Maine aja i epun troa atre hnyawa la itre ini celë
Pane wange ju la aqane trongene la itusi celë, thupene lai, goeëne ju la VIDEO.
PANE GÖTRAN
Ame la epuni a hnëkëne la ini Tus, ke troa pane e la paragaraf, itre hnying hna nyihan (A) me itre xötr (B) ka acatrene la itre mekun ka tru. Ame la itre xaa xötr, ke, nyine troa e.
HNAALUENE GÖTRAN
Ame ngöne la itre nyine Troa Ce Ithanatan (C), kola qaja la itre mekun hna troa ce wang, nge ame la itre neköi tane ka co (D) ej a amamane la itre mekun ka tru. E jë la itre xötr, sa jë la itre hnying, nge goeëne jë la itre video.
Ame la itre VIDEO hna hamën, ke, kola nyixan la itre mekun hna qaja hnine la meken. Ame la itre xaa video ke, kola amamane la itre hna melën. Ame pena la itre xaa video ke, hna elon.
Wange ju fe la itre iatr, me itre mekun ka qejepengön (E), nge thele jë troa sa la itre hnying ngöne lo götran hna hape, Hne Së Hna Majemine Dreng (F).
HNAAKÖNINE GÖTRAN
Ame lo götran hna hape, Hane Hi La Hne Së Hna Ce Wang me Nyine Amekunën (G) ke, ej a amekunëne hmaca la itre ini. Makëne ju la drai ne afenesine epun la ini. Ame ngöne lo götrane hna hape, Nyine Tro Ni a Eatrën (H) kola upi epun kowe la itre ewekë nyine tro epun a thel troa hane traqa kow. Ame lo götran Itre Xaa Nyine Wang (I) kola upi epun troa e maine goeën la itre xaa ithuemacany.
Aqane troa thele la ketre xötr qa hnine la Tusi Hmitrötr
Hna xawan e hnine la Tusi Hmitrötr la 66 lao tus. Nge lue götrane la Tusi Hmitrötr: Itre Hna Cinyihan Qene Heberu (“Isisinyikeu Ka Hekö”) memine la Itre Hna Cinyihan Qene Geres (“Isisinyikeu Ka Hnyipixe”).
Ame la kola hamëne la ketre xötr hnine la meken, ke kola pane qaja la ëjene la tus (A), memine la mekene tus (B), me xötr maine itre xötr (C).
Ka tune la Ioane 17:3, ej a qaja la tusi Ioane, mekene 17, xötre 3.