MEKENE 16
Nemene La Hnei Iesu Hna Kuca Lo Nyidrëti e Celë Fen?
Tru la itre atr ka mekun ka hape, ame Iesu, ke, ketre medreng. Ame koi itre xan, ke, ketre perofeta maine ketre atr hna axösisin. Ngo hapeu, hetre itre xaa ewekë kö hnei nyidrëti hna kuca e celë fen? Nyipici, nge tro sa ce wang ka hape, ka ketri epuni fe.
1. Nemene la huliwa ka sisitria koi Iesu?
Ame koi Iesu, ka sisitria troa “cainöjëne la itre maca ka lolo ne la Baselaia i Akötresie.” (E jë la Luka 4:43.) Ame la maca ka lolo cili hnei nyidrëti hna cainöjën, ke, ene la tro Akötresieti a acil la ketre Baselaia maine ketre musi pena ka troa aloine la mele ne la atr. a Nge köni macatre nge sin ne cainöjëne Iesu la maca cili, nge tha mano kö nyidrë.—Mataio 9:35.
2. Nemene la hna amamane hnene la itre iamamanyikeu i Iesu?
Tru catr hnei “itre iamamanyikeu, me itre huliwa nyine hain” hnei Tusi Hmitrötr hna qaja. (Itre Huliwa 2:22) Jëne la mene i Akötresie, hnei Iesu hna aupune la enyi memine la hnagejë, me thuane la itre atr ka alanyim, me aloine la itre ka wezipo, me amelene la itre ka meci hë. (Mataio 8:23-27; 14:15-21; Mareko 6:56; Luka 7:11-17) Kolo hi lai a amamane hnene la itre iamamanyikeu i Iesu ka hape, nyidrëti hi la hna up hnei Akötresie. Itre eje fe a amamane laka, Iehova hi la ka ijij troa hamëne koi së la mele ka loi.
3. Nemene la ini hne së hna troa xom qaathei Iesu?
Hnei Iesu palahi hna drengethenge Iehova. (E jë la Ioane 8:29.) Hnei Iesu palahi hna kuca la aja ne la Keme i nyidrë utihë la pun, ngacama catre la icilekeu. Nyidrëti hi lai a amamane ka hape, ijije hi tro la atr a nyihlue i Akötresie, ngacama tha ka hmaloi kö. Iesu hi lai “a amamai tulu koi [së] matre trongëne hnyawa la itre thupa ca i nyidrë.”—1 Peteru 2:21.
TROA CE ITHANATAN
Tro sa ce wang la aqane cainöjëne Iesu la maca ka lolo, me ce ithanatane la itre iamamanyikeu hnei nyidrë hna kuca.
4. Aqane cainöjëne Iesu la maca ka loi
Hnei Iesu hna trongëne la itre gojenyi ka nanyi me ka so, matre troa cainöjëne la maca ka loi kowe la itre atr. E jë la Luka 8:1, nge ce ithanatane jë cahu itre hnying:
-
Hapeu, hnei Iesu kö hna cainöje hmekuj kowe la itre atr ka traqa troa drei nyidrë?
-
Nemene la aqane kuca i nyidrë matre tro nyidrëti a iöhnyi memine la itre atr?
Ase hë Akötresie thingehnaean ka hape, tro la Mesia a cainöjëne la maca ka lolo. E jë la Isaia 61:1, 2, nge ce ithanatane jë cahu itre hnying:
-
Tune kaa la aqane eatrëne Iesu, la hna perofetane cili?
-
Ame koi epun, ka loi kö tro la itre atr enehila a dreng la maca ka lolo cili?
5. Ka nyipici la itre ini hnei Iesu hna hamën
Hnei Iesu hna cainöjëne la maca ka lolo ne la Baselaia i Akötresie. Ngo hnei nyidrëti fe hna hamëne la itre ini nyine troa trongën. Tro sa ce wange la itre xaa ceitune qaa hnine la cainöj Iesu hune la wetr. E jë la Mataio 6:14, 34 me 7:12, nge ce ithanatane jë cahu itre hnying:
-
Jëne la itre hnei Iesu hna qaja ngöne la itre xötre cili, nemen la itre ini nyine tro sa trongën?
