Hnei Iesu hna inine la itretre drei nyidrë troa xome la bapataiso. (E jë la Mataio 28:19, 20.) Nemene la bapataiso? Nemene la nyine troa kuca matre traqa kow?

1. Nemene la bapataiso?

Ame la hnaewekë “bapataiso” ke hna xome qa ngöne la qene Geres kola hape “kola hetine.” Ame lo kola bapataiso Iesu, hna heti nyidrë ngöne la Ioridrano, nge “nyidrëti a elë qa hnine la tim.” (Mareko 1:9, 10) Matre tui Iesu, celë hi la aqane troa bapataison la itre nyipi keresiano, la troa heti angatr ngöne la tim.

2. Nemene la hna amamane hnene la bapataiso?

Ame la ka xomi bapataiso, angeic a amamane ka hape, ase hë angeic nue la mele i angeic koi Iehova. Nemene la nyine troa pane kuca? Troa isa qaja jëne la thith ka hape, kola ajan troa nyihlue i Iehova uti hë epin. Ke ame koi së, Nyidrëti hmekuje hi la hne së hna troa thili kow, nge tro sa kuca la aja i Nyidrë, ke ka nyipiewekë Nyidrë kowe la mele së. Easa iën troa sipu ‘xele së . . . me xötrethenge pala hi’ la itre ini memine la tulu i Iesu. (Mataio 16:24) Ame la ketre atr a nue la mele i angeic koi Iehova me bapataiso, kola kökötre trootro la imelekeu i angeic me Iehova me easenyi fe kowe la itre xaa hlue i Akötresie.

3. Nemene la nyine troa kuca qëmekene la bapataiso?

Qëmekene troa bapataiso, loi e troa pane inine troa atre Iehova matre troa lapaune koi Nyidrë. (E jë la Heberu 11:6.) Maine tro palahi a kökötre trootro la atrehmekun me lapaune i epun, tro fe lai a kökötr la ihnimi epun koi Iehova. Nge kola thue aja koi epun troa cainöj me melëne la itre wathebo i Nyidrë. (2 Timoteo 4:2; 1 Ioane 5:3) Nge ame la atr ka ‘trongëne la itre wathebo i Iehova me amadrinë Nyidrë,’ ijiji angeic troa nue la mele i angeic me bapataiso.—Kolose 1:9, 10. a

 TROA CE ITHANATAN

4. Ini koi së jëne la bapataiso Iesu

E jë la Mataio 3:13-17 matre wange la aqane bapataiso Iesu. Nge ce ithanatane jë cahu itre hnying:

• Hna bapataiso Iesu kö la nyidrëti a medreng?

• Tune kaa la aqane bapataiso Iesu? Hna xölaxölane kö la he i nyidrë hnei tim?

Ame la kola ase bapataiso Iesu hnei nyidrëti hna nyiqane kuca la huliwa hnei Akötresie hna upi nyidrë troa kuca. E jë la Luka 3:21-23 me Ioane 6:38, nge ce ithanatane jë cahu hnying:

• Thupene la hna bapataiso Iesu, nemene la huliwa hnei nyidrë hna amë panën?

5. Ijije hi troa bapataiso epun

Ame la epuni a nyiqane mekune troa nue la mele i epun me xome la bapataiso, kösë lo epuni a nango xou. Ngo ame hë la epuni a trotrohnin, epuni hi lai a atre ka hape, ka nyipiewekë nge hetre aja i epuni hë. Maine epuni a pi atre la hna kuca hnei itre xan, matre tha tro kö angatr a xou, goeëne jë la VIDEO.

E jë la Ioane 17:3 me Iakobo 1:5, nge ce ithanatane jë cahu hnying:

• Tro sa hnëkë tune kaa kowe la bapataiso?

1. Ame la easa nue la mele së koi Iehova, ke easa qaja koi Nyidrëti ka hape easa troa nyihlue i Nyidrë uti hë epin

2. Ame la bapataiso, ke kola amamane koi nöjei atr ka hape, ase hë së nue la mele së koi Iehova

 6. Bapataiso a aijijë së troa hane lö hnine la nöje i Iehova

Ame la easa bapataiso, easë fe hë a hane sine la fami ka caas ngöne la fene hnengödrai. Ngacama isa nöje së kö, ngo caasi hi la ini hne së hna kapa me xötrethenge. E jë la Salamo 25:14 me 1 Peteru 2:17, nge ce ithanatane jë cahu hnying:

• Nemene hë la thangane la bapataiso kowe la imelekeu i angeic me Iehova, me itre xaa hlue i Nyidrë?

  HANE HI LA HNE SË HNA CE WANG

Hnei Iesu hna amekötine kowe la itre keresiano troa bapataiso. Ngo loi e troa lapaune koi Iehova, me trongëne la itre hnei Nyidrë hna amekötin, me nue mel koi Nyidrë.

Nyine Amekunën

• Nemene la bapataiso, nge pine nemen matre nyipiewekë troa bapataiso?

• Pine nemen matre loi e tro sa nue la mele së koi Akötresie, me hane bapataiso?

• Nemene la itre nyine troa kuca, matre hane jë nue mel me xomi bapataiso hnene la ketre atr?