lo 1925 uti  hë 1931, hna waipengöne la tusi Isaia mekene 43 ngöne la 57 lao Ita Ne Thup, nge e mama mina ha la itre ithanata i Isaia, tre kola qeje itre nyipi Keresiano. Kola mama hnyawa laka, ame ngöne la itre macatre cili, Iehova a amamane hnyawa kowe la itre hlue i Nyidrë la huliwa nyine tro angatr a kuca. Pine nemen? Pine laka, nyipi ewekë troa “pane tupathi angat.” (1 Tim. 3:10) Qëmekene tro angatr a xome la ëje i Akötresie, nyipi ewekë tro la Itretre Ini Tusi Hmitrötr a amamane koi Iehova jëne la aqane huliwa i angatr, ka hape, angatre hi la itretre anyipici Nyidrë.—Luka 24:47, 48.

13. Nemene la aqane amamane hnene la Wesi Ula i Akötresie la jole ka tru nyine troa amekötin?

¹³ Ame la hnaakönin, tre, hnene la itretre nyihlue i Iehova hna trotrohnine la enyipiewekëne la troa ahmitrötrëne la ëje i Akötresie. Ame ngöne la itre macatre 1920, hnei angatre hna atrehmekune ka hape, ame la jole ka tru nyine troa amekötin, tre, ene la troa ahmitrötrëne la ëje i Akötresie. Hnene la Wesi Ula i Akötresie hna amamane tune kaa la nyipici? Tro sa ce wange la lue ceitun. Nemene la sipu kepine matre thapa pi Akötresieti la angetre Isaraela qaa Aigupito? Öni Iehova: “Mate hlemu la ëjeng’ e celë fen’ asë.” (Eso. 9:16) Nge pine nemene matre hnei Iehova hna hnime la angetre Isaraela lo angatr a icilekeu me Nyidrë? Öni Iehova hmaca: “Loi pe hnenge hna huliwa qa ngöne la ëjeng, mate tha ngazo kö eje qëmeke ne la ite nöje.” (Ezek. 20:8-10) Nemene la ini hna xome hnene la Itretre Ini Tusi Hmitrötr qa ngöne la itre hna edromëne celë, me itre xane ju kö e hnine la Tusi Hmitrötr?

14. (a) Ame lo pune lo itre macatre 1920, nemene la hna atrehmekune hnene la itre hlue i Akötresie? (b) Nemene la thangane lai atrehmekune cili ngöne la huliwa ne cainöj? (Wange ju fe la itre mekune hna eköhagen, “ Kepine Ka Tru Matre Kola Cainöj.”)

¹⁴ Ame hë ngöne la pune la itre macatre 1920, hnene la itre hlue i Akötresie hna atrehmekune la aliene la hna qaja hnei Isaia, laka traqa ha enehila koi 2 700 lao macatre. Angeice a qaja koi Iehova, ka hape: “Kete tune hnei cilieti hna ea la nöje i cilie, mate celohmëne thatraqai cilie la atesiwa ka lolo.” (Is. 63:14) Haawe, trotrohnine hë la Itretre Ini Tusi Hmitrötr ka hape, ame la pane nyine troa kuca, tre, tha ene kö la troa amele së, ngo tro pe a ahmitrötrëne la ëje i Akötresie. (Is. 37:20; Ezek. 38:23) Ame lo 1929, hnene la itus hna hape, Itre Hna Perofetan (qene Papale) hna qeje pengöne la mekune celë, me hape: “Ame la troa ahmitrötrëne la ëje i Iehova, tre, celë hi ewekë ka sisitria nyine troa pane amekötine qëmekene la nöjei hna xupe asë.” Hnene la aqane trotrohnine ka hnyipixe celë hna upe la itre hlue i Akötresie troa anyipici Iehova me awiëne la ëje i Nyidrë qa ngöne la itre trengathoi ka adron ej.

15. (a) Ame lo itre macatre 1930, nemene la hna trotrohnine hnene la itre trejin? (b) Nemene hë la ka ijije nyine tro ha kuca?

¹⁵ Ame ju fe kö lo kola xejë lo itre macatre 1930, trotrohnine hë la itre trejine la enyipiewekëne la ëje i Akötresie, nge trotrohnine hnyawa fe hë angatre la huliwa hna athipe koi angatre hnei Akötesie, nge trotrohnine hnyawa fe angatre la enyipiewekëne la troa ahmitrötrëne la ëje i Akötresie. Ame hë e cili, ijiji hë tro Iehova a nue la itre hlue i Nyidrë troa hë angatre qa ngöne la ëje i Nyidrë. Ngo qëmekene troa traqa kowe lai, hetre itre ewekë ka traqa pa nyine tro sa ce wang.

