Treene lao drai thupene la Iesu a ase elë hnengödrai, hnei nyidrëti hna upe la uati hmitrötr lo ijine Penetekos. Hatrene laka, nyidrëti hë e hnengödrai. Ngo tro pala kö a hamëne la ketre hatren. Qëmeken troa tranyi Setefano pine anyipici Iesu, öni angeic: “Hanawang! Öhne hë ni la kola fe la hnengödrai, memine la Nekö i atr a kola cil ngöne la götrane maca i Akötresie.”—Itre Huliwa 7:56.

Ngöne lo Iesu me Keme i nyidrëti e hnengödrai, hnei nyidrëti hna treqene tro Akötresie a qaja lo hna cinyihan hnei Dravita ka hape: “Hnei Iehova hna [qaja] kowe la Joxung [Iesu], ka hape, ‘Lapaju [eö] ngöne la götrane macang, uti hë la tro ni a amë la ite ithupëjia me [eö] nyine tane la lue ca i [eö].’ ” Nge e pexeje hë la ijine itreqe, tro hë Iesu a ‘musinëne la nöjei ithupëjia me nyidrë.’ (Salamo 110:1, 2) Ngo qëmekene la ijine cili, nemene la hnei Iesu hna kuca?

Kolo petre hi a acile la pane ekalesia lo Penetekos 33. Hnei Iesu hna nyiqaane mus qa hnengödrai kowe la itretre drei nyidrë hna iën. (Kolose 1:13) Hnei nyidrë hna wejemekei angatr ngöne la huliwa ne cainöj, me hnëkë angatr kowe la itre hnëqa i angatr elany. Hnëqa ka u? Ame la itre ka troa mele nyipici uti hë mec, tro ha amele angatr hmaca, nge tro hë angatr a ce musi me Keriso ngöne la Baselaia.

Hane hi la ketre joxu ka troa ce musi me Iesu: Saulo la ëjen. Hna majemine hë angeic hnene la ëje i angeic qene Roma, Paulo. Atre Iudra angeic, nge qaan ekö, angeic a catre isigöline la Wathebo i Akötresie. Ngazo pe, tru la hna amenu angeic hnei itre hene ne hmi i angetre Iudra, matre goi sine fe angeic la kola humuthi Setefano. Thupene lai, angeice a tro ju Damaseko troa “qanangazone la itretre drei Joxu.” Hna nue angeic hnei Kaiafa, Atre Huuj Ka Sisitria, troa othe la itretre drei Iesu, me bëeke sai angatr e Ierusalema. (Itre Huliwa 7:58; 9:1) Ngo ame la Saulo a tro, aca tro hudrume ju hi xötreithi angeic, matre angeic a kei pi e kuhu hnadro.

Drenge ju hi angeic la ketre ka ithanata, ngo tha atre kö. Önine lai ewekë: “Saulo, Saulo, hnauëne la eö a akötrë ni?” Sa jë hi angeic ka hape: “Drei nyipë Joxu?” Matre sa jë hi ka hape:  “Eni Iesu, lo hnei eö hna axösisin.”—Itre Huliwa 9:4, 5.

Iesu a upi Paulo jë troa lö e Damaseko, me treqene la itre xa hna amekötin. Ngo pine laka, tha öhne hë angeice koilo, hnene la itre xa atr hna tro sai angeic e Damaseko. Nge ngöne la ijine cili, hnei Iesu fe hna mama koi Anania, ketre atre drei nyidrë ka mel e Damaseko. Iesu a upi Anania jë troa tro kowe la ketre hnalapa, me thele Saulo. Tha nyipi madrine kö Anania troa wai angeic, ngo hnei Iesu hna akeukawanyi Anania me hape: “Tro jë, ke hnenge hna iëne la atre cili troa tro fë trongëne la ëjeng kowe la itre nöj, me itre joxu, me itre nekö i Isaraela.” Haawe, thupene la kola fe la luemeke i Saulo, angeic a nyiqaane “qeje Iesu jë [e Damaseko] hnine la itre sunago me hape, Iesu hi la Nekö i Akötresie.”—Itre Huliwa 9:15, 20.

Jëne la ixatua i Iesu, hnei Paulo me itre xan hna eatrëne lo huliwa hna nyiqaane hnei nyidrë. Nge pine laka, Akötresie a amanathithi angatr, kola tro loi la huliwa. Haawe, thupene la 25 lao macatre, qaane lo Iesu a mama koi angeic, ijiji Paulo hë troa cinyihane ka hape, ase hë “cainöjën kowe la nöjei atr e cailo fene hnengödrai.”—Kolose 1:23.

Itre macatre thupen, hnei Iesu hna anyimua aijijë Ioane, lo aposetolo hnimina i nyidrë, troa meköle goeëne la itre ewekë elany. Hna fejan asë la itre hna meköle goeën ngöne la tusi Hna Amaman. Jëne la itre hna meköle goeën, kösë hnei Ioane hna mel aqeany, uti hë la Iesu a bëek me mus ngöne la Baselaia. (Ioane 21:22) Eje hi, “hnene la ua hna xomi [Ioane] kowe la drai i Joxu.” (Hna Amaman 1:10) Eu la drai cili?

Ame la easë waipengöne hnyawa la itre hna perofetan hnei Tusi Hmitrötr, atreine hi së qaja ka hape, hna nyiqaane la “drai i Joxu” lo 1914. Ngöne la macatre cili, hna traqa lo Pane Isi Ka Tru. Nge qaane ju hi lai, kolo pala hi a elë la etrune la itre isi, me meci ka ixötrekeu, me jiin, me sa. Itre akötre cili me itre xan a eatrën e cailo fen “la hatren.” Hatren hnei Iesu hna qaja koi itretre dreng, matre tro angatr a atre la “ijine celë hë” nyidrë, me ijin ne la “pun.” (Mataio 24:3, 7, 8, 14) Ketre, tha e Roma hmekuje kö la hna cainöjën la maca ka loi ne la Baselaia, ngo e cailo fen asë.

Akötresie a upi Ioane jë troa qaja la aliene la itre ewekë cili. Öni angeic: “Traqa ha la iamele me men, me Baselaia ne la Akötresi së, me musi ne la Keriso i nyidrë.” (Hna Amaman 12:10) Eje hi, tha pu ne jidri kö la Baselaia hnei Iesu hna catre cainöjën!

Tha fene maca ka loi kö koi itretre drei Iesu ka mele nyipici. Haawe, angatr a nyipiine la itre trengewekë i Ioane, lo öni angeic: “Madrine jë eö hnengödrai, me nyipunie itretre lapan, ngo ekölö hi ni la ihnadro me hnagejë, ke hna ukapië Diabolo koi nyipunie, nge atraqatr la trenge elëhni i angeic, ke hohopatre pe hi la ijine i angeic.”—Hna Amaman 12:12.

Ngo enehila, tha Iesu hmaca kö a lapa treqen ngöne la götrane maca i Akötresie. Joxu hë Iesu, nge easenyi hë tro nyidrëti a apatrene la itre ithupëjia me nyidrë. (Heberu 10:12, 13) Haawe, tune kaa së elany?