MEKENE 06
Qaathei Drei La Mel?
Akötresie la qane la mel. (Salamo 36:9) Ka nyipici kö lai? Nyimutre la ka mekune laka, ame la mel, ke ka xulu xan. Nge maine eje hi lai, nga ka traqa xane së. Ngo maine Akötresie la qane la mel, haawe, nga hetre ka xupi së. a Ame ngöne la ini celë, tro epuni a öhne la hna qaja hnei Tusi Hmitrötr göne la qane la mel, nge pine nemen matre ijije hi tro sa mejiune kowe la hnene ej hna qaja.
1. Drei la ka xupe la hnengödrai?
Öni Tusi Hmitrötr: “Ngöne la qaan, hnei Akötresie hna xup la hnengödrai me ihnadro.” (Genese 1:1, MN) Önine la itre ka inamacane ka hape, hetre ka xupe la hnengödrai. Hnei Akötresieti hna xupe tune kaa? Hnei nyidrëti hna upe la “mene i nyidrë ka catr,” ene la uati hmitrötr, matre xupe la nöjei ewekë e koho hnengödrai: tune la itre wëtresij, me fini wëtresij, me itre planète.—Genese 1:2.
2. Hnauëne la Akötresieti a xupe la ihnadro?
Tha hnei Iehova kö hna xupe menune la ihnadro, ngo hnei “nyidëti hna xup’ eje mate lapan.” (Isaia 45:18) Hnei nyidrëti hna xupe la ihnadro matre tro la itre atr a mele ka loi uti hë epine palua. (E jë la Isaia 40:28; 42:5.) Kola jelenyipicine hnei sias ka hape, hna xupe la ihnadro matre tro la itre atr a mele ngön.
3. Nemene la eisapengönene la itre atr me itre öni?
Ame la Iehova a ase xupe la ihnadro, nyidrëti a xupe jë la nöjei pengöne hnitre me öni. E thupen, Akötresieti a xupe jë la “atr hnaiji [Nyidrë].” (E jë la Genese 1:27, MN.) Pine nemen matre ketrepengöne kö la atr? Pine laka, hna xupi së hnaiji Akötresie. Kolo lai a hape, hetrenyi the së la itre thiina i Nyidrë, tune la ihnim, me meköt. Hnei nyidrëti fe hna xupi së, fë la atreine matre troa inine la itre xaa qene hlapa, memine la aja the së troa elo miuzik me desë. Ngo ame pe, itre atr hmekuje hi la hna xup troa atrunyi Akötresie, ngo tha itre öni fe kö.
TROA CE ITHANATAN
La itre ewekë ka amamane ka hape, ame la mel, hna xup. Nge ame la hna qaja hnei Tusi Hmitrötr göne lai, ke ka nyipici. Tro fe sa ce wang la pengöi Akötresie jëne la itre thiina ka loi thene la atr.
4. Qaathei Akötresie la mel
Ame la ketre atr a nyitipune la aqane xupi ewekë i Akötresie, easa atrunyi angeic. Ngo drei pe la nyine troa atrun? Goeëne jë la VIDEO, nge ce ithanatane jë cahu hnying:
-
Nemene la itre ewekë hnei Iehova hna xup nge hna nyitipun hnei atr?
Ame la uma ke, ej a cil ke, hetre atre xup. Ngo drei la ka xupe la nöjei ewekë asë? E jë la Heberu 3:4, nge ce ithanatane jë cahu itre hnying:
-
Ame ngöne la itre ewekë hna xupe hnei Akötresie, nemene la hnei epuni hna hain?
-
Eö kö a mejiune laka, hetre atre xupe la hnengödrai? Pine nemen?
Atre fe hi epun?
Ame ngöne jw.org, tro epuni a öhne la itre itus, me itre video ngöne la götrane hna hape, “Évolution ou conception ?” me “Points de vue sur l’origine de la vie.”
“Kola cile la nöjei uma, ke hetre atre xup, ngo Akötresie la atre xupe la nöjei ewekë asë”
5. Ka nyipici la hna qaja hnei Tusi Hmitrötr
Ame ngöne Genese mekene 1, Tusi Hmitrötr a qaja ka hape, hnei Akötresie hna xupe la ihnadro me hamëne la mel. Nyipici kö? Maine ifejicatre? Goeëne jë la VIDEO, nge ce ithanatane jë cahu itre hnying:
-
Tusi Hmitrötre kö a qaja ka hape, ame la ihnadro memine la mel ke, hna xupe hi ngöne la 6 lao drai?
-
Ame koi epun, ka nyipici kö me meköt la hna qaja hnei Tusi Hmitrötr göne la aqane xupi ewekë i Akötresie? Pine nemen?
E jë la Genese 1:1, nge ithanatane jë cahu hnying:
-
Önine la itre atre ka inamacane ka hape, hetre atre xupe la hnengödrai. Ka ihmeku kö la hnei angatre hna qaja memine la hnei epuni hna e ngöne lai xötr?
Nyimutre la itre ka mekune laka, easë a fetra qa ngöne la itre öni. E jë la Genese 1:21, 25, 27, nge ce ithanatane jë cahu itre hnying:
-
Tusi Hmitrötre kö a qaja ka hape, ka fetra la atr qa ngöne ie? Maine pena, hnei Nyidrë hna xupe mekötine “thenge la isa pengö i angatr”?
6. Hna xupe ketrepengönëne kö la itre atr
Isapengöne kö la aqane xupi së hnei Iehova memine la itre öni. E jë la Genese 1:26, nge ce ithanatane jë cahu hnying:
-
Atreine hi së troa hnim me utipine la ketre atr. Pine laka, hna xupi së hnaiji Akötresie, nemene la itre thiina ka eje thei Nyidrë?
HNE SË HNA MAJEMINE DRENG: “Ame la itre hna qaja hnei Tusi Hmitrötr, ke itre ifejicatre.”
-
Nemene fe la mekuna i epun? Pine nemen?
HANE HI LA HNE SË HNA CE WANG
Hnei Iehova hna xupe la hnengödrai memine la nöjei ewekë ka mel.
Nyine Amekunën
-
Nemene la hnei Tusi Hmitrötr hna qaja göne la qaane la hnengödrai?
-
Ka fetra kö së qa ngöne la ketre öni me sinöe maine hna xupi së pena hnei Akötresie?
-
Pine nemen matre ketrepengöne kö la itre atr?
ITRE XAA NYINE WANG
Wange ju la itre ceitun ka jelenyipicine ka hape, hetre atre xup.
Goeëne ju la ketre kem a qejepengön kowe la nekö i nyidrë, la aqane xupi ewekë i Akötresie.
Ame la Évolution, ke ka ihmeku kö memine la hna qaja hnei Tusi Hmitrötr?
“ Dieu s’est-il servi de l’évolution pour créer les différentes formes de vie ? ” (Itus jw.org)
Nemene la mekuna ne la itre scientifique: hetre ka xup la mel maine ka fetra xan?
Cinq questions à se poser sur l’origine de la vie (boroshür)
You May Also Like
ITRE HNA HNYINGËNE LAPAAN
Epuni a Ini Tusi Hmitrötre Tune Kaa?
Hane hi cahu itre mekune ka troa sa la itre hna lapaa hnyingëne thel hnene la itre atr göi ini Tusi Hmitrötr.
