Ketre ahnahna ka mingöming qaathei Iehova la troa ithanata. Aja i Nyidrë tro sa huliwane hnyawane la thineme së. (E jë la Iakobo 1:26.) Tro sa ce wang la aqane tro sa atrunyi Iehova, jëne la aqane ithanata së.

1. Tune kaa la aqane tro sa huliwane hnyawane la thineme së?

Öni Tusi Hmitrötr: “The mano kö ithuecatrekeu me itö ixatua.” (1 Thesalonika 5:11) Hetre atre kö ka kucakuca hnei epuni hna atre? Tro epuni a ithuecatre tune kaa koi angeic? Ijije hi tro epuni a qaja ka hape, ka tru catre angeic koi epun, nge epuni a meku angeic. Hetre xötre kö hnei epuni hna atre göi troa ithuecatr? Ma hetrenyi hi lai! Ngo ame la ka nyipiewekë catre ke, tha ene kö la itre hnei epuni hna troa qaja, ngo la aqane hamëne epun la itre trenge ithanata. Celë hi matre, loi e tro epuni a ithanata cememine la menyik me ihnim.—Ite Edomë 15:1.

2. Nemene la itre trengewekë nyine troa thipetrije hnene la keresiano?

Öni Tusi Hmitrötr: “The nue kö la itre trengewekë ka pi troa tro qa ngöne la itre që i nyipunie.” (E jë la Efeso 4:29.) Haawe, tha tro kö sa qaja la itre trengewekë ka sis, nge ka iakötrë. Ketre, loi e tro fe sa nuetrije la iqej, me ixöjetrij, me troa silitrengathoi ketre.​—E jë la Ite Edomë 16:28.

3. Tro sa öhne ekaa la itre trengewekë ka iakeukawany?

Ame la itre hne së hna qaja ke, kolo lai a tro qa ngöne la mekun me hni së. (Luka 6:45) Celë hi matre nyipiewekë tro sa mekune lapane la nöjei ewekë “ka meköt, ka wië, ka aciane la ihnim, me hna qaja aloin.” (Filipi 4:8) Ketre mina fe, loi e tro sa iëne hnyawane la itre nyine iamadrinë, me itre sinatronge së. (Ite Edomë 13:20) Ketre, qëmekene tro sa ithanata, loi e tro sa pane mekune hnyawa la itre hne së hna troa qaja, memine fe la thangane koi itre xan. Öni Tusi Hmitrötr: “Hete [trenge] ewekë kösë hna thine hnei taua; ngo nyine ameune la [që] ne la ate ka inamacan.”​—Ite Edomë 12:18.

 TROA CE ITHANATAN

4. Tro sa xomehnöthe tune kaa la thineme së?

Hne së asë hi hna tria la easa ithanata, nge ame e thupen, easa mekune ka hape, nango catre palaha la aqane ithanata së. (Iakobo 3:2) E jë la Galatia 5:22, 23, nge ce ithanatane jë cahu itre hnying:

• Nemene la itre thiina nyine tro epuni a sipo Iehova, matre xatua epun troa xomehnöthe la thineme i epun? Ngöne nemene ijine tro epuni a amamane la itre thiina cili? Pine nemen?

E jë la 1 Korinito 15:33, nge ce ithanatane jë cahu hnying:

• E tro epun a lapa goeëne la itre nyine iamadrinë ka ngazo me ce tro memine la itre sinatro ka ngazo, nemene ju hë la thangane ngöne la aqane ithanata i epun?

E jë la Ate Cainöj 3:1, 7, nge ce ithanatane jë cahu hnying:

• Eu la ijine troa ithanata maine lapa thaup?

 5. Qaja aloine jë la itre xan

6. Ithanata hnyawa jë kowe la itre atrene la fami epun

 HANE HI LA HNE SË HNA CE WANG

Ame la itre trengewekë ke, ka hetre thangane catr. Matre loi e tro sa pane mekune hnyawa la nyine tro sa qaja, memine la ijin, me aqane tro sa qaja.

Nyine Amekunën

• Qaja jë la itre aqane tro sa huliwane hnyawane la thineme së.

• Nemene la itre trengewekë nyine tro epuni a thipetrij?

• Nemene la ka troa xatua epun troa qaja la itre trengewekë ka iakeukawany?