E Thupenehmi 10 Nisan, Iesu a ithanatane la meci nyidrë hnine la uma ne hmi. Iesu a seseu, wanga qeje Akötresieti jë hnene la meci nyidrë. Matre öni Iesu: “Kaka, epi tro pe a ahmitrötrëne la ëje i nyipë.” Nge kola sa qa hnengödrai ka hape: “Ase hë ni ahmitrötrën ej, nge tro pala kö ni a ahmitrötrën.”—Ioane 12:27, 28.

Kola isa hnyinge la itre atr. Itre xan a mekune ka hape, hedreng. Nge öni itre xan: “Angela a ithanata koi angeic.” (Ioane 12:29) Ngo Iehova hi la hnei angatr hna dreng! Anyimua traqa tune hë, ke hetre itre atre ka drei Akötresie e qeje Iesu.

Ngöne lo ijine kola bapataiso Iesu, a traqa ha koi köni macatre nge sin, hnei Ioane bapataiso hna drei Akötresie e qeje Iesu ka hape: “Nekönge hniminange lai, eni a madri nyën.” Nge thupen la Paseka 32 M.K., hnei Iesu hna ketre pengön qëmekei Iakobo, me Ioane, me Peteru. Nge hnei angatr hna drei Akötresie e qaja ka hape: “Hane hi la Nekönge hniminang, eni a madri nyën. Drei nyëne ju!” (Mataio 3:17; 17:5) Ngo enehila, Iehova a ithanata matre troa dreng hnene la ka ala nyim!

Öni Iesu: “Tha pi ni kö la kola ewekë, ngo pi nyipunie.” (Ioane 12:30) Kolo hi a anyipicine laka, Iesu la Nekö i Akötresie, lo Mesia hna thingehnaean.

Ketre, tro la aqane mele nyipici i Iesu a amamane koi itre atr la aqane tro angatr a mel, me anyipicine laka, meköt e troa lep apatrenyi Satana Diabolo, tane la fen. Öni Iesu: “Traqa ha enehila la iameköti kowe la fen celë, nge enehila fe la ijine troa helëne trij la atre musinëne la fen.” Nyipici laka, tro Iesu a mec, ngo tha pune kö lai, jëne madrine pe. Hnauën? Öni nyidrë: “Maine troa xomi ni qaa la fen, tro ni a ea koi ni la nöjei pengöne atr.” (Ioane 12:31, 32) Eje hi, jëne la mec i nyidrë hune la sinöe, tro Iesu a ea koi nyidrë la itre atr, me fe gojenyi angatr kowe la mel ka pë pun.

Ame la Iesu a qaja ka hape, “troa xomi ni,” önine la ka ala nyim: “Hne huni lo hna dreng ngöne la Trenge Wathebo ka hape, tro la Keriso a mele epine palua. Nga hnauëne la eö a qaja ka hape, troa xome la Nekö i atr? Nge drei la Nekö i atr?” (Ioane 12:34) Nyimu ewekë hë ka anyipicine laka, Iesu hi la Nekö i atr, lo Mesia hna thingehnaean, nge goi drenge fe angatr la Akötresieti a anyipicine lai, ngo xele pala kö angatr ma kapa.

Tune pala hi lo, Iesu a aceitunë nyidrë me “lai.” (Ioane 8:12; 9:5) Nyidrëti a ielene la ka ala nyimu ka hape: “Tro pala kö la lai a lapa thei nyipunie. Matre, tro jë e lai petre kö, wanga musi jë la jidr koi nyipunie. . . Haawe, e thei nyipunie petre kö la lai, amamane jë la lapaune i nyipunie kowe la lai, matre tro fe nyipunie a itre nekö ne la lai.” (Ioane 12:35, 36) Thupene lai, Iesu a tro ju, ke tha e 10 Nisan kö la drai hna sa koi nyidrë. Ngo epin e 14 Nisan, ngöne la kola feetëne la Paseka, la drai ne “troa xomi” nyidrë, ene la troa jei faonyi nyidrë hune la sinöe.—Galatia 3:13.

Hna mama cil ngöne la itre macatre ne cainöje i Iesu laka, tha lapaune kö angetre Iudra koi nyidrë. Hnei Isaia hna perofetan ka hape, troa ti la luemeke i angatr, nge troa xet la itre hni angatr, matre tha tro kö angatr a ietra, nge tha tro kö a aloinyi angatr. (Isaia 6:10; Ioane 12:40) Eje hi, ngacama nyimu ewekë ka anyipici Iesu, ngo ala nyimu la angetre Iudra ka xele ma kapa laka, Iesu hi la Atre Iamele hna perofetan.

 Ngo hetre itre trene mus “ka lapaune” koi Iesu, tui Nikodremo, me Iosefa atre Arimathea, me itre xane ju kö. Ngo hapeu, tro kö angatr a amamane hnei huliwa? Tro kö angatr a cilehnö ke xou i angatr troa helë angatr qa ngöne la sunago? Maine pena, “ka tru catre kö koi angatr la iatrunyi qaathei atr?”—Ioane 12:42, 43.

Thupene lai, Iesu a qejepengöne jë la aliene la troa lapaune koi nyidrë. Öni nyidrë: “Ame la atre lapaune koi ni, tre tha angeice hmekuje kö a lapaune koi ni, ngo kolo fe a lapaune kowe la Atre upi ni. Nge ame la atre öhnyi ni, angeice fe hi a öhne la Atre upi ni.” Ame la itre ini hnei Akötresie hna upi Iesu troa hamën, nge hnei Iesu hna catre cainöjën, emele së hi lai. Matre öni nyidrë: “Ame la atre xele ni, me xelene la itre trengewekëng, hetre ka troa ameköti angeic. Ke ame la trengewekëng enehila, tre celë hi atre ameköti angeic elany ngöne la itre drai tixenuë.”—Ioane 12:44, 45, 48.

Iesu a nyipune jë me hape: “Tha sipu mekunange kö la hnenge hna qaja, ngo hnei Kaka, Atre upi ni hna amekötine la nyine tro ni a qaja, me aqane tro ni a qaja. Nge atre hnyawa hi ni laka, jëne mele ka pë pun la hna amekötine celë.” (Ioane 12:49, 50) Atre hi Iesu ka hape, easenyi hë troa anenine la madra i nyidrë thatraqane la itre ka lapaune koi nyidrë.—Roma 5:8, 9.