Sasaithe tro hë la minui. Hnei itretre huuj hna ce axeciën troa hamë Iudra la 30 mani sileva, troa nue Iesu koi angatr. Matre Iudra a wejemekene jë la ka ala nyim, itre tane i angetre huuj me itre Faresaio ka thele Iesu. Ce angatr me itre xa sooce i angetre Roma, me ketre tane sooc.

Ame lo Iesu a upi Iudra nyipine la Paseka, hnei Iudra hna tro meköt koi itre tane i angetre huuj. (Ioane 13:27) Hnei angatre pë hë hna hëne la itretre thup me itre xa sooc. Hnei Iudra hna pane tro sai angatr kowe lo hnahag hna feetëne la Paseka. Ngo enehila, angatr a sasaithe la sasala ne Kederon, me tro kowe la hlapa. Angatr a cile fë jia, me laame cil me itre uke jina troa thele Iesu.

Angatr a elëne la Wetr Elaio, nge xecie hnyawa koi Iudra laka, canga tro hi angatr a öhnyi Iesu. Ngöne lo wiik ka ase hë, hnei Iesu me itre aposetolo hna anyimua tro qa Bethania a tro Ierusalema, me bëeke hmaca. Nge ngöne la tronge i angatr, hnei angatr hna majemine cil ngöne la hlapa ne Gethesemane. Ngo enehila, hnenyipajidri hë, nge ma kola juetrë Iesu hnei itre ahnue ne sinöe. Matre, tro la itre sooc a wangatrehmekunyi Iesu tune kaa nge thatre nyidrëti pe? Hnei Iudra hna mekune troa nyi hatr, matre amamai Iesu. Öni angeic: “Ame la atr hnenge hna troa idrem memin, angeice hi lai. Xolouthi angeice ju, nge thupëne hnyawa kö matre tha tro kö angeic a kötr.”—Mareko 14:44.

Iudra a lö sai angatre jë hnine la hlapa, nge öhnyi Iesu ju hi angeic me itre aposetolo, matre angeic a tro meköti ju koi Iesu. Öni angeic: “Bozu Rabi!” Ame hnei angeic hna dremi nyidrëti jë. Nge öni Iesu: “Sineeng, eö a ue celë?” (Mataio 26:49, 50) Iesu a sa jë la hnyinge i nyidrë me hape: “Iudra, eö a troa nue la Nekö i atr koi angatr jëne idrem?” (Luka 22:48) Ngo xele hë Iesu ma aluzi traem me angeic!

Iesu a tro jë kowe la götran gaa lai, nge öni nyidrë: “Nyipunie a thele drei?” Matre hnene la ka ala nyimu hna sa ka hape: “Iesu atre Nazareta.” Tha xou i Iesu kö troa qaja ka hape: “Eni hi.” (Ioane 18:4, 5) Matre itre atr a kei ju e kuhu hnadro, ke thatre kö angatr la ka troa traqa.

Maine ju, ijine hi tro Iesu a kötr ngöne la gaa mit, ngo hnei nyidrëti pe hna hnyingëne hmaca la hnei angatr hna thel. Matre ame la angatr a sa hmaca ka hape, “Iesu atre Nazareta,” Iesu a sa hnyawa jë ka hape: “Ase hë ni qaja koi nyipunie ka hape, eni hi, haawe, pine laka nyipunieti a thele ni, nga nue angatre pi la.” Ngöne la ijine ka jole celë, tha thëthëhmine kö Iesu lo hnei nyidrëti hna qaja ka hape, tha tro kö a luzi la ketre aposetolo. (Ioane 6:39; 17:12) Iesu a thupëne hnyawa la itre aposetolo i nyidrë, nge pëkö ka luz, ngo “kolo hmekuje hi lo nekö ne la hnëjin,” ene Iudra. (Ioane 18:7-9) Haawe, nyidrëti a sipo angatre jë troa nue la itre aposetolo i nyidrë.

Ame hë la itre sooc a mejë me tro koi Iesu, trotrohnine ju hi la itre aposetolo la ewekë ka traqa. Matre öni angatr: “Joxu, tro huni a xomi taua? (Luka 22:49) Ngo qëmekene tro Iesu a sa, ase fe hë Peteru hule la ketre taua. Angeic a hna pi me thupa la hnangenyë maca i Maliko, hlue ne la atre huuj ka sisitria.

Iesu a ketre jë la hnangenyë i Maliko, nge meu ju hi. Thupene lai, nyidrëti a hamëne jë la  ketre ini ka tru. Öni nyidrëti koi Peteru: “Amë hmaca ju la taua i eö ngöne la göhnen, ke, ame la nöjei atre xomi taua, tro angatre lai a meci hnei taua.” Ka hnëkë hë Iesu, ke öni nyidrë: “Troa eatre tune kaa la itre hna cinyihan lo hna hape, tro kö lai a traqa tun?” (Mataio 26:52, 54) Nge öni nyidrë: “Ke hapeu, tha tro kö ni a iji la ver hna hamë ni hnei Kaka?” (Ioane 18:11) Aja i Iesu troa kuca la aja ne la Keme i nyidrë, uti fe hë la troa humuthi nyidrë.

Iesu a hnyinge jë kowe la ka ala nyimu me hape: “Atrekënö ni matre nyipunieti a traqa fë taua me jia troa xolouthi ni? E nöjei drai eni pala hi a hamë ini ngöne la uma ne hmi, ngo tha xolouthi ni hi hnei nyipunie. Ngo kola traqa tune lai matre eatrëne jë lo itre hna Cinyihane hnene la itre perofeta.”—Mataio 26:55, 56.

Itre sooc, me tane i angatr, me itretre thup a xolouthi Iesu me othi nyidrë. Ame hë la itre aposetolo a öhne lai, angatr a isa kötre pi. Ngo hnene la “ketre nekö trahmanyi”—ma Mareko—hna cil nyipine la ka ala nyim, matre xötrethenge Iesu. (Mareko 14:51) Ngazo pe, wangatrehmekunyi angeice ju hi hnene la ka ala nyim, nge angatr a thele jë troa xolouthi angeic, matre angeic a kötre pi, me nue pëhë la iheetre i angeic.