Ame la kola mala la nekönatr, tre ketre ijine madrine lai koi epon lue trefën, ngo epone mina fe a seseu. Epone lai a öhne laka, tro ha tru catre la traeme memine la trenge catr hnei epone hna nue kowe lai medreng. Ma tro fe epone lai a hane iwesitrë, ke tru la hna hlë jidri lapa, nge kolo fe a saze la mele i epon. Ketre, hetre nyine tro epon a kuca, matre ijije troa thupëne la nekönatr, me thupëne mina fe la mele i epon. Nemene la ixatua hna hamëne hnei Tusi Hmitrötr göne lai?

ÖNI TUSI HMITRÖTR: “Ihnimi la ate xome ahoeane me ka menyik . . . tha ate thele ewekë i nyëne kö, tha ate canga elëhni kö.” (1 Korinito 13:4, 5) Nyipici laka, tro hë epuni lai itre thin a canga wang atrune la medreng. Ngazo pe, ma tro hë lai föi epun a mekune ka hape, tha epuni hmaca kö a nyipi ewekë angeic. Ngo mekune pala kö epun, ka hape, qâ i epuni fe troa hane sikusiku angeic. Ithanata hnyawa ju me angeic, nge xatua angeice jë, matre tro angeic a dreng laka, qâ i angeice fe troa thupëne la nekönatr.

Nge ame epuni “ange trahmany, ce lapaju me angate thenge la inamacan.” (1 Peteru 3:7) Loi e tro la trahmany a trotrohnine ka hape, troa tru la trenge catre i föe, me traeme i angeice hna nue kowe la neköi medreng. Nyixane jë kö la itre xa hnëqa i angeice hnene lai; celë hi matre tro hë angeice lai a seseu, me kucakuca, me elëhni me eetr lapa. Ame e itre xa ijin, tro fe angeice lai a hane elëhni koi epun, ngo the enije menu kö, ke “loi la ate hmite troa elëhni hune la ate cat.” (Ite Edomë 16:32) Thele jë troa trotrohni angeic, nge hamëne jë koi angeice la ixatua ka ijij.—Ite Edomë 14:29.

NYINE KUCA:

• Qâ i kem: Xatuane ju la föi epun troa thupëne la nekönatr, lai me jidr. Nue pi la itre xa jol ka tha nyipi ewekë kö, matre hetre ijine i epun troa ce memine la föi epun me nekö i epun

• Qâ i thin: Maine föi epun a ajane troa xatua epun troa thupëne la nekönatr, kapa ju. Maine thatreine hnyawa kö angeice kuca, the qaja angazone kö la huliwa i angeic, ngo amamai angeice jë pe la aqane kuca

ÖNI TUSI HMITRÖTR: “Tro nyidoti a ca ngönetei.” (Genese 2:24) Maine nyipici laka, ala köni hë epun, ngo mekune hnyawa ju ka hape, “ca ngönetei” pala hi epon lue trefën. Kuca asë jë matre tro pala hi a catrecatr la imelekeu i epon.

Itre föe fe, amamane jë la hni ne ole i epun kowe la itre föi epun, pine la ixatua hna hamën. Aqane ujë hi lai ka troa hamë angatr la “nyine ameun.” (Ite Edomë 12:18) Itre trahmanyi fe, qaja jë kowe la itre föi epun la etrune la ihnimi epun koi angatr. Qaja aloine jë la aqane thupëne angatre la hnepe lapa.—Ite Edomë 31:10, 28.

“The tro kö kete a thele la loi i angeice kö, loi pe la loi i kete ate kö.” (1 Korinito 10:24) Catre jë troa kuca pala hi la loi kowe la föi epun. Wai ijine ju troa ce porotrik, me qaja aloinyi ketre me ketre, me drenge la mekuna i ketre me ketre. Loi e tro epon a imeku, ngöne la götrane la pengöi itre trefën. Mekune ju la aja i ketre. Öni Tusi Hmitrötr: “The cipa kete hnei kete, ngo loi pe e ce hni nyipo.” (1 Korinito 7:3-5) The cile kö troa hane ithanatane lai ewekë cili memine la föi epun. Maine tro epon a nue koi ketre me ketre troa atreine melëne me trotrohnine la ewekë cili, tro hë lai a catre la imelekeu i epon.

NYINE KUCA:

• Mekune kö ami ijine koi epon

• Loi e tro pala hi a amamane jëne la itre xa hnepe ewekë ka co hi, la etrune la ihnimi epun kowe la föi epun

ÖNI TUSI HMITRÖTR: “Ate hë eö la ite hna cinyihane ka hmitöt e nekönate pete kö, lo ka ateine troa ainamacanë eö kowe la mel.” (2 Timoteo 3:15) Ce ithanatane jë la nyine tro epon a inine kowe la nekö i medreng. Mekune ju laka, ngacama nyëne petre kö e kuhu hni, ngo hetrenyi hë thei nyën la atreine troa xolouth la itre ini. Wang atrehmekune kö nyëne la nine hnenyinawa i epon, nge nyën a enienij thenge la itre ewekë ka traqa koi epon. Hane ju e tusi koi nyën, ngacama medrenge petre kö. Ngacama tha trotrohnine kö nyëne la hnei epon hna e, ngo tro lai a thue aja koi nyëne troa hane e tusi elany la nyën a tru.

Tha tro kö a mekune laka, tha ijine pala kö troa qeje Akötresieti koi nyën, ke medrenge petre kö. Ce thithi ju me nyën. (Deuteronomi 11:19) Hane ju qeje Akötresie koi nyëne la epun ha trenekön a ce elo. (Salamo 78:3, 4) Ame la nyën a tru trootro, tro nyëne lai a drenge laka tru la ihnim i epon koi Iehova, nge tro fe nyëne lai a hane inine troa hane hnimi Nyidrë.

NYINE KUCA:

• Sipone jë la inamacane ka ijij jëne la thith, matre atreine epon troa inine la neköi medreng

• Amexeje jë koi nyëne la itre hnaewekë me itre mekun ka nyipi ewekë, matre tro nyëne a hane nyiqaane ini nge co petre kö