Ngöne la Wetr Elaio, Iesu hi a ase hamëne la ceitune la treene lao jajiny me itre talan. Iesu pala kö a sa la hnying ne la itre aposetolo göne la ijine celë hë nyidrë, me ijine nyipune la fen. Tune kaa la aqane nyipune nyidrë? Nyidrëti a hamëne jë la ceitun tixenuë, ceitune la itre mamoe me nani.

Iesu a nyiqaane qejepengöne la ijin me hape: “E traqa ha la Nekö i atr ngöne la lolo i angeic cememine la itre angela, tro hë angeic a lapa hune la therone ka lolo i angeic.” (Mataio 25:31) Iesu la hna qaja atrun ngöne la ceitun, ke hna majemine hë nyidrë ka hape, “Nekö i atr.”—Mataio 8:20; 9:6; 20:18, 28.

Tro lai a eatr eu? Ngöne la ijine Iesu a ‘traqa ngöne la lolo i nyidrë’ ce me itre angela. Nge tro nyidrë a “lapa hune la therone ka lolo.” Ase hë nyidrëti qaja la “Nekö i atr ka traqa hune la itre iaw ne hnengödrai, cememine la men atraqatr me lolo,” ce me itre angela i nyidrë. Eue hö? “Thupene ju hi la itre akötr.” (Mataio 24:29-31; Mareko 13:26, 27; Luka 21:27) Haawe, tro lai a eatr elany e traqa pi Iesu ngöne la lolo i nyidrë. Tro hë nyidrëti a u?

Öni Iesu: “E traqa ha la Nekö i atr . . .  tro ha acasine la nöjei nöj qëmeke i angeic, nge tro angeic a thawa luë angatr, tune la atre thup a isa thawa la itre mamoe me nani. Tro angeic a amë la itre mamoe ngöne la götrane maca i angeic, me itre nani, ngöne la götrane mi.”—Mataio 25:31-33.

Nemene la ka troa traqa koi itre mamoe? Öni Iesu: “Tro hë la Joxu a qaja kowe la itre ka cil ngöne la götrane maca ka hape: ‘Jë fe nyipunie, itre hna amanathithin hnei Kaka. Nge kapa ju la Baselaia hna hnëkëne thatraqai nyipunie, qa ngöne lo kola xupe la atr.’ ”  (Mataio 25:34) Hnauëne la kola kepe angatr hnei Joxu?

Önine la Joxu: “Ke hnenge hna mecijiin, nge hnei nyipunieti hna ithue ang, nge hnenge hna pi ij, nge hnei nyipunieti hna ithue imeng. Nge hnenge hna lapa trenyiwa, nge hnei nyipunieti hna kepe ni, me tro xöe, nge hnei nyipunieti hna heetrë ni. Hnenge fe hna wezipo, nge hnei nyipunieti hna hnimi ni, nge hna akalabusi ni nge hnei nyipunieti hna wai ni.” Nge ame la kola hnying hnei itre mamoe, ene la “itre ka meköt,” la ewekë ka loi hnei angatr hna kuca, öni nyidrë: “Ame lo nyipunieti a kuca lai kowe la ka co ne la itre trejine me eni, nyipunieti hi lai a kuca koi ni.” (Mataio 25:35, 36, 40, 46) Tha hnei angatre kö hna kuca la loi e hnengödrai, ke pëkö ka wezipo, maine ka mecijiin e cili. Haawe, kolo hi a qaja la loi hna kuca koi itre trejin me Keriso e celë fen.

Nge nemene ju hë koi itre nani hna amë ngöne la götrane mi? Öni Iesu: “Thupene lai, tro la Joxu a qaja kowe la itre ka cil ngöne la götrane mi ka hape: ‘Tro pi nyipunie, itre hna ejin, kowe la eë ka tha pi kö hna hnëkëne thatraqai Diabolo me itre angela i angeic. Ke hnenge hna mecijiin, ngo tha hnei nyipunieti kö hna ithue ang, nge hnenge hna pi ij, ngo tha hnei nyipunieti kö hna ithue imeng. Nge hnenge hna lapa trenyiwa, nge tha hnei nyipunieti kö hna kepe ni, me tro xöe, nge tha hnei nyipunieti kö hna heetrë ni. Hnenge fe hna wezipo nge hna akalabusi ni, ngo tha hnei nyipunieti kö hna wai ni.’ ” (Mataio 25:41-43) Ka meköti lai, ke tha nyipiewekëne kö itre nani la itre trejin me Keriso e celë fen, thenge lo hna upi angatr.

Itre aposetolo a inine laka, ame la iameköti elany, tre iameköti ka hut—ka epine palua. Matre öni Iesu koi angatr: “Tro la Joxu a sa koi angatre ka hape: ‘Nyipici, eni a qaja hnyawa koi nyipunie laka, ame lo nyipunieti a tha kuca lai kowe la ka co ne la itre trejine me eni, ketre nyipunieti fe lai a tha kuca koi ni.’ Haawe, tro hë angatre lai a tro kowe la meci ka epine palua, nge itre ka meköt kowe la mele ka pë pun.”—Mataio 25:45, 46.

Ame la aqane sa i Iesu koi itre aposetolo, tre kola xatua itretre dreng asë, troa waipengöne la itre huliwa me thiina i angatr.