Ase petre hi Iesu fe la hni nyidrë me hamë ithuecatr koi itre aposetolo. Hnenyipajidri hë, nge ma ase hë sasaithe la minui. Enehila, Iesu a hamë ceitun koi angatr:

Öni nyidrë: “Eni hi la nyipi vin, nge Kakati la atre eëny.” (Ioane 15:1) Itre trengewekë i nyidrë a amekunëne lo hna qaja ha ekö göi nöje Isaraela, lo hna hëne ka hape, vine i Iehova. (Ieremia 2:21; Hosea 10:1, 2) Ngo hnei Iehova pe hna thipetrije la nöje cili. (Mataio 23:37, 38) Haawe, Iesu hi lai a qaja la ketre ini ka hnyipixe. Nyidrë la vin ne la Keme i nyidrë, lo hnei Akötresie hna nyiqaane eëny qane lo kola ië Iesu hnei uati hmitrötr lo 29 M.K. Ngo Iesu a amamane ka hape, tha nyidrëti casi kö la vin, ke öni nyidrë:

“[Kemeng] a xome pi qaathenge la itre picine ka tha ham, me nyidrawane la itre picine ka ham, matre tro nyudreni a ham atrune hmaca. . . . Thatreine kö la picine troa hamëne xanëne la wen, ngo loi e tro ej a casi memine la vin, nge troa tune koi nyipunie, e tha casi kö nyipunieti me eni. Eni hi la vin, nge nyipunieti la itre picin.”—Ioane 15:2-5.

Hnei Iesu hna sisinyi koi itretre drei nyidrë ka mele nyipici laka, e tro hë nyidrë, tro nyidrëti a upe la ixatua, ene la uati hmitrötr. Thupene la 51 lao drai, hnei itre aposetolo me itre xan hna kapa la uati hmitrötr, nge celë hi ka aijijë angatr troa itre picine vin. Nge ame la nöjei “picin,” tro angatr a casi me Iesu. Nyine u?

Öni Iesu: “Ame la atre ce me eni, nge ce eni me angeic, tro angeic a hamën atrun. Ngo maine patre ju ni, pëkö hnei nyipunieti hna atreine kuca.” Ame la “itre picin”—la itretre drei nyidrë ka mele nyipici—tro angatr a ham atrun, ene la troa nyitipune la itre thiina i Iesu, me qeje Baselaia i Akötresie, me ini itre atr. Ngo nemene ju hë e tro ketre a tha casi me Iesu me tha ham? Öni Iesu: “Maine tha casi kö la ketre atr me eni, tro ha thupatriji angeic.” Ngo öni Iesu fe: “Maine tro pala hi nyipunieti a casi me eni, nge troa lapa thei nyipunie la itre trengewekëng, haawe, sipone jë la nöjei ewekë hnei nyipunieti hna ajan, nge tro hë lai a eatr.”—Ioane 15:5-7.

Enehila, Iesu hmaca a amexej la hnei nyidrëti hna alua qaja—trongëne la hnei nyidrëti hna amekötin. (Ioane 14:15, 21) Nyidrëti a amamane jë koi itretre dreng la aqane tro angatr a trongën, öni nyidrë: “Nge maine tro nyipunieti a drengethenge la hnenge hna amekötin, tro hë nyipunie a lapa fene la ihniming, tune lo aqane drengethenge ni la itre hna amekötin hnei Kaka, me lapa fene la ihnimi nyidrë.” Ngo tha tro hmekuje kö a hnimi Iehova me Nekö i nyidrë. Öni Iesu: “Hane hi la hnenge hna amekötin, ene la tro nyipunieti a ihnimikeu, tune la aqane hnimi nyipunieti ni. Nge pëkö ihnim ka tru catre hune la: ene la tro ketre a meci pine la sinee i angeic. Nge itre sineenge nyipunie, e tro nyipunie a drengethenge la hnenge hna amekötin.”—Ioane 15:10-14.

Easenyi hë tro Iesu a amamane la ihnimi nyidrë, ene la troa meci pi itre ka lapaune koi nyidrë. Nyidrëti lai a amamai tulu koi itre ka xötrethenge nyidrë, matre tro fe angatr a pane thele la loi koi itre xan. Tro ha wangatrehmekunyi angatr hnene la ihnimi cili, ke öni Iesu e thupen: “Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.”—Ioane 13:35.

Drenge hi itre aposetolo la Iesu a hë angatr ka hape, “sinee.” Nyidrëti a qaja jë la kepin matre hë angatre jë tun, öni Iesu: “Eni pe a hë nyipunie  ka hape, sinee, ke eni a qaja amamane koi nyipunie la nöjei ewekë hnenge hna drenge qaathei Kaka.” Drei la ketre manathithi ka tru troa sinee i nyidrë, nge troa atre la hnei Kem hna qaja koi Iesu! Ngo maine aja i angatr troa itre sinee, loi e tro pala hi angatr a “hamë wen.” Nge e tro angatr a tun, öni Iesu: “E sipone jë nyipunie la nöjei ewekë koi Kaka ngöne la ëjeng, tro hë nyidrëti a hamë nyipunie.”—Ioane 15:15, 16.

Tro la aqane ihnimikeu ne la “itre picine,” a xatua itretre dreng, troa cile kowe la itre itupath elany. Nyidrëti a hmekë angatre jë ka hape, tro la fen a methinë angatr. Ngo nyidrëti a akeukawanyi angatre jë me hape: “Maine tro la fen a methinë nyipunie, atre ju hi nyipunie laka, hnene ej hna pane methinë ni qëmekene troa methinë nyipunie. Ke maine itre atr ne fen nyipunie, tro hë la fen a hnimi nyipunie, ngo pine laka trenyiwa nyipunie kowe la fen, . . . haawe, fen a methinë nyipunie.”—Ioane 15:18, 19.

Iesu a nyixan me qejepengöne la kepin matre fen a methinë angatr, öni nyidrë: “Tro angatr a kuca la itre ewekë cili koi nyipunie pine la ëjeng, ke thatre kö angatre la Atre upi ni.” Iesu a qaja jë ka hape, itre iamamanyikeu i nyidrë a nyizö itre ka imethinë, öni nyidrë: “Nge maine tha kuca ju ni la itre huliwa hna thatreine kuca hnei atr, pëkö ngazo i angatr, ngo enehila, hnei angatr hna öhnyi ni me methinë ni, nge tune mina fe koi Kaka.” Kola eatrëne la itre hna perofetan hnene la imethinë i angatr.—Ioane 15:21, 24, 25; Salamo 35:19; 69:4.

Iesu a amekunë angatre hmaca jë ka hape, tro nyidrëti a hamë ixatua, ene la uati hmitrötr. Mene lai hna hnëkën thatraqai nöjei atre dreng, matre tro pala hi angatr a hamë wen, ene la troa ‘anyipici nyidrë.’—Ioane 15:27.