Köni jidri Iesu me itretre dreng e Bethania. Enehila, e hmahmakany drai 10 Nisan, angatre hmaca a tro Ierusalema. Iesu a mecijiin, matre ame la nyidrëti a öhne la ketre iwacua, nyidrëti a tro ju troa pane wang. Hetre wene kö?

Easë ngöne la pune treu Maac, nge tha ijine wa wene pala kö, ke epine jë kö e Juun. Ngo pine laka, hetre dröne hë, ma Iesu jë amekune ka hape, hetre wene wacua. Ngazo pe, pëkö cas. Hna amenu nyidrë hnene la pengöne la sinöe. Matre öni Iesu jë hi: “Tha tro hmaca kö eö a wa wen.” (Mareko 11:14) Ame hna nyiqaane fitre la isinöe. Ngo tro la itretre dreng a trotrohnine la ieji ngöne la drai thupen.

Tha qea kö nge traqa pi hi Iesu me itretre dreng e Ierusalema. Nyidrëti a tro ju kowe la uma ne hmi, lo götran hnei nyidrëti hna goeëne hnyawa eidr. Ngo enehila, tha nyidrëti hmekuje kö a goeëne la itre ewekë hnine la uma ne hmi; ngo nyidrëti a kuca lo hna kuca ha ngöne lo Paseka 30 M.K. (Ioane 2:14-16) Hnei Iesu lo hna tro ngöne “la uma ne hmi me helëne qa lai la itretre salem me angetre itö.” Hnei nyidrëti fe hna ‘kapasaitrëne la itre laulau ne la itre ka saze mani, me itre ita ne la itre ka salemë piny.’ (Mareko 11:15) Nge hnei Iesu hna sawa la itre atr ka tro kowe la traon ka thupa qa lai.

Hnauëne la Iesu a elëhni koi itre ka saze mani me salemë öni? Öni nyidrë: “Hapeu, tha hna cinyihane kö lo ka hape, ‘Tro ha hëne la umang, uma ne hmi thatraqane la nöjei nöj asë?’ Ngo nyipunieti pena a xome ej nyine uma i itre atrekënö.” (Mareko 11:17) Iesu a jele atrekënö angatr, ke angatr a aelëne la thupene la itre öni koi itre ka pi tro fë huuj. Ame koi Iesu, angatr a huliwa qenatrekënö.

Tha hmitre ju kö, nge drenge hë itre tane i angetre huuj, me itretre cinyihan, me itre he ne nöj, matre angatr a thele hmaca jë troa humuthi nyidrë. Ngo hetre jol. Thatre kö angatre la aqan, ke ala nyimu la ka traqa troa drei nyidrë.

Ngo tha angetre Iudra hmekuje kö ka traqa, ngo itre sine hmi angatre fe, itre ka xome la hmi angetre Iudra nge ka traqa kowe la Paseka. Hetre angetre Geres ka traqa kowe la feet. Angatr a tro ju koi Filipo, ke ma hnene la ëje i angeic qene Geres, nge angatr a sipon troa iöhnyi me Iesu. Ma tha nyipi mama kö koi Filipo ka hape, lolo hi la hna sipon, matre angeic a nue pi koi Anederea. Haawe, nyidroti a ce tro ju koi Iesu troa hnyingë nyidrë.

Atre hi Iesu ka hape, easenyi hë tro nyidrëti a mec. Matre tha ijine kö troa sa la nöjei pengöne hnying, maine nyi ka hlemu. Matre nyidrëti a sa jë kowe la lue aposetolo jëne la ketre ceitun me hape: “Hawa ha ne troa atrune la Nekö i atr. Nyipici, eni a qaja koi nyipunie ka hape, e tha pane meci kö me mala e kuhu hnadro la wene qitr, tro hi lai a ca wen ka lapa. Ngo maine tro ej a mec, tro hë eje lai a hamën atrun.”—Ioane 12:23, 24.

E tro hi a xome la ca wene qitr, kösë pëkö. Ngo e troa traane me nue troa “mec,” tro hë eje lai a cia me wa wen atrun. Ketre tun, Iesu casi hi la atr ka pexej, ngo pine la aqane mele nyipici i nyidrë uti hë mec, nyidrëti la jëne mel ka pë pun kowe la nöjei atr ka catre  huliwa tui nyidrë. Celë hi matre öni Iesu: “Ame la atr hnim la mele i angeice kö, tre, tro ha luz, ngo ame pena la atr methinëne la mele i angeic ngöne la fene celë, angeice hi lai a thupën ej thatraqane la mele ka pë pun.”—Ioane 12:25.

Öni nyidrëti hmaca: “Maine tro la ketre a hane pi nyihlueng, loi e tro angeic a xötrethenge ni, nge ame la nöjei jëng, tre, jë i angeice fe. Ketre, ame la atre pi nyihlueng, tro ha nyipi angeic hnei Kaka.” (Ioane 12:26) Hane petre hi la ketre manathith! Tro hë la itre hna nyipine hnei Kem, a ce me Keriso hnine la Baselaia.

Iesu a lapa mekun la itre akötr me aqane tro nyidrëti a mec, matre öni nyidrë: “Enehila, hace catre la hning, matre tro ni a qeje nemen? Kakati fe, epi amele ni jë qa ngöne la hawa ce.” Ngo xele kö Iesu troa triane la aja i Akötresie, matre öni Iesu: “Ngo eje hi laka, kepine hi lai matre traqa pi ni kowe la hawa celë.” (Ioane 12:27) Xecie koi Iesu troa eatrëne asë la aja i Akötresie, uti fe hë la troa mec.