Iesu a tro qa Ierusalema e hnaipajö ne Thupenehmi. Nyidrëti a bëek a tro Bethania, götrane koië ne la Wetr Elaio. Tune pala hi lo, nyidrëti a meköl thene la itre sinee i nyidrë, Lazaro, me Maria, me Maretha.

Drai 11 Nisan enehila. E hmakany, Iesu me itretre dreng a xome la gojenyi ne tro Ierusalema, nyidrëti a tro kowe la uma ne hmi, nge tronge i nyidrë tixenuë. Nyimu ewekë tro nyidrëti a kuca la drai ce. Qëmekene la Paseka, tro nyidrëti a afenesine la huliwa ne cainöj, me acile la drai ne amekunën, me akötr me mec.

Ame la angatr a tro Bethania, ngöne la gojeny nyipine la Wetr Elaio me Ierusalema, öhne ju hi Peteru lo sinöe hnei Iesu hna ejin eidr. Öni angeice jë hi: “Rabi, goeën! kolo iwacua hnei nyipëti hna ejin, fitre hë.”—Mareko 11:21.

Ngo hnauëne la Iesu a ejine la iwacua? Kola mama la kepin ngöne la aqane sa i nyidrë. Öni Iesu: “Eni a qaja hnyawa koi nyipunie laka, maine tro nyipunie a lapaun me tha luelu, tro fe nyipunieti a atreine kuca la hnenge hna kuca kowe la iwacua, nge tro fe nyipunieti lai a hane qaja kowe la wetr celë ka hape, ‘Kötre jë nge kei ju ngöne la hnagejë,’ nge tro lai a ej. Nge ame la itre ewekë hnei nyipunie hna thithi fë cememine la lapaun, tro nyipunieti lai a kapa.” (Mataio 21:21, 22) Nyidrëti lai a amekunëne la ketre ini ka tru, ene la tro hetre lapaun ka atreine feje la itre wetr.—Mataio 17:20.

Matre ame la Iesu a aqaqacilene la iwacua, nyidrëti a amamane laka, nyipiewekë troa lapaune koi Akötresie. Öni nyidrë: “Ame la itre ewekë hnei nyipunie hna thithi fë, lapaune ju laka, tro kö nyipunieti a kapa, nge tro hë nyipunieti lai a kapa.” (Mareko 11:24) Ini ka tru koi nöjei atr ka xötrethenge Iesu! Nge ixatua lai koi itre aposetolo, ke easenyi hë tro angatr a qëmek kowe la itre akötr. Ngo hetre ketre ini hmaca kö hna kapa, ene la pengöne la lapaune së.

Tune la iwacua, ka loi qëmek la nöje Isaraela. Angatr a sine la ketre isisinyikeu me Akötresie, nge kösë kola trongëne la Trenge Wathebo. Ngazo pe, hnene la nöje cili hna amamane la aqane pë lapaun i angatr, kösë sinöe ka pë wen. Nge goi thipetrije fe angatr la sipu Nekö i Akötresie! Nge ame la Iesu a aqaqacilene lai iwacua, nyidrëti a amamane la pun kowe la nöje celë ka tha nyipici.

Tha hmitre kö, nge traqa pi Iesu me itretre dreng e Ierusalema. Nge tune pala hi lo, nyidrëti a tro ju kowe la uma ne hmi troa hamë ini. Ame hnene la itretre huuj, me itre qatr ne la nöj hna tro koi nyidrë me hape: “Qa kaa la atreine i eö troa kuca la itre ewekë celë? Nge drei la atre upi eö troa kuca lai?” (Mareko 11:28) Ma mekune pala kö angatr lo hnei Iesu hna kuca eidr kowe la itre ka saze mani.

Sa jë hi Iesu ka hape: “Ca ewekë fe tro ni a hnyingë nyipunie. Maine tro nyipunieti a sa, ketre tro fe ni a qaja koi nyipunie ka hape, ka xulu qa kaa la atreineng. Ame la bapataiso i Ioane, tre ka qa hnengödrai, maine qaathei atr? Sa jë koi ni.” Jole ju hi la itre ithupëjia. Matre hnei itretre huuj me itre qatr hna nyiqaane ihnyingënekeune la aqane troa sa. Öni angatr: “Maine tro sa hape, ‘Qa hnengödrai,’ tro hë angeice lai a sa ka hape, ‘Nga hnauëne laka, tha lapaune kö nyipunieti koi Ioane?’ Nge e tro sa qaja, ‘Qaathei atr’?” Jole hë angatr, ke xou i angatr la ka ala nyim, “ke ame Ioane koi nyudren, tre, perofeta.”—Mareko 11:29-32.

Thatreine kö angatre sa koi Iesu, matre öni angatr: “Thatre kö hun.” Matre ketre öni Iesu fe: “Nga tha tro kö ni a hane qaja koi nyipunie ka hape, ka qa kaa la atreineng.”—Mareko 11:33.