Iesu la He ne la ekalesia. (Efeso 5:23) Ame enehila, Iesu a iujine qa hnengödrai la itretre drei nyidrë e celë fen, jëne la “hlue ka nyipici me ka inamacan.” (E jë la Mataio 24:45.) Iesu la ka acile la “hlue” cili. Ketre, hnei Iesu hna aijijëne la hlue cili troa mus thenge la itre hna amekötine hnei nyidrë. Nge ame la hnëqa ne la hlue ke, troa huliwa kowe la itre trejine me Keriso. Drei jë la hlue cili? Nge ej a thupë së tune kaa?

1. Drei la “hlue ka nyipici me ka inamacan”?

Hnei Iehova palahi hna huliwane la ketre atr, maine ketre gurup, matre troa elemekene la nöje i Nyidrë. (Malaki 2:7; Heberu 1:1) Thupene la meci Iesu, itre aposetolo me itre qatre thup ne Ierusalema ekö, la ka elemeken la ekalesia. (Itre Huliwa 15:2) Ame enehila ke, ketre neköi gurup ne qatre thup, ene la Lapa Ne Xomi Meköt Ne La Itre Temoë Iehova, la ka thawa la xen me cilë meken la huliwa ne cainöj. Ame la neköi gurupe cili ke, kolo hi lo “hlue ka nyipici me ka inamacan, lo hna acile [hnei Iesu].” (Mataio 24:45a) Ame la itre atrene la Lapa Ne Xomi Meköt ke, itre keresiano hna iën hnei uati hmitrötr. Nge e traqa jë angatr meci elany, tru la madrine i angatr troa ce musi me Keriso ngöne la Baselaia i nyidrë e hnengödrai.

2. Nemene xen hna thawa hnene la “hlue”?

Öni Iesu lo ka hape, tro “la hlue ka nyipici me ka inamacan” a “hamë xeni ngöne la nyipi ijin [kowe la itre keresiano].” (Mataio 24:45b) Ame la easa xen ke, easa egöcatr, nge lolo la ngönetrei së. Tune fe hi la xen qaathei Iehova, ene la itre ini hna nyitrepene qa hnine la Tusi Hmitrötr. Ej a hamë trengecatre së, matre tro sa mele nyipici koi Iehova, me eatrëne la hnëqa së qaathei Iesu. (1 Timoteo 4:6) Easa kapa la xeni cili, jëne la itre icasikeu, me itre asabele, me itre itusi së, me itre video hna nyitrepene hnei Tusi Hmitrötr. Tro itre eje lai a xatua së troa trotrohnine la aja i Akötresie, me acatrene la imelekeu së me Nyidrë.

 TROA CE ITHANATAN

3. Loi e troa eköthe la nöje i Iehova

Iesu la ka elemeken la Lapa Ne Xomi Meköt, matre tro ej a eköthe la itre huliwa ne la itre Temoë Iehova. Nge hnei nyidrë hna kuca tune ekö, ngöne lo hneijin ne la itre pane keresiano. Goeëne jë la VIDEO.

E jë la 1 Korinito 14:33, 40, nge ce ithanatane jë cahu hnying:

• Thenge la lue xötr, hnauëne laka tha ka zikoziko kö la nöje i Iehova?

4. Hlue ka nyipici me ka inamacane la ka cilën la huliwa ne cainöj

Ka nyipiewekë la huliwa ne cainöje kowe la itre pane keresiano ekö. E jë la Itre Huliwa 8:14, 25, nge ce ithanatane jë cahu itre hnying:

• Drei la ka cilëne la huliwa ne cainöj thene la itre pane keresiano ekö?

• Tune kaa Peteru me Ioane lo nyidroti a kapa la itre hna amekötine ka hnyipixe qaathene la itre aposetolo?

Ame la huliwa ne cainöj ke, hna eköthe hnyawa hnene la Lapa Ne Xomi Meköt. Goeëne jë la VIDEO.

 Öni Iesu ka hape, ka nyipiewekë catr la huliwa ne cainöj. E jë la Mareko 13:10, nge ce ithanatane jë cahu itre hnying:

• Pine nemene matre ka nyipiewekë la huliwa ne cainöj kowe la Lapa Ne Xomi Meköt?

• Hnauëne laka, loi e tro la “hlue ka nyipici me ka inamacan,” a eköthe hnyawa la huliwa ne cainöj ngöne la fene hnengödrai?

5. Hlue ka nyipici me ka inamacane a hamëne la itre hna amekötin

Lapa Ne Xomi Meköt a hamëne la itre hna amekötin, kowe la itre keresiano ngöne la fene hnengödrai. Nemene la aqane kuca i angatr troa xomi mekun? Tro sa ce wang la aqane kuca hnene la Lapa Ne Xomi Meköt ekö, ngöne lo hneijine ne la itre pane keresiano. E jë la Itre Huliwa 15:1, 2, nge ce ithanatane jë cahu itre hnying:

• Nemene la mekune ka aisane la itre pane keresiano ekö?

• Hnei Paulo, Banaba, me itre xan, hna thele ixatua thei drei?

E jë la Itre Huliwa 15:12-18, 23-29, nge ce ithanatane jë cahu hnying:

• Nemene la hna kuca hnene la Lapa Ne Xomi Meköt, matre troa atre la mekuna i Akötresie?​—Goeëne ju lai xötre 12, 15, me 28.

E jë la Itre Huliwa 15:30, 31 me 16:4, 5, nge ce ithanatane jë cahu itre hnying:

• Tune kaa la aqane kapa hnene la itre keresiano la itre hna amekötine hnene la Lapa Ne Xomi Meköt?

• Tune kaa la aqane amanathithine Iehova la idrengethenge i angatr?

E jë la 2 Timoteo 3:16 me Iakobo 1:5, nge ce ithanatane jë cahu hnying:

• Ame fe enehila, tro la Lapa Ne Xomi Meköt a xomi mekune qa kaa?

 HANE HI LA HNE SË HNA CE WANG

Ame la Lapa Ne Xomi Meköt ke, angatre hi “la hlue ka nyipici me ka inamacane” hna acile hnei Iesu. Angatr a hamëne la itre hna amekötin, me thawa la xen kowe la itre keresiano ngöne la fene hnengödrai.

Nyine Amekunën

• Drei la ka acile la “hlue ka nyipici me ka inamacan”?

• Tune kaa la aqane thupë së hnene la Lapa Ne Xomi Meköt?

• Epuni kö a jelenyipicine ka hape, ame la Lapa Ne Xomi Meköt ke, kolo hi lo “hlue ka nyipici me ka inamacan”?