MEKENE 47
Ijiji Epuni Hë Troa Bapataiso?
Jëne la ini Tusi epun, tru hë la hnei epuni hna atre göi Iehova. Nge saze hë la mele i epun, ke epuni a kuca la aja i Nyidrë. Ngo maine jë, hetre ewekë palakö ka ajolë epun troa nue la mele i epuni koi Iehova, me bapataiso. Tro la mekene celë a amamane la itre jole hna ixelë memine hnene la itre xaa ka ini Tus, memine fe la aqane troa elë hune itre ej.
1. Tro kö sa inin asë la Tusi Hmitrötr matre bapataiso?
Qëmekene tro epuni a bapataiso, loi e tro epuni a “atrehmekune hnyawa la nyipici.” (1 Timoteo 2:4) Tha kolo kö lai a hape, atre asë hë epuni la Tusi Hmitrötr, ke ame la itre keresiano hna bapataison hë qane ekö, angatre palahi a inine la Tusi Hmitrötr. (Kolose 1:9, 10) Ame la ka nyipiewekë, tro epuni a atre la itre mekune ka tru, qa hnine la Tusi Hmitrötr. Tro pë hë la itre qatre thup ne la ekalesia, a ce wang me epun la itre hnei epuni hë hna atre.
2. Nemene la itre hnei epuni hna troa kuca qëmekene troa bapataiso?
Qëmekene tro epuni a bapataiso, loi e tro epuni a pane “ietra . . . me ujë.” (E jë la Itre Huliwa 3:19.) Kolo lai a hape, tro epuni a ujë qa ngöne la itre huliwa ka ngazo hnei epuni hna kuca, me sipo Iehova troa senge trije la itre ngazo i epun. Loi e tro fe epuni a nuetrij la itre aqane ujë ka ngazo i epuni ekö, me mele thenge la aja i Iehova. Ketre, ngacama tha hna bapataiso epuni palakö, loi e tro fe epuni a hane sine la itre huliwa ne la ekalesia, tune la troa sine la itre icasikeu, me cainöjëne la maca ka loi.
3. Hnauëne laka, tha tro kö epuni a xou?
Ame la itre xan, angatr a xou wanga thoi jë angatr koi Iehova, me tha nyipici kowe la hnei angatr hna sisiny. Nyipici, tro fe epuni a hane tria e ketre ijin. Ketre mina fe, ame e hnine la Tusi Hmitrötr, hetrenyi la itre hlue i Iehova ka hane tria. Atre hi Iehova laka, tha itre ka pexeje kö epun. (E jë la Salamo 103:13, 14.) Ame la aja i Nyidrë, ke tro epuni a kuca la hnei epuni hna atrein! Tro kö Iehova a xatua epun. Nge öni Tusi Hmitrötr, pëkö ketre ewekë ka “troa thepe së qa ngöne la ihnimi Akötresie.”—E jë la Roma 8:38, 39.
TROA CE ITHANATAN
Tro sa ce wang ka hape, e tro epuni a atre Iehova hnyawa, me kapa la ixatua i Nyidrë, tha tro hë epuni a xou troa bapataiso.
4. Thele jë troa atre Iehova hnyawa
Hnauëne laka, nyipiewekë tro epuni a atre Iehova hnyawa qëmekene troa bapataiso? Ke celë hi lai ka troa akökötrene la ihnimi epuni koi Nyidrë, me upi epun troa amadrinë Nyidrë. Goeëne jë la VIDEO göne la aqane kuca hnene la itre xaa ka ini Tus. Nge ce ithanatane jë cahu hnying:
-
Nemene la hna kuca hnene la itre trejin qëmeken troa bapataiso?
E jë la Roma 12:2, nge ce ithanatane jë cahu itre hnying:
-
Epuni kö a lueluëne la hnei Tusi Hmitrötr hna qaja? Maine pena, epuni a hnying ka hape, ka nyipici kö la itre ini hna hamëne hnene la itre Temoë Iehova?
