Ange Trejine Fe:

PANE mekune jë së laka, easë fe thene lo itre atrene la Bethela e Brooklyn. Easa iji tri ngöne la hmakanyi ne draikatru 2 Okotropa 1914. Easa lapa treqe Charles Russell. Lö jë hi nyidrë me pane cil tune la hna majemin, öni nyidrëti jë hi kowe la itre atren ne la Bethela, ka hape “Bozu së.” Ngo tha hnei nyidrëti kö hna tro troa lapa ngöne la göhne i nyidrë. Nyidrëti pe a xexe me hamëne la ketre ithuemacanyi ka tru: “Kolo ha troa nyipune la Hneijine i Angetre Ethen, traqa ha kowe la pune la musi ne itre joxu i angatr!” Atraqatre la madrine së, ke, celë hi ewekë lai hne së hna lapa treqene qaane lo kola bapataiso së! Easë asë hi a xexe me kapa madrine la ithuemacanyi celë.

Traqa ha koi ca hadredre lao macatre enehila qaane lo kola qaja hnei Russell lai trenge ewekë cili. Nemene hë la hna kuca hnene la Baselaia  qaane lo drai cili? Tru catre la itre huliwa hna kuca! Jëne la Baselaia, hnei Iehova hna nyidrawane me inine trongëne la itre hlue i Nyidrë. Celë hi matre, ame lo 1914, itre thauzane hi la etrune la itre hlue i Nyidrë, ngo ame hë enehila, kolo ha troa traqa koi eitre milio lao atr. Ngo tune kaa fe së, hetre thangane fe kö la ini hne së hna kapa?

Hne së hna majemine drenge la itre trejine a qaja ka hape, “ka nyinyape nyimenyime la ikariota i Iehova e koho hnengödrai!” nge nyipici hi lai. Ame lai ikariota cili, tre, eje a nyihatrene la götrane ka tha mama kö ne la organizasio i Iehova, ka nyinyape nyimenyime catre hë qaane lo 1914. Hnene la itre ka tro fë maca hna kuca matre troa haöthe la fen asë hnene la huliwa ne cainöj, ene pe, angatr a xome jë la nöjei pengöne aqane cainöj, tune la zonal ne la nöj, me trongëne la itre gojenyi troa thawa trongëne la itre tarak, me itre iatr hna amaman, me kart nyine anyipicin, me patefon, me ipos, me ëternet.

Hna amanathithine la huliwa së hnei Iehova. Kola mama qa ngöne la etrune la itre itus hna ujëne ngöne la 670 lao qene hlapa nge hetre munën, nge kola hamëne gufane itre ej. Hetre itre ka saen, ka ixatua xupe la itre Uma Ne Baselaia, me itre Uma Ne Asabele, me itre filial, ngöne la itre nöje gaa trene mo, me ngöne itre nöje gaa tha tru kö hnei mo. Ame la kola lepe la ketre götrane nöje hnene la itre hulö, kola nyenyape nyimenyime la itre trejine trahmanyi me föe troa ixatua. Haawe, angatre hi lai a amamane ka hape, angatre hi la nyipi “enehmu . . . ngöne la aköte.”—Ite edomë 17:17.

Ame itre xa ijin, hnene la itre hene ne hmi me itre ka icilekeu hna “tratraune la iangazo hnei wathebo.” Ngacama troa sewe së hnei angatr, ngo ame e itre xa ijin, hetre thangane ka loi kowe la huliwa së, ke, kolo pena ha “aciane la maca ka loi.”—Sal. 94:20; Fil. 1:12.

Ketre ewekë ka tru koi huni troa ce huliwa me nyipunie, itre atrene la “hnalapa.” Loi e troa xecie hnyawa koi nyipunie laka, atraqatre la ihnimi huni koi nyipunie. Eahuni catre thithi, matre jëne la aliene la itusi celë, tro nyipunieti a wangatrune hnyawa la edrö i nyipunie ngöne la götrane u.—Mat. 24:45.

Ihnimi huni koi nyipunieti asë,

Eahun, itre trejine me nyipunie,

Lapa Ne Xomi Meköti Ne La Itretre Anyipici i Iehova