Ame Iehova ke Akötresie ka tha zikoziko kö. (1 Korinito 14:33) Matre tro fe a tune hnene la itre ka hmi koi Nyidrë. Hna nyitrepene tune kaa la ekalesia? Nge nemene la nyine troa kuca hnene la itre atren, matre tro ej a tro loi?

1. Drei la he ne la ekalesia?

‘Keriso la he ne la ekalesia.’ (Efeso 5:23) Nyidrëti a cilëne qa hnengödrai, la itre huliwa ne la itre hlue i Iehova ngöne la fene hnengödrai. Hnei nyidrëti hna acil “la hlue ka nyipici me ka inamacan”—ketre neköi gurup ne la itre qatre thup ka huliwa qane hë ekö nge hna hën ka hape, Lapa Ne Xomi Meköt. (E jë la Mataio 24:45-47.) Kola hamën hnene la Lapa Ne Xomi Meköt la itre ini kowe la itre ekalesia asë, tune lo hna kuca hnene lo itre aposetolo memine lo itre qatre thup e Ierusalema ekö. (Itre Huliwa 15:2) Ngo tha angatre kö la he ne la organizasio. Iehova memine la Trengewekë i Nyidrë, la ka tro xomi angatr, nge angatr a drengethenge la musi Iesu.

2. Nemene la hnëqa ne la itre qatre thup?

Ame la itre qatre thup ke itre keresiano ka macaj, angatr a inin me xatuan me thuecatren la itre atrene la ekalesia jëne la Tusi Hmitrötr. Ame la itre atre cili ke tha angatre kö a huliwa göi thupen. Ngo angatre pe a huliwa kowe la ekalesia “hnene la hni ka ajan qëmeke i Akötresie; nge tha tro kö a isine göi thupen, ngo tro pe a kuca qa kuhu hni.” (1 Peteru 5:1, 2) Angatr a ce huliwa memine la itre trejin ka ixatua, ka troa hane xome elany la hnëqa ne qatre thup.

Hnene la Lapa Ne Xomi Meköt hna acil la itre xaa qatre thup matre troa thupëne la sirkoskripsio. Hna upi angatr troa wange la itre ekalesia matre ithuecatre me hamëne la itre xaa ithuemacany. Angatr a acil la itre xaa qatre thup me itre ka ixatua, thenge la hna amekötin hnei Tusi Hmitrötr.—1 Timoteo 3:1-10, 12; Tito 1:5-9.

3. Nemene la hnëqa ne la Temoë?

Tro la itre atrene la ekalesia ‘a atrune la ëje i Iehova’ tune la troa hamë mekune ngöne la itre icasikeu, me tupath troa cainöje lapa.—E jë la Salamo 148:12, 13.

 TROA CE ITHANATAN

4. Ka thupëne hnyawa Iesu la ekalesia

Iesu a hë së koi nyidrë. E jë la Mataio 11:28-30, nge ce ithanatane jë la hnying:

• Ame la easa atre ka hape, Iesu la ka mus, nemene hë la thangane koi së?

5. Itre qatre thup a amamai tulu

1. Tro la itre qatre thup a acatrene la imelekeu i angatr me Iehova memine fe la fami angatr

2. Hnëqa ne la itre qatre thup troa wange la itre atrene la ekalesia

3.   Tro la itre qatre thup a catre cainöj

4. Itre qatre thup a cile fë la itre cainöj. Ngo tro fe angatr a nyihnyawane la Uma Ne Baselaia me kuca la itre xaa huliwa

6. Itre qatre thup a ajan tro sa xatua angatr

Tusi Hmitrötr a qejepengöne la kepin matre nyipiewekë tro sa trongëne la itre mekun hnene la itre qatre thup hna xom. E jë la Heberu 13:17, nge ce ithanatane jë cahu itre hnying:

• Tusi Hmitrötr a upi së troa idrengethenge me kapa la itre hna amekötin hnene la itre ka elemeken, ka meköti kö lai koi epun? Pine nemen?

E jë la Luka 16:10, nge ce ithanatane jë cahu hnying:

• Pine nemene matre nyipiewekë tro sa kapa la huliwa hna upi së hnene la itre qatre thup, ngacama tha ajane kö së?

 HANE HI LA HNE SË HNA CE WANG

Iesu la he ne la ekalesia. Itre qatre thup a kapa la musi qaathei nyidrë, nge aja së troa ce huliwa me angatr, ke angatr a xatua së me amamai tulu.

Nyine Amekunën

• Drei la he ne la ekalesia?

• Nemene la hnëqa ne la itre qatre thup?

• Nemene la hnëqa ne la Temoë Iehova?