Iesu a tro qa Ieriko a tro Bethania. Tha ka hmaloi kö la tronge i nyidrë, ke troa elëne la 20 km ngöne la gojenyi ka jol. Lazaro me lue xa i angeic a lapa e Bethania, ngöne la ketre pala ne la Wetr Elaio, nge qa cili, kola e la 3 km matre traqa pi e Ierusalema.

Ala nyimu hë la angetre Iudra ka traqa e Ierusalema troa feetëne la Paseka. Angatr a canga traqa, matre e traqa jë angatr ketr la ngönetrei ka mec, maine pui ngazo hnene la ketre ewekë, ijiji pala kö troa iahmitrötrë angatr, “thenge lo hna majemine kuca göi troa iahmitrötrë.” (Ioane 11:55; Numera 9:6-10) Ame la itre ka traqa pa, angatr a itrony ngöne la uma ne hmi, me qeje Iesu. Angatr a hnyinge ka hape, tro jë kö nyidrëti a traqa?—Ioane 11:56.

Kola isazikeu la itre mekuna i angatr. Hetre itre hene ne hmi ka pi xolouth me humuthi Iesu. Nge goi amekötine fe angatr laka, e tro ketre a atre ka hape, ekaa Iesu, tro ha canga qaja koi angatr, “matre troa xolouthi nyidrë.” (Ioane 11:57) Hnei angatre hë hna thele troa humuthi Iesu thupene lo mele hmaca i Lazaro. (Ioane 11:49-53) Haawe, trotrohnine hi së la kepin matre itre xan a hnying ka hape, tro jë kö Iesu a traqa?

Traqa pala kö Iesu e Bethania lo Draikatru, ‘sikisi drai qëmekene la Paseka.’ (Ioane 12:1) Nge pine laka, kola nyiqaane la 8 Nisan e lö hë la jö (drai Sabath), hnei nyidrëti hna isine troa canga tro qa Ieriko. Ke eje hi, hna wathebone koi angetre Iudra troa tro la drai cili—qaan la kola lö la jö e Draikatru, uti hë la kola lö la jö e Mecixen. Nge ma tune pala hi lo, hnei Iesu hna tro kowe la hnalapa i Lazaro.

Simona fe a lapa e Bethania, matre angeic a hë Iesu jë me itre sinatronge i nyidrë, me Lazaro, troa ce xeni hej e Mecixen. Hna hë Simona fe ka hape, “ka lepera,” ke ma ketre atre lai hna aloine hnei Iesu ekö. Matre tune pala hi lo, Maretha a huliwa koi itre hna hën, nge Maria a nyipiewekë Iesu. Ngo enehila, tro angeic a kuca la ketre ewekë ka troa amejë ithanata.

Maria a fe pi la neköi buteil oel, “oel ka pui lolo nyipi narado ka tru thupene catr.” (Ioane 12:3) Ka tru thupene la oel cili (300 drenari), thupene hna kapa koi ca macatre ne huliwa! Matre Maria a nei oel kowe la he me lue ca i Iesu, nge angeic a köle pi la lue ca hnei itre ipenehe i angeic. Ame hna pui lolo asë la uma.

Elëhni jë hi itretre dreng, matre angatr a isa hnyinge ka hape: “A hnauëne la kola aluzine la oel ka pui lolo?” (Mareko 14:4) Öni Iudra Isakariota: “Hnauëne laka, tha salemëne kö la oele celë koi 300 lao drenari, matre thue  maniene la itre ka pë ewekë?” (Ioane 12:5) Tha angeice kö a meku itre ka pë ewekë. Ngo angeic a isin göi mani, ke angeice pala hi a atrekënö ngöne la trengene mani i angatr.

Iesu a nyixöle i Maria jë me hape: “Nyipunieti a ajolë eahlo fë nemen? Ka lolo hi la hna kuca hnei eahlo koi ni. Ke ce nyipunieti pala hi me itre ka pë ewekë, ngo ame ni, ka tha tro kö ni a lapa palua me nyipunie. Nge ame la eahlo a köle la ngönetreing hnei oel ka pui loi, eahlo hi lai a hnëkën troa kelemi ni. Matre eni la a qaja hnyawa koi nyipunie laka, ame asë hi la itre götran ne la fen hna troa cainöjëne la maca ka loi, tro fe a hane qaja la hnei eahlo hna kuca nyine amekunën.”—Mataio 26:10-13.

Ca drai Iesu hë e Bethania, nge kola ha drei mejen laka, nyidrëti e cili. Matre ala nyimu la angetre Iudra ka tro kowe la hnalapa i Simona, ngo tha koi Iesu hmekuj, ngo koi Lazaro fe, “lo atr hna amelene hmaca.” (Ioane 12:9) Matre hnene la itre hene ne hmi hna icasikeu troa thele la aqane troa humuthi Iesu me Lazaro. Angatr a mekune ka hape, itre atr a mejiune koi Iesu pine nyidrë amele Lazaro. Tha fene ngazo kö la thiina ne la itre hene ne hmi!