MEKENE 41
Mekuna i Tusi Hmitrötr Göi Troa Ce Meköle Trefën
Jole catr kowe la itre atr troa porotrikëne la ce meköle trefën. Ame pe, Tusi Hmitrötr a qaja hnyawane la pengöne la ce meköle trefën. Ame la hnene ej hna qaja göi ce meköle trefën ke, nyine loi koi së. Nge Iehova hi la ka ijije troa qejepengöne koi së, ke Nyidrëti la ka Xupi së. Ketre, atre hnyawa kö Nyidrë la ka loi koi së. Matre, e tro sa goeëne la ce meköle trefëne tui Iehova, tro hë së lai a atrunyi Nyidrë, nge tro fe sa hetrenyi la mel ka pë pun.
1. Tune kaa la aqane goeëne Iehova la ce meköl trefën?
Ame la ce meköle trefën ke, ketre ahnahna lai hnei Iehova hna hamëne kowe la itre ka faipoipo. Celë hi lai ka aijijëne la trahmanyi me föe, troa hetre nekönatr me amamane la ihnimi nyidro. Öni Tusi Hmitrötr: “Ce madinejë memine la föe ne thupëtesiji ’ö.” (Ite Edomë 5:18, 19) Ame la aja i Iehova, ke tro la itre ka faipoipo a inyipicikeu, nge tha tro kö a nyixetë.—E jë la Heberu 13:4.
2. Nemene la hnei Akötresieti hna sisin?
Öni Tusi Hmitrötr: “Ame la itretre kuci ngazo, . . . tha tro kö angatre lai a hane sine la Baselaia i Akötresie.” (1 Korinito 6:9, 10) Ame la kuci ngazo, ke kola qaja la ketre hnaewekë qene Geres hna hape, por·neiʹa. Ame la hnaewekë cili, ke kola qaja la (1) trahmanyi me föe ka ce meköl ngo tha ka faipoipo kö, a (2) kola ce meköl hnei lue trahmanyi maine lue föe pena, nge (3) kola ce meköl hnei atr me öni. Ame la ka “iananyi memine la kuci ngazo,” tro hë angeic lai a madrin, nge tro hë Iehova a kepe angeic.—1 Thesalonika 4:3.
TROA CE ITHANATAN
Tro sa ce wang la hna amekötine hnei Akötresie göi ce meköle trefën, me itre eloine koi së.
3. Kötrene pi la nöjei aqane kuci ngazo
Hnei Iosefa hna isine matre tha tro kö angeic a kei kowe la kuci ngazo. E jë la Genese 39:1-12, nge ce ithanatane jë cahu itre hnying:
-
Pine nemene matre Iosefa a kötrene la kuci ngazo?—Goeëne jë la xötre 9.
-
Ame koi epun, ka loi kö la mekuna i Iosefa? Pine nemen?
Tune kaa la aqane tro la itre jeunes a nyitipu Iosefa matre troa kötrene la kuci ngazo? Goeëne jë la VIDEO.
Iehova a ajane tro la itre hlue i Nyidrë a wië. E jë la 1 Korinito 6:18, nge ce ithanatane jë cahu itre hnying:
-
Hnauëne laka, kei pi la ketre atr koi kuci ngazo?
-
Tro epuni a kötrene tune kaa la nöjei aqane kuci ngazo?
4. Ijije hi troa kötrene la kuci ngazo
Loi e tro sa catr, matre tha tro kö sa kei kowe la kuci ngazo. Pine nemene matre tha ka hmaloi kö? Goeëne jë la VIDEO, nge ce ithanatane jë cahu hnying:
-
Nemene la hna kuca hnene la trejin matre tha tro kö angeic a kei kowe la kuci ngazo?
Ngacama ka nyihlue i Iehova ju hë së, ngo loi e tro sa isin troa lepetrije la itre mekune ka ngazo. Nemene la nyine tro sa kuca matre patre pi la itre mekune ka ngazo qa ngöne la he së? E jë la Filipi 4:8, nge ce ithanatane jë cahu itre hnying:
-
Nemene la itre ewekë nyine tro sa lapa mekun?
