Kola sesëkötre ngazo la itre föe la angatr a öhne la hua ka pë alien! Matre hnei Maria Magadalena hna nyinyape koi “Simona Peteru me kowe lo atre dreng hnei Iesu hna hnime catrën”—Ioane aposetolo. (Ioane 20:2) Nge hna mama la ketre angela kowe la itre xa föe ezine la hua. Nge e hnine la hua, hetre ketre angela ka heetrë iheetr “ka wië me ka qea.”—Mareko 16:5.

Önine la ketre angela koi angatr ka hape: “The xou kö, ke atre hi ni laka, epon a thele Iesu, lo hna athipe hune la sinöe. Patre hë nyidrëti la, ke ase hë amele nyidrë, tune lo aqane qaja i nyidrë. Lö jë, nge goeëne ju la hnei nyidrëti hna meköl. Enehila, canga tro jë, nge qaja ju kowe la itretre drei nyidrë ka hape, mele hmaca ha nyidrë qa hna mec, nge hanawang! Tro pa i nyidrëti hë e Galilaia.” (Mataio 28:5-7) Pine laka, itre föe “a hai me xou atraqatr,” angatr a nyinyape pi troa thuemacanyi itretre dreng.—Mareko 16:8.

Traqa ju hi Maria a öhnyi Peteru me Ioane. Maria a simano me hape: “Ase hë angatre xome la Joxu qa hnine la hua, nge thatre kö huni la götran hnei angatre hna ami nyidrëti ngön.” (Ioane 20:2) Nyinyape pi hi Peteru me Ioane. Ngo traqa pa Ioane kö. Angeic a goeën hnine la hua, me öhne la itre maano lino, ngo tha lö ju kö angeic.

Ame hë la Peteru a traqa, angeic a lö meköti ju. Öhne ju hi angeic la itre maano lino hna xom nyine atuthe la he i Iesu. Nge lö jë hi Ioane, ame hnei angeic hna mejiune kowe la itre trengewekë i Maria. Ngacama ase hë Iesu qeje mele hmaca, ngo tha trotrohnine kö angatr ka hape, mele hmaca ha nyidrë. (Mataio 16:21) Thatreine kö angatr la nyine mekun, matre angatr a bëeke jë koi hnalapa. Ngo lapa ju pe kö Maria.

Ngöne la ijine cili, hnene la lue xa föe hna nyinyap troa thuemacanyine la itre xa atre dreng  laka, mele hmaca ha Iesu. Ngöne la gojeny, Iesu a mama jë koi nyidro me hape: Hapeue lai?” Nyidroti a tro pi koi Iesu, me xolouthe la lue ca i nyidrë, me sa iwatingöne ca qëmeke i nyidrë. Öni Iesu jë hi: “The xou kö! Tro jë, nge qaja ju kowe la itre trejin me eni laka, loi e tro angatr a tro Galilaia, nge tro hë angatr e cili a iöhnyi me eni.”—Mataio 28:9, 10.

Ekula, lo kola traqa la sa me mama la itre angela, hnene lo itre ka thupëne la hua hna xou atraqatr, ‘me cile hnö.’ Ngo thupene la kola nango lapa kötre la trenge xou i angatr, angatr a tro ju kowe la traon, me “thuemacane la itre tane i angetre huuj la itre ewekë ka traqa.” Matre hnene la itretre huuj hna ce ithanatane lai me itre qatre ne la nöj. Angatr a ce axeciëne jë troa nyithupene la itre sooc, matre tro angatr a thoi me hape: “Hnene la itretre drei angeic hna traqa e jidr troa kötre fë la ngönetrei i angeic, lo eahuni a meköl.”—Mataio 28:4, 11, 13.

Maine ju, troa humuthe la itre sooce i Roma e traqa ju angatr meköle trije la huliwa i angatr; Matre önine la itretre huuj ka hape: “E traqa ju la mejene cili [laka hnei angatr hna meköl] kowe la gavena, the xou kö, ke tro kö huni a ithanata me nyidrë.” (Mataio 28:14) Itretre thup a eöthe jë la mani, me qaja la hna upi angatr hnei itretre huuj. Celë hi matre hlemu la trengathoi ka hape, hna atrekënöne la ngönetrei Iesu.

Maria Magadalena pala hi a treij ezine la hua. Ngo ame hë la angeic a nango tu, öhne ju hi angeic hnine la hua la lue angela a cile fë iheetr ka wië! Ketre a lapa ngöne lo götran hna atë la he i Iesu, nge ketre ngöne la lue ca. Öni nyidroti jë hi: “Föe fe, hnauëne la nyipoti a treij?” Öni angeic: “Ase hë angatre xome la Joxung, nge thatre kö ni la götran hnei angatr hna ami nyidrëti ngön.” Nge ame hë la angeic a xei, öhne ju hi angeic la ketre atr. Nyidrëti a hnyingëne hmaca jë lo hnying ne la lue angela, öni nyidrë: “ ‘Nyipoti a thele drei?’ Maria pe kö a mekune ka hape, atre nyihnyawa hlapa la atre cili, matre öni angeic: ‘Maine nyipëti la ka xome la ngönetrei i nyidrë [Iesu], qaja jë koi ni la götran hnei nyipëti hna ami nyidrëti ngön, nge tro ni a xomi nyidrë qaa lai.’ ”—Ioane 20:13-15.

Maria hi lai a ithanata koi Iesu hna amelen hmaca, ngo tha wangatrehmekunyi nyidrëti kö. Ngo ame hë la nyidrëti a qaja ka hape, “Maria!” trotrohnine ju hi angeic ka hape, Iesu, ke aqane hë angeice kö lai hnei nyidrë. Matre öni Maria: “Rab·bo′ni!” (Kola hape, “Atre Ini!”). Ngo xele kö Maria tro nyidrëti a elë hnengödrai, matre angeic a thipi thenge nyidrë. Ngo öni Iesu: “The xötrethenge ni hmaca kö, ke tha elë petre kö ni koi Kaka. Ngo tro jë kowe la itre trejin me eni, nge qaja ju koi angatre ka hape, tro ni a elë kowe la Kemeng, me Keme i nyipunieti fe, nge kowe la Akötresing, nge Akötresi nyipunieti fe.’ ”—Ioane 20:16, 17.

Maria a nyinyape pi kowe la götran hna itrony hnei itre aposetolo me itre xa atre dreng. Öni angeice jë hi: “Öhne hë ni la Joxu!” Angeice hi lai a anyipicine lo hna qaja ha hnene lo lue xa föe. (Ioane 20:18) Ngo ame koi itre xan, kösë angatr a ‘ithanata menu.’—Luka 24:11.