Ame la aja i Iehova, ke tro epuni a atre Nyidrë. Pine nemen? Pine laka, e tro epuni a thel troa atre hnyawa la pengöi Nyidrë, aqane ujë i Nyidrë, me aja i Nyidrë, tro hë epuni a hetre aja troa nyisinee i Nyidrë. Ngo hapeu, ijije kö tro sa hane nyisinee i Akötresie? (E jë la Salamo 25:14.) Tune kaa la aqane tro epuni a nyisinee i Iehova? Tusi Hmitrötr a sa la itre hnyinge cili, nge ej a qejepengöne la kepin matre ame la easë a nyisinee Iehova, ke ketre imelekeu ka ketrepengön.

1. Nemene la hnei Iehova hna ajane tro epuni a kuca?

“Easenyi Akötresieti jë, nge tro nyidrëti a easenyi koi nyipunie.” (Iakobo 4:8) Kola hapeu lai xötre cili? Iehova a ajane catrëne tro epuni a nyisinee i Nyidrë. Nyimutre la itre atre ka mekune ka hape, tha ijiji angatre fe kö troa hane nyisinee i Akötresie, ke tha öhnyi Nyidrëti kö hnei angatr. Ngo ame pe, e hnine la Tusi Hmitrötr, Iehova a amamane la pengöi Nyidrë ka aijijë së troa easenyi koi Nyidrë. Ame la easa e lapane la tusi Iehova koi së, ene la Tusi Hmitrötr, tro ha catrecatre la imelekeu së me Nyidrë, ngacama tha öhnyi Nyidrëti kö hne së.

2. Pine nemen matre pëkö ketre sinee ka ceitu me Iehova?

Pëkö ketre atr ka troa hnimi epun tui Iehova. Aja i Nyidrë tro epuni a madrin, nge tro epuni a sipo ixatua thei Nyidrë, ngöne la nöjei ijin epuni a aja ixatua. Ijije hi tro epuni a “nu asë [ . . . ] koi nyidrë la itre hnei nyipunieti hna hnehengazon, ke nyidrëti a meku nyipunie.” (1 Peteru 5:7) Aja i Iehova pala hi troa xatuan, me akeukawan, me drenge la itre sinee i Nyidrë.—E jë la Salamo 94:18, 19.

3. Nemene la itre nyine tro sa kuca matre tro sa nyisinee i Iehova?

Hnim asë hi Iehova la nöjei atr, “ngo hnim catrëne kö nyidrë la itre atr ka meköt.” (Ite Edomë 3:32, MN) Ame la troa nyisinee i Akötresie, loi e troa catre kuca la itre ewekë ka loi, me nuetrije la itre ewekë ka ngazo. Nyimutre la itre ka mekune ka hape, thatreine kö angatre trongëne la itre trepene meköti Iehova. Ame Iehova ka ihnim. Haawe, tru la aja i Nyidrë troa nyisineene la itre ka hnimi Nyidrë me amadrinë Nyidrë.—Salamo 147:11; Itre Huliwa 10:34, 35.

 TROA CE ITHANATAN

4. Aberahama la ketre sinee i Iehova

Tro sa atre la kola hape, troa nyisinee i Akötresie jëne la hna melën hnei Aberahama (hna hëne fe ka hape, Aberama). E jë la Genese 12:1-4. Nge ce ithanatane jë cahu itre hnying:

• Nemene la hnei Iehova hna upi Aberahama troa kuca?

• Nemene la hnei Iehova hna thingehnaeane koi angeic?

• Nemene la aqane ujë i Aberahama kowe la itre hnei Iehova hna qaja koi angeic?

5. Hetre hnei Iehova hna ajan troa kuca hnene la itre sinee i Nyidrë

Ketre ewekë hne së hna ajan troa kuca hnene la itre sinee së.

• Nemene fe la hnei epuni hna ajan troa kuca koi epun hnene la itre sinee i epun?

E jë la 1 Ioane 5:3, nge ce ithanatane jë cahu hnying:

• Nemene la hnei Iehova hna ajane thene la itre sinee Nyidrë?

Ame la troa drengethenge Iehova, kolo lai a hape, troa saze la itre aqane ujë së me itre thiina së ka ngazo. E jë la Isaia 48:17, 18, nge ce ithanatane jë cahu hnying:

• Pine nemene matre Iehova a sipone kowe la itre sinee i Nyidrë troa saze la itre aqane ujë ka ngazo?

 6. Itre hnei Iehova hna kuca kowe la itre sinee i Nyidrë

 HANE HI LA HNE SË HNA CE WANG

Iehova a ajan tro epuni a itre sinee i Nyidrë, nge tro kö Nyidrëti a xatua epun.

Nyine Amekunën

• Tune kaa la aqane xatuane Iehova la itre sinee i Nyidrë?

• Pine nemene matre aja i Iehova tro la itre sinee i Nyidrë a saze la itre aqane ujë i angatr?

• Ame koi epun, ka jole kö la hnei Iehova hna ajane kowe la itre sinee i Nyidrë? Pine nemen?