-
Pine nemene matre ame la easa e la Tusi Hmitrötr me huliwa catre koi Iehova, ke celë hi ixatua matre tha tro kö sa kei?
5. Hnei Iehova hna acile la itre trepene meköt nyine loi koi së
Atre kö Iehova la itre ewekë ka loi koi së. Nyidrëti a qejepengöne koi së la nyine tro sa kuca matre tro sa thiina ka wië, me kapa la itre thangane ka loi. E jë la Ite Edomë 7:7-27 maine goeëne jë la VIDEO, nge ce ithanatane jë cahu itre hnying:
-
Hnauëne laka, traqa pi la jol kowe la nekö trahmany?—Wange ju la Ite Edomë 7:8, 9.
-
Kola qaja ngöne Ite Edomë 7:23, 26 ka hape, hetre thangane la troa kuci ngazo. Nemene la thangane e tro palahi a wië la itre thiina së?
-
Pine nemene matre ame la troa thiina ka wië, ke kola aijijë së troa hetrenyi la mele ka pë pun?
Kola mekune hnene la lue trahmanyi maine lue föe ka ce lapa ka hape, Tusi Hmitrötr a wathebo angatr troa ihnim. Ame Iehova, ke ka ihnim, nge Nyidrëti a ajane tro la itre atr a hetrenyi la mel ka pë pun. Maine angatr a ajane troa hetrenyi la mel, loi e tro angatr a trongëne la itre trepene meköti Iehova. E jë la 1 Korinito 6:9-11, nge ce ithanatane jë cahu hnying:
-
Ame la troa ce lapa hnei lue trahmanyi maine lue föe, ke eje casi hi lai hnei Iehova hna sisin?
Loi e tro sa ujë qa ngöne la itre thiina së ka ngazo, matre kepe së hnei Akötresie. Tro kö lai a hetre thangane ka loi koi së? E jë la Salamo 19:8, 11, nge ce ithanatane jë cahu itre hnying:
-
Ame koi epun, ka meköti kö la itre trepene meköti Iehova? Hnauëne la epuni a mekune tun?
Tune la aqane xatuane la itre xan hnei Iehova, ijije fe hi tro Nyidrëti a xatua epun troa saze
HNE SË HNA MAJEMINE DRENG: “E ka ihnim la lue atr, nemene la engazon e tro nyidroti a ce lapa?”
-
Tro epuni a sa tune kaa?
HANE HI LA HNE SË HNA CE WANG
Ame la troa ce meköle trefën ke, ahnahna lai hnei Iehova hna hamëne koi itre ka faipoipo.
Nyine Amekunën
-
Thenge la Tusi Hmitrötr, nemene la kuci ngazo?
-
Nemene la ka troa xatua së troa kötrene la kuci ngazo?
-
Nemene la eloin e tro sa trongëne la itre trepene meköti Iehova?
ITRE XAA NYINE WANG
Itre kepine matre aja i Iehova tro la trahmanyi me föe ka ce lapa a faipoipo.
“Vivre en couple sans être mariés : Qu’en dit la Bible ?” (Itus jw.org)
Pine nemene matre tha Tusi Hmitrötre kö a axouene la itre atr la kola qaja ka hape, tha tro kö a ce lapa la lue föe maine lue trahmany.
Pine nemene matre ame la itre wathebo i Akötresie göi troa ce meköle trefën, ke nyine thupë së?
“Les relations buccogénitales sont-elles vraiment des relations sexuelles ?” (Itus jw.org)
Saze hë la ketre trahmany ka ce lapa me ketre trahmany. Ngöne la hna melën “Ils ont respecté ma dignité.”
a Ame fe la kuci ngazo ke, kolo fe a qaja la troa huliwane la ka hmitrötr jëne la që, me huliwane la ka hmitrötr jëne hutrö, me huliwane menune la ka hmitrötr.
You May Also Like
ITRE HNA HNYINGËNE LAPAAN
Epuni a Ini Tusi Hmitrötre Tune Kaa?
Hane hi cahu itre mekune ka troa sa la itre hna lapaa hnyingëne thel hnene la itre atr göi ini Tusi Hmitrötr.
