Isapengöne kö la aqane heetr, me iseji së. Ijije hi tro la itre trepene meköt ne la Tusi Hmitrötr a xatua së troa iëne hnyawane la itre iheetr me aqane iseji së, matre amadrinë Iehova. Tro sa ce wang la itre xaa trepene meköt.

1. Nemene la itre trepene meköt ka troa xatua së göi aqane troa heetr?

Öni Tusi Hmitrötr, loi e troa “heetre hnyawa” nge troa mama “la metrötr me atreine tulu ewekë.” Ketre, loi e tro mina fe a mama ngöne la aqane heetre së ka hape, itre “ka nyihlue i Akötresie” së. (1 Timoteo 2:9, 10) Tro sa ce wang la aqane tro sa trongën la trepene meköt e caha: (1) Troa “heetre hnyawa.” Tune lo hne së hna ce wang, ame la itre hlue i Iehova ke, isapengöne kö la aqane heetre me iseji angatr. Ngo ame la ka nyipiewekë koi angatr ke, troa iëne la iheetr me aqane isej, ka troa atrunyi Iehova Akötresie. (2) Ame la troa “metrötr” ke, tha tro kö a heetre qenahmo göne hi matre troa goeë së hnei itre xan. (3) Ame la troa “atreine tulu ewekë” ke, tro lai a xatua së matre tha tro kö sa xome la itre aqane heetr me iseji ne la fen. (4) Loi e troa mama ngöne la aqane heetre me iseji së ka hape, itre “ka nyihlue i Akötresie” së, nge easa ajane troa ‘atrunyi Nyidrë.’​—1 Korinito 10:31.

2. Tune kaa la aqane goeë së hnene la itre trejin ngöne la aqane heetre së?

Ngacama, isa qanyi së kö iëne la aqane tro sa heetr, ngo loi e tro sa mekune la aqane goeë së hnei itre xan. Ketre, tha tro pi kö sa athixötrëne la ketre e angatr. Loi e tro pe sa isine troa “amadrinëne la atre lapa easenyi së, matre aegöcatrenyi angeic.”​—E jë la Roma 15:1, 2.

3. Tro la aqane heetre së a thue aja tune kaa koi itre xan troa hane kapa la hmi Iehova?

Nyipiewekë tro sa thupëne la aqane heetre së, ngöne la easa sine la itre icasikeu, me ngöne la easa cainöj. Tha easë kö a troa amamai hnaheetr, ngo ene pe la maca hne së hna tro fë. Nge loi e tro la hnaheetre së a ihmeku memine la maca hne së hna tro fë, matre “amamane la emingömingöne la ini qaathei Akötresie.”​—Tito 2:10.

 TROA CE ITHANATAN

4. Loi e tro la hnaheetre me aqane iseji së a atrunyi Iehova

Nemene la ka upi së troa thupëne la aqane tro sa heetr me isej? E jë la Salamo 47:2, nge ce ithanatane jë cahu itre hnying:

• Easa xome la ëje i Iehova. Tro lai a mama tune kaa ngöne la aqane heetre së?

• Ame koi epun, ka nyipiewekë kö tro sa heetr, me iseji hnyawa, ngöne la easa sine la itre icasikeu me tro fë la maca ka loi? Hnauëne la epuni a qaja tun?

 5. Itre trepene meköt ka troa xatua së

Goeëne jë la VIDEO.

Tha ka nyipiewekë kö la itre iheetre ka tru thupen. Loi e tro pe a heetrë ka porop, nge ka ihmeku memine la huliwa hne së hna kuca. E jë la 1 Korinito 10:24 me 1 Timoteo 2:9, 10. E thupen, qaja jë la kepin matre tha easë kö a amë la itre iheetr . . .

• ka ifificany, ka isosony me heetre qenahmo.

• ka hmelele, ka amamai ngönetrei.

Ngacama tha itre keresiano hmaca kö fene la wathebo i Mose, ngo eje pe a xatua së troa trotrohnine la aqane waiewekë i Iehova. E jë la Deuteronomi 22:5, nge ce ithanatane jë cahu hnying:

• Hnauëne laka, tha tro kö la itre trahmanyi a heetr, me iseji tui itre föe? Nge ketre tui itre föe?

E jë la 1 Korinito 10:32, 33 me 1 Ioane 2:15, 16, nge ce ithanatane jë cahu itre hnying:

• Pine nemene matre tha tro kö sa athixötrëne la itre trejine ne la ekalesia hnene la aqane heetre me iseji së?

• Tune kaa la aqane heetre ne la itre atr ngöne la nöje i epun?

• Ame koi epun, ijije kö troa hane heetre tun hnene la itre keresiano? Pine nemen?

 HANE HI LA HNE SË HNA CE WANG

Ame la easa heetr me iseji hnyawa, easa hi lai a atrunyi Iehova me metrötrëne la itre xan.

Nyine Amekunën

• Pine nemene matre ka nyipiewekë koi Iehova la tro sa heetr me iseji hnyawa?

• Qaja jë la itre xaa trepene meköt qa hnine la Tusi Hmitrötr, ka troa xatua së troa heetr me iseji hnyawa?

• Nemene la aqane tro la itre xan a goeën la hmi së, e tro sa heetr me iseji hnyawa?