Ngöne la heji tixenuë i Iesu me itre aposetolo, hnei Iesu hna qaja koi angatre ka hape: “E mele hmaca ha ni, tro ni a tro pa hui nyipunie Galilaia eë.” (Mataio 26:32; 28:7, 10) Nge enehila, ala nyimu hë la itretre dreng ka traqa e Galilaia. Ngo angatr a u e Galilaia?

Nango qea pi hë, öni Peteru kowe la sikisi lao aposetolo: “Eni a troa nyi ie.” Öni angatr asë ka hape: “Easa ce tro.” (Ioane 21:3) Angatr a nyi ie jë la jidri ka pexej, ngo pë ju kö ca tha i angatr. Nge ame hë la kola lai, mama pi hi Iesu, nge nyidrëti a cil ngöne hnangöni. Tha wangatrehmekunyi nyidrëti kö hnei angatr. Matre Iesu a sue jë me hape: “Ha neköng, pëkö tha i nyipunie?” Öni angatr: “Pëkö!” Matre öni Iesu ka hape: “Nue pi la ifile i nyipunie ngöne la götrane maca ne la he, nge tro lai a hetre tha i nyipunie.” (Ioane 21:5, 6) Ame hna tiqa pi la ifile, matre thatreine kö angatr hul.

Öni Ioane jë hi koi Peteru ka hape: “Joxu hi lai.” (Ioane 21:7) Ame hnei Peteru hna heetre hmaca jë, ke hnei angeic hna una lo iheetr ka qea i angeic troa nyi ie. Angeic a sesë pi qa hune he me aje bëek, a traqa koi 90 m la enanyin. Nge itre xan pala kö a abëekëne hmidrane la he, me itre ifile ka catre hnei ie.

Ame hë la angatr a qalëne la he, “traqa ju hi angatr a öhne la itre ie me falawa hna dreuth hune la itre wanalep.” Öni Iesu: “Pane awe jë la itre xa ie hnei nyipunieti hna ea.” Peteru a alemine jë la ifile, nge 153 la itre ie ka jol ngöne ifile! Matre öni Iesu: “Trohemi ma xen.” Ngo angatr asë a isa cile hnö troa hnyinge ka hape, “Drei nyipë?” ke atre hi angatr ka hape, Iesu hi. (Ioane 21:10-12) Akönia mama nyidrëti hë kowe la itretre dreng la angatr a cas.

Iesu a line pi koi angatr la itre ie me falawa. Thupene lai, nyidrëti a goeëne jë la itre ie hna ea, nge öni nyidrë: “Simona nekö i Ioane, eö kö a hnimi ni hune itre eje la?” Hapeu, ka nyipiewekë kö koi Peteru troa nyi ie, hune la troa eatrëne la huliwa hnei Iesu hna ahnith? Sa jë hi Peteru ka hape: “Öö Joxu, atre hi nyipë laka, eni a hnimi nyipë.” Matre Iesu a iele angeice jë me hape: “Nga thuane jë la itre neköi mamoeng.”—Ioane 21:15.

Iesu a hnyinge hmaca jë koi Peteru ka hape: “Simona nekö i Ioane, eö kö a hnimi ni?” Ma Peteru jë a nango sesëkötr, ngo öni angeic: “Öö Joxu, atre hi nyipë laka, eni a hnimi nyipë.” Matre Iesu a sa hmaca jë ka hape: “Nga tro xome hnyawa jë la itre neköi mamoeng.”—Ioane 21:16.

Iesu a akönia hnyinge jë koi Peteru ka hape: “Simona nekö i Ioane, eö kö a hnimi ni?” Ma Peteru jë a mekune ka hape, tha Iesu kö a mejiune koi angeic. Matre Peteru a catre fë jë ka hape: “Joxu, pëkö ewekë ka tha mama koi nyipë, nge atre hnyawa hi nyipëti ka hape, eni a hnimi nyipë.” Matre Iesu a qaja hmaca jë koi Peteru la hnëqa i angeic: “Ithuane jë la itre neköi mamoeng.” (Ioane 21:17) Eje hi, nyipiewekë tro la itre ka elemeken hnine la ekalesia, a thupëne hnyawa la itre mamoe i Akötresie.

Hna humuthi Iesu pine nyidrë kuca la huliwa hna upi nyidrë hnei Akötresie. Enehila, nyidrëti a thuemacanyi Peteru ka hape, tro fe hane traqa tune koi angeic. Öni nyidrë: “Ame lo co pala kö eö, ka heetre casi eö nge eö a trongëne la sipu jë i eö, ngo ame hë la eö a qatr, tro eö a xejë la lue ime i eö, nge tro ketre a heetrë eö, me xometrongë eö kowe la götran hnei eö hna xele ma tro kow.” Ngo Iesu a thuecatre i angeice jë me hape: “Catre pi eö xötrethenge ni.”—Ioane 21:18, 19.

Ame hnei Peteru hna öhnyi Ioane aposetolo, nge öni angeic: “Nge ame pë hë angeice la ke?” Tune kaa elanyi la aposetolo hnei Iesu hna hnime catrën? Öni Iesu: “Maine eni a ajane tro angeic a mel uti hë la tro ni a traqa, ke kolo pena a uë  eö?” (Ioane 21:21-23) Nyipiewekë tro Peteru a xötrethenge Iesu, me tha igoeë. Ngo kolo pe a mama ngöne la itre trengewekë i Iesu ka hape, troa meci pa la itre xa aposetolo, nge tro Ioane a meköle goeëne la ijine tro Iesu a mus ngöne la Baselaia.

Ngo eje hi laka, nyimutre pala kö la itre huliwa i Iesu, ngo tha ijije kö troa fejan asë ngöne la nyimu tusi hna ewath.