Ngacama ka hnimi Iehova ju hë së nge easa isine troa amadrinë Nyidrë, ngo ijije hi tro sa tria e itre xaa ijin. Ame la itre xaa tria së ke, ka ngazo catre palaha. (1 Korinito 6:9, 10) Maine tro epuni a kuca la ketre ngazo ka tru, the mekune pi kö ka hape, tha Iehova hmaca kö a hnimi epun. Nge the thëthëhmine kö ka hape, aja i Iehova troa nue la itre ngazo i epun me xatua epun.

1. Nemene la nyine tro sa kuca, matre tro Iehova a nue la itre ngazo së?

Ame la kola kuca la ngazo hnene la itre atr ka hnimi Iehova, tru la hleuhleu i angatr pine laka, tha ka loi kö la hnei angatr hna kuca. Ngo tingetinge ju hi la hni angatr la Iehova a hape: “Maine tune la ka palulu la ite ngazo i nyipunie, tro ha wië tune la kiona.” (Isaia 1:18) Haawe, e tro angatr a ietra, tro Iehova a nue la itre ngazo i angatr. Tro sa ietra tune kaa? E tro sa drenge e kuhu hni së ka hape, tha ka loi kö la hne së hna kuca. Loi e tro sa hmaca me sipo Iehova troa nue la ngazo së. Thupene lai, troa saze la itre mekun, me itre hne së hna majemine kuca ka ngazo, me isine troa trongëne la itre trepene meköti Iehova.​—E jë la Isaia 55:6, 7.

2. Nemene la aqane huliwane Iehova la itre qatre thup, matre xatuane la atr ka kuca la ngazo?

Öni Iehova kowe la atr ka kuca la ngazo ka hape: “Loi e tro angeice a hëne la itre qatre thup ne la ekalesia.” (E jë la Iakobo 5:14, 15.) Tru catre la ihnimi ne la itre qatre thup koi Iehova, me kowe la itre mamoe i Nyidrë. Celë hi matre, jëne la itre thiina ka lolo i angatr, ijiji angatre hi troa xatuane la itre atr ka kuca la ngazo, troa iloi hmaca me Iehova.​—Galatia 6:1.

Tro la itre qatre thup a xatuane tune kaa la keresiano ka kuca la ngazo? Jëne la Tusi Hmitrötr, tro la ala lue maine köni qatre thup, a qaja koi angeic la kepin matre ka ngazo la hnei angeic hna kuca. Ketre, tro angatr a xatua angeic matre tha tro hmaca kö angeic a kei. E cili, tro angatr a xome la itre xaa hnëqa i angeic e hnine la ekalesia. Nge e tha ietra kö angeic, tro hë la itre qatre thup a upetröneë angeic matre thupëne la ekalesia.

 TROA CE ITHANATAN

3. Tro sa qaja amamane la ngazo së matre mele pi së

Ame la easa kuca la ngazo, easa akötrë Iehova. Matre nyipiewekë tro sa qaja amamane la ngazo së koi Nyidrë. E jë la Salamo 32:1-5, nge ce ithanatane jë cahu hnying:

• Pine nemene matre tha tro kö sa juetrëne la ngazo së, ngo tro pe sa qaja amamane koi Iehova?

 4. Thangane ka loi qa ngöne la hna upetröneë la atr ka kuca la ngazo

Tha ijije kö troa lapa e hnine la ekalesia la keresiano ka kuca la ngazo, nge ka xele ma ietra. Celë hi matre kola upi angeic qa hnine la ekalesia. E cili, tha tro hmaca kö sa thele troa iöhny, me ithanata me angeic. E jë la 1 Korinito 5:6, 11 me 2 Ioane 9-11, nge ce ithanatane jë cahu itre hnying:

• Nemene la ka traqa e tro sa kuiëne la leven hnine la falawa? Nemene la ka troa traqa kowe la ekalesia, e tha upe kö la atr ka kuca la ngazo?

 HANE HI LA HNE SË HNA CE WANG

Maine hne së hna kuca la ngazo nge easa ietra me mekune ka hape, tha tro hmaca kö sa kuca la ngazo cili, tro hë Iehova lai a nue la ngazo së.

Nyine Amekunën

• Pine nemene matre tro sa qaja amamane la itre ngazo së koi Iehova?

• Nemene la nyine tro sa kuca matre tro Iehova a nue la itre ngazo së?

• Hnauëne laka, loi e tro sa sipo ixatua thene la itre qatre thup e hnei easë hna kuca la ngazo?