Iesu a troa nyipune la huliwa ne cainöje i nyidrë, nge nyidrëti pala hi a hamë ceitun nyine qajaqaja la pengöi itretre cinyihan, me itre tane i angetre huuj. Matre angatr a pi humuthi nyidrë. (Luka 20:19) Ngo tha cile kö Iesu, nyidrëti enehila a hamëne la ketre ceitun. Öni nyidrë:

“Ceitune la Baselaia ne hnengödrai memine la ketre joxu ka hnëkëne la nyikeine ne la nekö i nyidrë ka faipoipo. Nyidrëti a upe pi la itre hlue i nyidrë troa hëne la itre hna könën, ngo xele kö angatr ma tro.” (Mataio 22:2, 3) Iesu a nyiqaane la ceitun me qaja la “Baselaia ne hnengödrai.” Haawe, trotrohnine hi së laka, Iehova Akötresie la “joxu.” Matre drei la nekö i joxu me itre hna könën? Ketre tha jole kö troa trotrohnine laka, ame la nekö i joxu, tre nekö i Iehova, lo atre hamë ceitun. Nge ame la itre hna könën, tre itre ka troa ce musi memine la Nekön ngöne la Baselaia ne hnengödrai.

Drei la itre hna pane könën? Hnei Iesu me itre aposetolo hna pane qeje Baselaia koi drei? Koi angetre Iudra. (Mataio 10:6, 7; 15:24) Hnene la nöje cili hna kapa la Isisinyikeu Ne La Wathebo lo 1513 qëmeke i Keriso, nge celë hi ka aijijë angatr troa ketre “baselaia [i] angete huj.” (Esodo 19:5-8) Ngo eu la hna könë angatr troa xeni “nyikein”? Lo 29 M.K., ijine Iesu a nyiqaane cainöjëne la Baselaia ne hnengödrai.

Matre nemene la aqane ujë i angatr? Öni Iesu: “Xele kö angatr ma tro.” Eje hi, ala nyimu la itre hene ne hmi me angetre Iudra ka xele ma kapa laka, Iesu la Mesia, me Joxu hna iën hnei Akötresie.

Iesu a qaja jë ka hape, ijiji angetre Iudra pala kö troa kapa la ihë. Öni nyidrë: “Nyidrëti [joxu] a upe hmaca jë la itre xa hlue i nyidrë me hape: ‘Qaja ju kowe la itre hna könëne ka hape: Hanawang, ase hë ni hnëkë xen, nge ase fe hë ni humuthe la kaung me itre öninge ka kökötre lolo, nge tro asë hë. Trohemi kowe la hnë nyikein.’ Ngo tha nyipiewekëne kö angatr, nge angatr a isa tro pi, ketre kowe la hlapa i angeic, nge ketre kowe la hnë salem i angeic. Nge ame pë hë lo itre xan, hnei angatr hna xolouthe la itre hlu, me qaqa  angatr me axösisin, me humuth.” (Mataio 22:4-6) Celë hi ka traqa ngöne lo kola acile la pane ekalesia. Ngöne la ijine cili, ijiji angetre Iudra pala kö troa sine la Baselaia, ngo tha nyipiewekëne kö angatr, nge uti fe hë la troa qanangazone la ‘itre hlue i joxu.’—Itre Huliwa 4:13-18; 7:54, 58.

Nemene la pun kowe la nöje cili? Öni Iesu: “Haawe, elëhni jë hi la joxu, nge nyidrëti a upe pi la itre sooce i nyidrë troa humuthi angatr, me dreuth asë la traon.” (Mataio 22:7) Celë hi ka traqa koi angetre Iudra lo 70 M.K., ijine angetre Roma a lep apatrene “la traon,” ene Ierusalema.

Hapeu, pëkö xa atr hna könën? Nyipici, ke öni Iesu ngöne la ceitun: “Nyidrëti [joxu] a qaja jë kowe la itre hlue i nyidrë ka hape: ‘Ase hë ni hnëkëne la nyikein, ngo angatre la ka tha ijij. Nga tro jë kowe la itre gojenyi e tröne la traon, nge könëne jë la nöjei atr hnei nyipunieti hna troa ixelë memin.’ Haawe, tune lo hna amekötin, hnene la itre hlue hna tro kowe la itre gojeny, me hën asë la itre ka loi me ka ngazo hnei angatr hna ixelë memin. Ame hna tiqa pi la hnë nyikein hnene la itre ka traqa troa xen.”—Mataio 22:8-10.

Hna eatre lai ngöne lo Peteru a xatua itre atre ne fen troa itre nyipi Keresiano. Tha angetre Iudra kö angatr, nge tha ka sine kö angatre la hmi cili. Nge ame lo 36 M.K., hnene la tane la itre sooce i Roma, ene Konelio, hna ce kapa me fami angeic la uati hmitrötr. Celë hi ka aijijë angatr troa sine lo Baselaia ne hnengödrai.—Itre Huliwa 10:1, 34-48.

Ngo Iesu a amamane laka, tha tro kö a kapa hnei “joxu” la nöjei atre hna könën. Öni Iesu: “Ame la kola traqa hnene la joxu troa pane wange la itre hna könën, öhne ju hi nyidrëti la ketre atr tha ka heetre ne faipoipo kö. Matre öni nyidrëti jë hi: ‘Sineeng, hnei eö hna lö tune kaa, nge pë pe iheetre ne faipoipo i eö?’ Pëkö ca meje i angeic. Önine jë hi la joxu kowe la itre hlue i nyidrë ka hape: ‘Othe ju la lue ime me lue ca i angeice la, nge kuië angeice pi ngöne la gaa jidr e kuhu trön. Nge e cili, tro angeic a treije me latresi.’ Haawe, ala nyimu la itre hna könën, ngo xalaithe hi la itre hna iën.”—Mataio 22:11-14.

Ma tha trotrohnine kö itre hene ne hmi la alien, me enyipiewekëne la hnei Iesu hna qaja. Ngo casi hi, cane methi angatre lae Iesu, nge xecie hnyawa ha koi angatre troa humuthi nyidrë, pine nyidrëti ahmahmanyi angatr.