16. (a) Nemene la ketre jëne ka tru matre tro Iehova a atrun la ëje i Nyidrë? (b) Drei ekö la pane nöje ka xome la ëje i Akötresie?

¹⁶ Ame la ketre jëne ka tru matre atrune jë Iehova la ëje i Nyidrë, tre, ene la troa hetrenyi la ketre nöje e celë fen ka xome la ëje i Nyidrë. Qaane lo 1513 M.P.K., Isaraela la nöje i Iehova. (Is. 43:12) Ngo, tha hnene kö la nöje hna nyipici kowe la hnei angatre hna sisinyikeu me Akötresie, nge ame lo 33 M.K., kolo hi lai a thë lo hnei angatre hna isisinyikeu me Nyidrë. Ame ju fe kö e thupen, Iehova a “pane xöji angete ethen, troa xome qa thei angate la nöje thatraqane la atesiwa i [N]yidë.” (Ite hu. 15:14) Ame la nöje hna hnyipi iën, tre, hna hëne ka hape, “Isaraela i Akötesie” ene la itretre drei Keriso hna iëne qa ngöne la nöjei nöj.—Gal. 6:16.

17. Nemene la ewekë hnei Satana hna atreine troa kuca?

¹⁷ Ame lo 44 M.K., kola “ati ëjen [qaathei Akötresie la itretre  drei Keriso] . . . ka hape, Ite Kerisiano.” (Ite hu. 11:26) Ame ngöne la qaan, tre, itre nyipi Keresiano hmekuje hi la itre hna hëne tune lai. (1 Pet. 4:16) Ngo, tune la hna amamane hnei Iesu ngöne lo ceitune i nyidrë göi qitr me zizania, hnei Satana hna kuca matre tro fe a hëne ka hape, Keresiano, la nöjei ka hane selën ka hape, itre ka lapaune koi Iesu. Ame hë la thangan, ngöne la itre macatre ka nyimu hadredr, tha mama ha la itre nyipi Keresiano qa ngöne la itre Keresiano göi ëjen. Ngo, ame hë ngöne “la ijine menue” lo 1914, kola ha saze. Pine nemen? Pine laka, itre angela ha a isa ijene la itre Keresiano göi ëjen, qa ngöne la itre nyipi Keresiano.—Mat. 13:30, 39-41.

18. Nemene la ka xatuane la itre trejine troa wange ka hape, nyipi ewekë tro angatr a saze ëje?

¹⁸ Ase jë hi acile la hlue ka nyipici me ka inamacan lo 1919, hnei Iehova hna xatuane la nöje i Nyidrë troa atrehmekune la huliwa hnei Nyidrë hna athipe koi angatr. Canga öhne ju hi angatre laka, ame la huliwa ne cainöje ngöne la itre hnalapa trootro, tre, celë hi ka amamane la isapengöi angatre memine la itre Keresiano göi ëjen. Ame hë la angatr a trotrohnine lai, öhne ju hi angatre ka hape, ame la ëje hnei angatre hna xom lo hna hape, “Itretre Ini Tusi Hmitrötr” tre, tha kolo kö a amamane la eisapengöi angatre memine la itre xan. Ame la ka sisitria kowe la mele i angatr, tre tha ene kö la troa inine la Tusi Hmitrötr, ngo tro pe a anyipici Akötresie, me atrune la ëje i Nyidrë. Haawe, nemene jë la ëje ka ihmeku hnyawa memine lo huliwa i angatr? Hna sa la hnyinge cili lo 1931.

19, 20. (a) Nemene la ewekë ka tru hna axeciëne ngöne lo ijine asabele lo 1931? (b) Nemene la aqane kapa ne la itre trejine la ëje ka hnyipixe cili?

