Ame ju hi lo Iesu a ase bapataiso, hnei nyidrëti hna cile kowe la ketre ithupëjia, ka isine troa akeinyi nyidrë qëmeken troa nyiqane la huliwa ne cainöj. Diabolo la ithupëjia ka anyimua tupathi Iesu. Ngo e thupen, Iesu a qeje angeic me hape: “Calemi hë la atre musinëne la fen, ngo pëkö mene i angeice theng.”—Ioane 14:30.

Öhne hë Ioane la pun kowe la ‘drakona atraqatr, lo un ekö, lo hna hëne ka hape, Diabolo me Satana.’ Tro ha pane helë angeic qa hnengödrai, nge tro ha “atraqatr la trenge elëhni i angeic, ke hohopatre pe hi la ijine i angeic.” (Hna Amaman 12:9, 12) Ka xecie hnyawa koi itre Keresiano laka, angatr a melën la ijine “hohopatre pe hi,” nge easenyi hë troa akalabusine “la drakona, lo une hnapan” koi 1 000 lao macatre. Ijine tro Iesu a musi ngöne la Baselaia i Akötresie.—Hna Amaman 20:1, 2.

Ngöne la ijine cili, nemene la ka traqa e celë fen? Drei la itre ka troa mel e cili? Nge tune kaa la mele i angatr? Ase hë Iesu sa la itre hnyinge celë. Ngöne la ceitune i nyidrë ne la itre mamoe me nani, ase hë nyidrë amamane la pun koi itre atr ka meköt, itre hna aceitunën me mamoe, nge ka ce huliwa me kuca la loi koi itre trejin me Iesu. Nge hnei nyidrëti fe hna amamane la pun koi itre ka icilekeu, itre hna aceitunën me nani. Öni Iesu: “Tro hë angatre lai [itre nani] a tro kowe la meci ka epine palua, nge itre ka meköt [itre mamoe] kowe la mele ka pë pun.”—Mataio 25:46.

Kolo hi lai a xatua së troa trotrohnine la itre trengewekë i Iesu, lo hna qaja kowe la atrekënö ka thip ezi nyidrë. Tha hnei Iesu kö hna sisinyi koi angeic troa kapa la Baselaia, tune lo aqane qaja i nyidrë koi itre aposetolo.  Ngo hnei nyidrëti pe hna sisinyi koi angeice ka hape: “Nyipici, eni a qaja hnyawa koi eö enehila, tro hë eö a ce me eni ngöne la Paradraiso.” (Luka 23:43) Eje hi, hetre mejiune i angeice hë troa mel ngöne la Paradraiso e celë fen—götrane gaa mingöminge catr. Haawe, trotrohnine hi së laka, ame la nöjei atr hna aceitunën me mamoe, nge ka troa kapa la “mele ka pë pun,” tro angatr a mel hnine la Paradraiso.

Kolo fe a ce tro memine lo hna qaja hnei Ioane göne la mel elany e celë fen. Öni angeic: “Hanawang! thene la itre atr la uma maano i Akötresie, nge tro nyidrëti a lapa me angatr, nge tro angatr a nöje i nyidrë. Nge tro Akötresieti a ce me angatr. Nge tro nyidrëti a köletrije la itre trenge timidra qa ngöne la itre lue meke i angatr, nge pë hmaca kö mec, me hleuhleu, me treij, me akötr. Patre hë lo itre ewekë hnapan.”—Hna Amaman 21:3, 4.

Ngo matre tro la atrekënö a hane mel hnine la Paradraiso, loi e troa pane amele angeic hmaca. Ngo tha angeice casi kö. Iesu a qejepengöne hnyawa me hape: “The sesëkötre kö, ke easenyi hë la hawa ne tro la itre ka meköl hnine la itre hua ne amekunën, a drenge la aqane ewekë i angeic me lö pi. Troa amelene hmaca la itre ka kuca la loi kowe la mel, me itre ka kuca la ngazo kowe la iameköti.”—Ioane 5:28, 29.

Ngo tune kaa ju hë itre ka ce musi me Iesu e hnengödrai? Öni Tusi Hmitrötr: “Tro angatr a ce musi me Keriso koi 1 000 lao macatre.” (Hna Amaman 20:6) Qëmekene tro angatr a itre joxu me Iesu, hnei angatr hna pane melëne la mel e celë fen, ke itre trahmanyi me föe angatr. Haawe, atre hi së ka hape, tro angatr elany a itre joxu ka ihnim, nge ka itrotrohni.—Hna Amaman 5:10.

Easenyi hë tro la itre atr e celë fen a kapa la thangane la huuje i Iesu, matre thepe angatr qa ngöne la musi ne la ngazo. Tro hë Iesu me itre ka ce musi me nyidrë, a xatuane la itre atr troa pexej. Nge tro la itre atr a kapa madrine lo mel hnei Akötresie hna hnëkën. Mel hna melën hnei Adramu me Eva, lo Akötresie a upi nyidro troa hnaho me nyialiene la fen. Nge goi tro fe a patre la mec hna axulun hnene la ngazo i Adramu!

Tro hë Iesu a afenesine la huliwa hna ahnithe koi nyidrë hnei Iehova. Matre ngöne la pune la 1 000 lao macatre, tro hë nyidrëti a nue la Baselaia, me itre atr ka pexej kowe la Keme i nyidrë. Hnei Paulo hna qejepengöne la etrune la ipië i Iesu, öni angeic: “E musi hë Keriso kowe la nöjei ewekë asë, tro fe hë nyidrëti a nue nyidrëti kö kowe la Atre hamë mus, matre tro Akötresieti a musi hune la nöjei ewekë asë.”—1 Korinito 15:28.

Eje hi, nyipiewekë catre la hnëqa i Iesu ngöne la aja i Akötresie. Aja lai hna troa isigölin uti hë epin, nge tro pala kö Iesu a tro thenge lo hnei nyidrëti hna qaja ka hape: “Eni hi la gojeny, me nyipici me mel.”—Ioane 14:6.