MEKENE 19

Itre Temoë Iehova Kö La Itre Nyipi Keresiano?

AMELEN

Ame kowe la itre Temoë Iehova, ke, angatre hi la itre nyipi keresiano. Pine nemen? Köni kepin: ka hetre qaane la itre ini hun, nge ame la ëje ne huni hna xom, ke, ka aisapengönë hun me itre xaa hmi. Nge ka hnime hun la itre xan.

1. Qa kaa la itre ini hna hamën hnene la itre Temoë Iehova?

Öni Iesu ka hape: “Trengewekë i [Akötresie] la nyipici.” (Ioane 17:17) Tui Iesu, ame la itre ini ne la itre Temoë Iehova, ke, qa ngöne la Tusi Hmitrötr. Tro sa ce wang la ketre ewekë ka traqa ngöne lo itre macatre 1870. Hnene la ketre gurup hna thel troa atrepengöne hnyawa la Tusi Hmitrötr. Nge hnei angatr hna xötrethenge la itre ini cili, ngacama tha hna trongëne kö hnene la itre xaa hmi. Nge, e thupen, angatr a qaja koi itre xan la itre ini ka nyipici qa ngöne la Tusi Hmitrötr. a

2. Pine nemen matre kola hë hun, itre Temoë Iehova?

Hnei Iehova hna hëne la itre ka hmi koi Nyidrë ka hape, itretre anyipicin (itre Temoë). Pine laka, angatr a qaja la nyipici göi Nyidrë. (Heberu 11:4–12:1) Tune ekö, hnei Nyidrë hna hëne la nöje i Nyidrë ka hape: “Itete anyipici ni.” (E jë la Isaia 43:10.) Hna hë Iesu ka hape, “Atre Anyipicin ka Nyipici.” (Hna Amaman 1:5) Celë hi matre, ame lo 1931 ke, hne huni hna xom la ëj, Itretre Anyipici Iehova (Temoë Iehova). Nge tha hmahma kö hun, tro huni a xom la ëje cili.

3. Hna nyitipune tune kaa la ihnimi Iesu hnene la itre Temoë Iehova?

Hnime catre Iesu la itretre drei nyidrë tune pi lo sipu fami nyidrë. (E jë la Mareko 3:35.) Ceitune hi lai memine la itre Temoë Iehova, fami ka cas ngöne la fene hnengödrai. Celë hi matre, eahuni a itö ihë ka hape, itre trejin, trahmanyi me föe. (Filemona 1, 2) Eahuni a drengethenge la hna qaja ka hape: “Hnime ju la lapa ne la itre trejin asë.” (1 Peteru 2:17) Nyimu aqane amamane la ihnimi cili hnene la itre Temoë Iehova, tune la eahuni a xatuane la itre trejin ka aja ixatua, ngacama isa nöje huni kö.

TROA CE ITHANATAN

Tro sa pane ce wang la pengöne la itre Temoë Iehova, memine la itre ka anyipicine ka hape, itre nyipi keresiano së.

Tusi Hmitrötr la ka nyitrepene la itre ini ne la itre nyipi keresiano, nge angatr a ce thawa me itre xan

4. Hna xom la itre ini së qa ngöne la Tusi Hmitrötr

Hnei Iehova hna qaja ekö ka hape, tro ha mama la itre nyipici qa ngöne la Tusi Hmitrötr. E jë la Daniela 12:4, nge ce ithanatane jë cahu hnying:

Nemene la ka troa mama kowe la itre hlue i Akötresie la angatr a troa inine la Tusi Hmitrötr?

Tro sa ce wang la aqane thel hnene la itre xaa atr ka tui Charles Russell, la aqane troa trotrohnine la Tusi Hmitrötr. Goeëne jë la VIDEO, nge ce ithanatane jë cahu hnying:

VIDEO: Mama Hnyawa Ha Koi Angatr La Nyipici Qa Ngöne Tusi Hmitrötr (7:45)

Tune kaa la aqane kuca Charles Russell memine la gurup i nyidrë, matre troa trotrohnine la Tusi Hmitrötr?

Atre fe hi epun?

Ame itre xa ijin, ke, hne huni hna saze la itre mekun hne huni hna öhn. Pine nemen? Akötresieti a amamane trongëne la Trengewekë i Nyidrë, tune la kola mama trootro la itre ewekë e hmakanyi la kola fetra la jö. (E jë la Ite Edomë 4:18.) Ngacama tha ka saze kö la Tusi Hmitrötr, ngo tro lai a mama trootro la itre mekun, nge tro huni a trotrohnine hnyawan ej.

5. Hetre metrötre hun kowe la ëj hne huni hna xom

Hnauëne laka, xome jë huni la ëj, Temoë Iehova? Goeëne jë la VIDEO, nge ce ithanatane jë cahu hnying:

VIDEO: Ketre Ëj Ka Hetre Aliene Koi Hun (2:40)

Hnauëne laka, ame la ëj Itretre Anyipici Iehova, ke, hna iëne hnyawan?

Pine nemene matre Iehova a up la itre atr troa anyipici Nyidrë? Pine laka, ame la itre atr cili, tro angatr a qaja la itre nyipici göi Akötresie, me qajaqaja la itre trengathoi hna qaja göi Nyidrë. Tro sa ce wang la lue xaa trengathoi.

Itre xaa hmi a qaja kowe la itre atr ka hape, ame la aqane troa thil koi Akötresie, ke, jëne la itre hnasaatr me itre iatr. E jë la Levitiko 26:1, nge ce ithanatane jë cahu itre hnying:

Nemene la hne së hna atre göne la itre ewekë hna thili kow hnene la itre atr? Nemene la mekuna i Iehova göne la itre ewekë cili?

Itre xaa hmi a qaja ka hape, ame Iesu ke, Akötresieti hi. E jë la Ioane 20:17, nge ce ithanatane jë cahu itre hnying:

Nyipici kö ka hape, casi hi Iesu me Akötresie?
Nemene fe la mekuna i epun la Iehova a upe la itretre anyipici Nyidrë troa cainöjëne la nyipici göi Nyidrë me göne la Nekö i Nyidrë?

6. Eahuni a ihnimikeu

Tusi Hmitrötr a aceitunëne la itre keresiano memine la itre hnepe ngönetrei ne la atr. E jë la 1 Korinito 12:25, 26, nge ce ithanatane jë cahu itre hnying:

Ame la kola akötr hnene la itre trejin me angatr, nemene la hna kuca hnene la itre nyipi keresiano?
Öhne kö epun la ihnimekeu thene la itre Temoë Iehova?

Ame la kola traqa la ketre jol kowe la itre Temoë Iehova ngöne la ketre nöj, canga nyimenyime hi traqa la ixatua kowe la itre sine hmi angatr. Goeëne jë la VIDEO. Nge ce ithanatane jë cahu hnying:

VIDEO: Matthew Ketre Enyi Ka Catr a Lepe Haïti (5:29)

Kola amamane tune kaa jëne la itre ixatua ne la Itre Temoë ka hape, ka ihnimi angatr?

Itre nyipi keresiano a xatuane la itre ka akötr

HNE SË HNA MAJEMINE DRENG: “Ame la itre Temoë Iehova, ke, hmi ka hnyipi traqa.”

Eu la kola xom hnene la itre Temoë Iehova la ëje cili?

HANE HI LA HNE SË HNA CE WANG

Itre Temoë Iehova la nyipi keresiano. Fami ka cas ngöne la fene hnengödrai. Hna xom la itre ini hun qa ngöne la Tusi Hmitrötr, nge eahuni a qaja kowe la itre atr la nyipici göi Iehova.