¹⁹ Ame lo Julai 1931, ala 15 000 lao Itretre Ini Tusi Hmitrötr ka traqa kowe la hna asabele e Columbus, Ohio, Etazini. Ame la angatr a goeëne la porogarame ne asabele, angatr a thele troa atrepengöne la aliene la lue mataitus ka tru J me W ka mama hune la icetröne la porogaram. Kola isa thele hnei angatre la aliene la lue mataitusi cili, me isa qeje mekune ngön. Ame hë lo Sabath 26 Julai, hnei Joseph Rutherford hna cile fë la ketre mekune ka tru, me qaja catrëne ka hape: “Easa ajane troa atre së me hë së ka hape, Itretre Anyipici Iehova.” Ame hë la ijine cili, trotrohnine asë hë la itre iatrene la asabele la aliene la lue mataitusi cili ( JW ); angatr a kapa troa hë angatre hnene la ëje hna hape, Itretre Anyipici Iehova, ëje hna xome qa ngöne Isaia 43:10.

²⁰ Ame la kola kapa la mekune cili hnene la iatrene la asabele, tru la madrine i angatr, nge qea catre la hnei angatre hna xexe. Goi drei mejene fe hnene la itre atr ngöne la ketre götrane la fen jëne ipos! Mekune pala hi Ernest me Naomi Barber e Australie, öni nyidro: “Ame la kola xexe e Amerika, hnene la itre trejine e Melbourne hna fiafia, me hane fe xexe. Ketre thatreine kö nyiho troa thëthëhmine lai!” a

21. Nemene la aqane xatuane la itre trejine hnene la ëje cili ngöne la huliwa ne cainöj?

²¹ Ame la kola hëne ka hape, Itretre Anyipici Iehova la itre hlue i Akötresie, thuecatre i angatre jë hi troa tro fë la huliwa ne cainöj.  Hna qaja hnene la lue trefëne ka pionie qaa Etazini, Edward me Jessie Grimes, lue ka hane sine la asabele ne Columbus lo 1931 ka hape: “Lue Itretre Ini Tusi Hmitrötr petre kö nyiho qa ngöne la hnalapa, ngo ame hë la nyiho a bëeke lue Itretre Anyipici Iehova pena ha nyiho. Madrine catre nyiho ekö la kola kapa la ëje cili ka aijijë nyiho troa atrune la ëje i Akötresie.” Thupene la asabele cili, hnene la itre xan qaathene la Itretre Anyipicin hna tro thenge lai me kuca la aqane troa huliwane ka hnyipixe. Angatr a tro kowe la itre hnalapa, me liin kowe la itre atrene la sine kart hna cinyanyin ka hape: “Atre anyipici IEHOVA ka cainöjëne la Baselaia i IEHOVA, Akötresi hun.” Eje hi laka, madrine catre la itre hlue i Akötresie troa xome la ëje i Iehova, nge tru catre la aja i angatre troa qaja trongëne la aliene eje e cailo fen.—Is. 12:4.

22. Nemene la ka anyipicine ka hape, ka mama hnyawa la pengöne la nöje i Iehova?

²² Nyimu macatre hë enehila thupene lo Iehova a upe la itre Keresiano hna iën troa xome la ëje i angatre ka ketre pengön. Thupene lo 1931, hapeu, atreine ju kö Satana atimekëne la itre atr, matre sihngödri koi angatre la nyipi pengöne la nöje i Akötresie? Nge jole kö koi angatre troa wangatrehmekunyi së qa ngöne la itre xa hmi? Ohea, tha jole kö! Mama hnyawa catre hë la eisapengöne la pengö së itretre anyipici Akötresie. (E jë la Mika 4:5; Malaki 3:18.) Eje hi laka, tru catre la aqane nyipi ewekëne së la ëje i Akötresie, matre e qaja ha hnene la ketre atr la ëje cili, canga mama ju hi laka, Atre Anyipici Iehova angeic. Tha sihngödri kö enehila la nyipi hmi qa ngöne la itre hmi ka thoi hna aceitunëne memine la itre wetr ka cile xötrë; ngo “troa acile hutine [ej] hune la hene la ite wet.” (Is. 2:2) Ame enehila, kolo pala hi a atrune catrëne la hmi Iehova memine la ëje i Nyidrë ka hmitrötr.

23. Tune la hna qaja hnei Salamo 121:5, nemene la nyipici ka tru göi Iehova ka thue trenge catre së?

²³ Drei la ithuecatre koi së troa atre laka, tro Iehova a thupë së qa ngöne la itre nyinyithiina i Satana enehila me elanyi fe! (Sal. 121:5) Celë hi matre casi hi la mekuna së memine la mekunane la atre cinyihane la salamo kola hape: “Manathithi la nöj’ e Iehova la Akötesi angat ; ene la nöjei ate hna iëne hnei [N]yidëti nyine edö i [N]yidë.”—Sal. 33:12.