-
Ame koi epun, ka nyipiewekë palahi itre ej enehila?
6. Hnei Iesu hna kuca la itre iamamanyikeu
Hnei Iehova hna aijijë Iesu troa kuca la itre iamamanyikeu ka nyimutre. Tro sa wang la ketre ceitun, e jë la Mareko 5:25-34 maine pena goeëne jë la VIDEO. Nge ce ithanatane jë cahu itre hnying.
-
Nemene la ka xecie hnyawa kowe la föe ka wezipo?
-
Nemene la ewekë ka ketri epun ngöne la iamamanyikeu cili?
E jë la Ioane 5:36, nge ce ithanatane jë cahu hnying:
-
Nemene la hna “anyipicine” hnene la itre iamamanyikeu i Iesu?
Atre fe hi epun?
Ame la itre hne së hna atre göi Iesu, ke, hna qaja ngöne lo 4 lao tus ngöne la Tusi Hmitrötr, lo hna hën ka hape, itre Evangelia—Mataio, Mareko, Luka, me Ioane. Isapengöne kö la itre ithuemacanyi hnei angatr hna hamën göi Iesu. Ngo ame la itre ithuemacanyi cili, ke, kola amamane hnyawane la mele i nyidrëti koi së.
-
MATAIO
la ka pane cinyihan. Angeice a qaja la itre ini Iesu göi Baselaia.
-
MAREKO
ka hopatre hi la itre hna cinyihane hnei angeic. Nyimutre catr la itre ewekë ka traqa koi Iesu hnei angeic hna qejepengön.
-
LUKA
a qejepengöne ka hape, ka nyipiewekë catr koi Iesu troa thith, nge ka loi thiina nyidrë kowe la itre föe.
-
IOANE
a qaja ka hape, hnei Iesu hna porotrik memine la itre sinee i nyidrë, me itre xaa atre ju kö. Nge angeice fe a qejepengöne hnyawa koi së la pengöi Iesu.
HNE SË HNA MAJEMINE DRENG: “Ame Iesu, ketre atr ka loi thiina hi.”
-
Nemene fe la mekuna i epun?
HANE HI LA HNE SË HNA CE WANG
Hnei Iesu hna cainöjëne la Baselaia i Akötresie, me kuca la itre iamamanyikeu, me drengethenge palahi la itre hnei Iehova hna qaja.
Nyine Amekunën
-
Nemene la huliwa ka sisitria hnei Iesu hna kuca e celë fen?
-
Nemene la hna amamane hnene la itre iamamanyikeu i Iesu?
-
Nemene la itre ini nyine troa trongën hnei Iesu hna hamën?
ITRE XAA NYINE WANG
Nemene la ewekë hnei Iesu hna qaja lapan?
“Le Royaume de Dieu : son importance pour Jésus” (Ita Ne Thup 1 Okotropa 2014)
Itre kepine matre easa jelenyipicine la itre iamamanyikeu i Iesu.
“Les miracles de Jésus : que vous enseignent-ils ?” (Ita Ne Thup 15 Julai 2004)
Hna saze la ketre trahmanyi la nyidrëti a goeëne la aqane ujë i Iesu kowe la itre xan.
Kola qaja xötrëne la itre ewekë ka ketr la mele i Iesu e celë fen.
a Ame la Mekene 31-33 ke, kola qejepengöne hnyawane la Baselaia i Akötresie.
You May Also Like
ITRE HNA HNYINGËNE LAPAAN
Epuni a Ini Tusi Hmitrötre Tune Kaa?
Hane hi cahu itre mekune ka troa sa la itre hna lapaa hnyingëne thel hnene la itre atr göi ini Tusi Hmitrötr.