-
Maine eje hi lai, nemene la nyine tro epuni a kuca?
5. Elë hune jë la itre jol
Ame hë la easa mekune troa bapataiso, kolo ha traqa la itre jol. Maine epuni a ajane troa atre la ketre tulu, goeëne jë la VIDEO, nge ce ithanatane jë cahu itre hnying:
-
Nemene la itre jol ka traqa koi Narangerel?
-
Hnei angeic hna amamane tune kaa ka hape, tru catre kö la ihnimi angeic koi Iehova?
E jë la Ite Edomë 29:25 me 2 Timoteo 1:7, nge ce ithanatane jë cahu hnying:
-
Nemene la ka hamë trengecatre koi së matre elë hune la itre jol?
6. Mejiune jë koi Iehova
Tro kö Iehova a xatua epun troa kuca la aja i Nyidrë. Goeëne jë la VIDEO, nge ce ithanatane jë cahu itre hnying:
-
Nemene la ka ajolëne la ka ini Tus troa bapataiso?
-
Nemene la ka xatua angeic troa mejiune koi Iehova?
E jë la Isaia 41:10, 13, nge ce ithanatane jë cahu hnying:
-
Pine nemene matre tha tro kö epuni a luelu troa bapataiso?
7. Wangatrune jë la aqane hnimi epun hnei Iehova
Maine tro epuni a mekune hnyawa la aqane hnimi epun hnei Iehova, tro hë epuni lai a olene koi Nyidrë, me nyihlue i Nyidrë uti hë epin. E jë la Salamo 40:5, nge ce ithanatane jë cahu hnying:
-
Nemene la itre manathith qaathei Iehova hnei epuni hna ajan?
Tru catre la ihnimi Ieremia koi Iehova, me kowe la trengewekë i Nyidrë. Nge hnei angeic hna olene koi Iehova la hna aijijë angeic troa hane xome la ëje i Nyidrë. Matre öni Ieremia: “Eni a madrine me madrine atraqatr hnene la trengewekë i nyipë, nge hna hane aijijë ni troa xome la ëje i nyipë, Iehova Akötresie.” (Ieremia 15:16, MN) Ce ithanatane jë cahu itre hnying:
-
Hnauëne laka, ketre manathithi ka tru la troa xome la ëj, Temoë Iehova?
-
Aja i epuni kö troa bapataiso matre tro epuni a Temoë Iehova?
-
Hetre ka ajolë epuni kö troa bapataiso?
-
Nemene la nyine tro epuni a kuca matre hane jë epuni bapataiso?
HNE SË HNA MAJEMINE DRENG: “Tro hi ni a ini Tus. Ngo tha tro kö ni a hane bapataiso.”
-
Hapeu, epuni kö a hane mekune tune lai?
HANE HI LA HNE SË HNA CE WANG
Jëne la ixatua i Iehova, ijije hi tro epuni a elë hune la itre jol matre bapataiso.
Nyine Amekunën
-
Tro kö epuni a atre asë la Tusi Hmitrötr matre bapataiso jë?
-
Nemene la itre xaa ewekë nyine tro epuni a saze qëmekene troa bapataiso?
-
Hnauëne laka, tha tro kö epuni a xou?
ITRE XAA NYINE WANG
Nemene la ka troa upi epun troa bapataiso?
Nemene la nyine troa kuca matre tha tro kö a ajolë së troa bapataiso?
“Nemene La Ka Ajolë Ni Troa Xomi Bapataiso?” (Ita Ne Thup Maac 2019)
Nemene la ka ajolëne la ketre trahmany troa bapataiso?
Pëhë ka ajolëne la ketre trahmany troa bapataiso.
You May Also Like
ITRE HNA HNYINGËNE LAPAAN
Epuni a Ini Tusi Hmitrötre Tune Kaa?
Hane hi cahu itre mekune ka troa sa la itre hna lapaa hnyingëne thel hnene la itre atr göi ini Tusi Hmitrötr.
