MEKENE 09

Tro La Thith a Acatrene La Imelekeu Epun Me Akötresie

AMELEN

Maine jë ame itre xaa ijin, epuni a ajan troa xatua epun. Aja i epuni kö troa sa la itre hnyinge i epun? Ajane kö epun troa akeukawanyi epun? Aja i epuni kö troa easenyi catr koi Iehova? Tro la thith a xatua epun ngöne la itre götrane cili. Tune kaa la aqane tro sa thith? Hapeu, Akötresieti kö a drenge la nöjei thithi asë? Nge nemene la nyine tro epuni a kuca matre tro Akötresie a drenge la itre thithi epun? Celë hi la hne së hna troa ce wang ngöne la mekene celë.

1. Drei la hne së hna troa thithi kow, nge göi nemen?

Hnei Iesu hna ini së ka hape, troa thithi koi Iehova hmekuj. Nge celë hi la hnei nyidrëti hna kuca. Öni nyidrë: “Haawe, thithi jë tune la: ‘Kakati fe e koho hnengödrai . . .’” (Mataio 6:9) Ame la easa thithi koi Iehova, easë hi lai a acatrene la imelekeu i easë me Nyidrë.

Ijije hi tro sa thithi koi Iehova göne la nöjei ewekë asë. Ngo eje hi, tro Akötresie a sa la itre thithi së, e ka ihmeku memine la aja i Nyidrë. “E hetre ewekë hne së hna sipon thenge la aja i [Akötresie], tro kö nyidrëti a drei së.” (1 Ioane 5:14) Hnei Iesu hna qaja la itre ewekë nyine tro sa thithi fë. (E jë la Mataio 6:9-13.) Ijije hi tro sa thith thatraqane la itre aja së, ngo tha tro pi kö sa thëthëhmin troa olene koi Akötresie la itre ewekë hnei Nyidrëti hna kuca koi së, nge sipo Nyidrëti jë fe troa xatuane la itre xan.

2. Tune kaa la aqane tro sa thith?

Tusi Hmitrötr a ithuecatre koi së “tro sa easeny koi Akötresie fë la hni ka nyipici me lapaun ka pexej.” (Heberu 10:22) Matre ame la easa thith, loi e troa tro qa kuhu hni së la itre hne së hna qaja. Ame la easa thith, ijije hi tro sa ithanata catr maine thithi thaup. Ngo loi e tro palahi sa thith cememine la metrötr. Ketre, ijije hi tro sa thith ngöne la nöjei ijin me nöjei götran.

3. Akötresieti a sa tune kaa la itre thithi së?

Nyimu aqan. Hnei Iehova hna hamëne la Trengewekë i Nyidrë, ene la Tusi Hmitrötr, matre troa sa la itre hnyinge së. E tro sa e la Trengewekë i Akötresie, tro hë ej a “ainamacanëne la ite wangadrapa [maine, ka pëkö hna atre].” (Salamo 19:7; e jë la Iakobo 1:5.) Ijije mina fe tro Iehova a atingetingëne la hni së, la easa ixelë memine la itre jol. Jëne la itre trejin, Iehova a sa la itre thithi së matre troa xatua së.

TROA CE ITHANATAN

Tro sa wange la itre thith hnei Akötresieti hna kapa, nge pine nemene matre ketre ixatua ka loi koi së la troa thith.

4. Hetre nyine tro sa kuca matre tro Akötresieti a drenge la itre thithi së

Nemene la nyine tro sa kuca matre tro Akötresieti a drenge la itre thithi së? Goeëne jë la VIDEO.

VIDEO: Akötresieti Kö a Drenge La Nöjei Thithi Asë?—Extrait (2:42)

Aja i Iehova tro sa thithi koi Nyidrë. E jë la Salamo 65:2, nge ce ithanatane jë cahu itre hnying:

Ame koi epun, aja i Akötresieti kö troa “drenge la itre thithi” epun? Pine nemen?

Maine tro Akötresieti a drenge la itre thithi së, loi e tro sa catre trongëne la itre hnei Nyidrëti hna amekötin. E jë la Mika 3:4 me 1 Peteru 3:12, nge ce ithanatane jë cahu hnying:

Nemene la nyine tro sa kuca matre tro Akötresieti a drenge la itre thithi së?

Ame la kola isi, kola isa thith matre troa ngaane la ketre. Ame koi epun, tro kö Akötresie a sa la itre thithi angatr?

5. Loi e tro sa thithi qa kuhu hni së

Alanyimu la itre atr ka e gufane la itre thith. Aja i Iehova kö tro sa thithi tun? E jë la Mataio 6:7, nge ce ithanatane jë cahu hnying:

Nemene la nyine tro sa kuca matre tha tro kö sa “qaja lapane la itre trengewekë ka cas” la easa thith?

E nöjei drai, pane mekune jë la itre ewekë ka loi ka traqa koi epun, e thupen, olene jë koi Iehova. E tro epuni a kuca tune lai e nöjei drai ngöne la ca wiik, tha tro hë epuni a e gufane la itre thithi epun.

Aja ne la kem tro la nekönatr a qaja la mekuna i nyën. Tui Iehova, aja i Nyidrë tro sa fe la hni së koi Nyidrë

6. Thith, ketre ahnahna qaathei Akötresie

Tune kaa la aqane tro la thith a hamë trengecatre koi së, ngöne la itre ijine loi maine ijine ngazo? Goeëne jë la VIDEO.

VIDEO: Tro La Thith a Xatua Së Troa Xomihnine La Ketre Itupath (1:32)

Tusi Hmitrötr a qaja ka hape, jëne la thith, tro ha tingetinge la hni së. E jë la Filipi 4:6, 7, nge ce ithanatane jë cahu itre hnying:

Tha tro kö la thith a apatrene la itre jole së, ngo tune kaa pe la aqane tro ej a xatua së?
Nemene la itre ewekë hnei epuni hna ajan troa thithi fë?

Atre fe hi epun?

Ame la hnaewekë “amen” ke kola hape “epi troa ej” maine “eje hi.” Tusi Hmitrötr a qaja ka hape, qane hë ekö, hnene la itre hlue i Akötresie hna qaja ka hape, “amen” la angatr a ase thith.—1 Aqane lapa ite joxu 16:36.

7. Xomi ijine jë troa thith

Ame itre xaa ijin, tru palaha hnei jole së matre thëthëhmine hë së troa thith. Tune kaa la aqane wangatrune Iesu la thith? E jë la Mataio 14:23 me Mareko 1:35, nge ce ithanatane jë cahu itre hnying:

Nemene la aqane kuca Iesu matre tro palahi nyidrëti a xomi ijine troa thith?
Eu la ijin hnei epuni hna mekun troa thith?

HNE SË HNA MAJEMINE DRENG: “Traqa ha la jol, kolo ha meku Akötresie.”

Nemene la aqane tro epuni a sa?

HANE HI LA HNE SË HNA CE WANG

Ame la easa thith qa kuhu hni së, ke kola acatrene la imelekeu së me Akötresie, kola hamë së la tingeting, me trengecatr, matre tro sa atreine amadrinë Iehova.