Heji tixenuë i Iesu me itre aposetolo. Nyidrëti a ase ini angatr la aqane troa ipië, ke hnei nyidrë hna köle la itre waca i angatr. Hnauëne laka, ka nyipiewekë? Ke hetre engazo i angatr. Itre ka nyipici koi Akötresie la itre aposetolo, ngazo pe, angatre pala hi a isi pi ka tru. (Mareko 9:33, 34; 10:35-37) Nge enehila, kolo hmaca a mama la thiina cili.

Itre aposetolo “a nyiqaane iwesitrë ju göi troa atre ka hape, drei la ka tru e angatr.” (Luka 22:24) Pane mekune jë la aqane hleuhleu i Iesu troa öhne hmaca lai! Nemene la hnei nyidrëti hna kuca?

Tha hane kö Iesu elëhni maine wesitrë angatre pena, ngo hnei nyidrëti pe hna ithanata hnyawa koi angatr me xomihni angatr. Öni nyidrë: “Itre joxu ne la itre nöj a musinëne la itre atren, nge kola hëne la itre ka musi cili ka hape, Atre Kuci Loi. Ngo tha tro pi kö a hane tune lai thei nyipunie. . . . Ke drei la ka draië, ene la atre xen, maine la atre nyi hlu?” Thupene lai, nyidrëti a amekunë angatre hmaca jë la tulu i nyidrë, öni nyidrë: “Ngo eni pe la a tune la hlu nyipi nyipunie.”—Luka 22:25-27.

Ngacama hetre tria i angatr, ngo hnene pala hi la itre aposetolo hna ce me Iesu ngöne la itupath. Matre öni nyidrë: “Eni hë a isisinyikeu me nyipunie göne la ketre Baselaia, tune la aqane isisinyikeu Kakati me eni göne la Baselaia.” (Luka 22:29) Itre atre lai ka mele nyipici koi Iesu. Matre nyidrëti a anyipicine koi angatr jëne la isisinyikeu celë laka, tro angatr a ce me nyidrë ngöne la Baselaia, me ce musi me nyidrë.

Ngo maine nyipici laka, lolo catre la mejiune i angatr, ngo angatre pala kö ngöne la ngönetrei ne atr, nge itre ka tha pexej angatr. Matre Iesu a hmekë jë angatr me hape: “Satana a ajane troa kuca koi eö la hna kuca hnene la atre aisane la wene qitr me ikupein.” (Luka 22:31) Öni nyidrëti hmaca: “Tro asë hi nyipunieti a kei ngöne la heji celë, ke ase hë cinyihane ka hape, ‘Tro ni a lepe la atre thup, nge tro ha isa ije la hnënge mamoe.’ ”—Mataio 26:31; Zakaria 13:7.

Ngo canga öni Peteru ka hape: “Maine tro asë hi angatre la a nuetriji nyipë, ngo tha tro kö ni a hane nuetriji nyipë!” (Mataio 26:33) Ame hnei Iesu hna qaja koi angeic laka, qëmekene troa alua kukahleke la trotro, tro Peteru a qaja ka hape, thatre Iesu kö angeic. Nge öni Iesu hmaca koi angeic: “Ngo hnenge hna xëwe sai eö, matre tha tro kö a patre la lapaune i eö. Ngo e bëeke hmaca ha eö, acatrene jë la lapaune ne la itre trejine me eö.” (Luka 22:32) Ngo Peteru kö a catre fë ka hape: “Maine tro ju hë ni a ce meci me nyipë, ngo tha tro jë pi kö ni a qaja tune lai göi nyipë.” (Mataio 26:35) Ame hna qaja tune fe hnei itre xa aposetolo.

Öni Iesu koi angatr: “Tha qea pe kö la ijine tro ni a ce me nyipunie; nge tro nyipunieti a thele ni, ngo tune lo hnenge hna qaja ha koi angetre Iudra, eni fe a qaja koi nyipunie, ‘Tha ijiji nyipunieti kö troa tro kowe la götran hnenge hna tro kow.’ ” Thupene lai, öni nyidrë: “Eni a hamë nyipunie la ketre wathebo ka hnyipixe, qa i nyipunie troa hnimi ketre me ketre; tune la aqane hnimi nyipunieti ni, qa i nyipunie troa ihnimikeu. Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.”—Ioane 13:33-35.

Ame la Peteru a drenge ka hape, easenyi hë tro Iesu a tro, öni angeic: “Joxu, nyipëti a tro ië?” Sa jë hi Iesu ka hape: “Tha ijiji eö kö troa xötrethenge ni kowe la hnenge hna tro  kow, ngo epine hë, tro hë eö a xötrethenge ni.” Jole hë la hni i Peteru matre öni angeic: “Joxu, hnauëne laka tha ijijinge kö enehila troa xötrethenge nyipë? Ke pi tro fe ni a meci pi nyipë.”—Ioane 13:36, 37.

Iesu hë a amekunë itretre dreng lo angatr a cainöje trootro e Galilaia, lo pëkö trengene mani me kemeji angatr. (Mataio 10:5, 9, 10) Öni nyidrëti jë hi: “Hapeu, hna pë la itre ewekë cili thei nyipunie?” Sa jë hi angatre ka hape: “Waea!” Ngo hapeu, tro pala kö angatr a tun? Öni Iesu: “Enehila, loi e tro la atre hetre trengene mani a xom, nge tune mina fe koi kemej, ketre, loi e tro la ka pë taua a salemëne la iheetre ka qea i angeic, matre itö taua. Ke eni a qaja hnyawa koi nyipunie laka, kola eatre koi ni la itre hna cinyihan, ene lo hna hape, ‘Hna ijelekeu angeic me itre atr ka kuca la ngazo.’ Ke itre trengewekë lai ka troa eatre koi ni.”—Luka 22:35-37.

Iesu a qaja la drai ne jei faonyi nyidrë me itre ka kuca la ngazo. Thupene lai, tro hë itre ka xötrethenge nyidrë a qëmek koi itre iaxösisi ka tru. Ngo ame koi angatr, ka hnëkë hë angatr, matre öni itre aposetolo: “Joxu, goeën! Hane hi la lue taua.” Sa jë hi nyidrë ka hape: “Loi ju hë.” (Luka 22:38) Tro la lue taua cili a xatua Iesu troa hamë ini ka tru, ke tro ketre a huliwane menune la taua..