Hna tro sai Iesu me lue xan kowe la ketre götran ka tha nanyi kö, matre humuthi angatr. Hna hëne la götrane cili ka hape Gol′go·tha, Götrane Ne La Itre Inenatr. Ka mama qa “gaa nanyi” la götrane cili.—Mareko15:40.

Hna upi Iesu me lue xan troa uni iheetr. Thupene lai, kola ha thue ime i angatr la waina hna nyinyikön hnei dröne muro. Ma itre föe ne Ierusalema la ka hnëkëne lai koi itre hna troa humuth, matre nango lapa kötre pi la akötr. Nge tha sixele kö angetre Roma troa hamën. Ngo ame ju hi la Iesu a tupath, xele ju hi nyidrëti ma ij. Hnauën? Aja i nyidrë troa loi la mekuna i nyidrë ngöne la ijine itupathi ka tru, aja i nyidrë troa hlë me mele nyipici uti hë mec.

Iesu a meköl hune la sinöe. (Mareko15:25) Nge itre sooc a jei faone jë la lue im me lue ca i nyidrë, matre kola thin axulune la ijön me itre non. Tha fen akötre kö nyidrë. Ngo ame hë la kola acile la sinöe, loi ju kö lo tro hnapan, ke enehila, kola ha thipe la ngönetrei i nyidrë, me tha zezene la itre eatre i nyidrë. Ngo tha wesitre pi kö Iesu kowe la itre sooc, öni nyidrë: “Kaka, nue pi la ngazo i nyudren, ke thatre kö nyudreni la hnei nyudreni hna kuca.”—Luka 23:34.

Angetre Roma a majemine cinyihan la kepin matre humuthe pi la ketre atr. Matre hui Iesu, hnei Pilato hna cinyihane ka hape: “Iesu, atre Nazareta, Joxu i angetre Iudra.” Hna cinyihane lai qene Heberu, me Roma, me Geres, matre ala nyimu la ka atreine e. Pilato hi lai a amamane la trenge hni i angeic koi angetre Iudra ka uku angeic troa humuthi Iesu. Ngo itretre huuj a eetr me hape: “The cinyianyine kö ka hape, ‘Joxu i angetre Iudra,’ ngo, cinyianyine pi pe ka hape, öni angeic, ‘Eni la Joxu i angetre Iudra.’ ” Ngo xele hë Pilato tro angatr a elo angeic, matre öni angeic: “Ase hë ni cinyihan, nge eje hë lai.”—Ioane 19:19-22.

Elëhni jë hi itretre huuj, matre angatr a qajangazo Iesu hmaca jë, tune lo aqane kuca i angatr ngöne la Hnakootr Ka Tru. Matre hnene la itre atr ka cili thenge hna hnyimasai Iesu, me qaqa nyidrë me hape: “Öni eö lo ka hape, tro eö a thëtrije la uma ne hmi me acile hmaca ej ngöne la köni drai, pane amele eö jë, nge uti pi qa ngöne la sinöe ne iaxösisi.” Nge itre tane i angetre huuj me itretre cinyihan a ihnyimasai me hape: “Höö, Keriso, Joxu i Isaraela, ketre uti pi nyipë qa hune la sinöe ne iaxösisi, matre hane jë fe huni öhne me mejiun.” (Mareko 15:29-32) Nge goi qaqa Iesu fe hnene la lue atrekënö ezi nyidrë, ngacama nyidrëti hi la ka pë engazon.

Nge hnene fe la foa lao sooc ne Roma hna hnyimasai Iesu. Ma hnei angatre jë hna nango galane la waina hna nyinyikön. Angatr a nyiqane  qenahmo Iesu jë, me upi nyidrë troa sipu xome la waina, ngo thatreine pe. Angatr a köjane jë lo hna cinyihan, me nyiqane hnyimasai Iesu me hape: “Maine eö hi la Joxu i angetre Iudra, ketre amele eö jë.” (Luka 23:36, 37) Pane mekune jë! Angatr a qenahmo Iesu, la gojeny, me nyipici me mel. Ngo eje hi laka, nyidrëti a xomihnine la nöjei akötr, nge tha lapa fë trengehni kö nyidrë koi itre ka cili thenge, maine koi itre sooc ka ihnyimasai, maine pena, kowe la lue atre ka thip ezi nyidrë.

Matre hnene la foa lao sooc hna thawa foane la itre iheetre i Iesu. Nge angatr a uthi trikitr troa atre la atrekë nyin. Ngo ame pena la iheetr ka he hnin i Iesu, “tha hna cane kö ke hna sil apexejen.” Matre öni angatr: “The zezene kö, ngo tro pe sa uthi trikitrën matre mama jë la atrekë ewekën.” Angatre hi lai a eatrëne lo hna perofetane ka hape: “Tro angatr a thawa la itre iheetreng, me uthi trikitrëne la iheetreng.”—Ioane 19:23, 24; Salamo 22:18.

Ngo nango qea pi hë, trotrohnine ju hi la ketre ka thip ezi Iesu laka, nyipi joxu nyidrë. Matre angeic a wesitrëne jë la ketre atre ka ngazo me hape: “Tha xou i eö kö e Akötresie? Ke casi hi lai hna amekötine koi eö me nyidrë. Ngo ame nyiso, ka meköti lai, ke nyiso a xeni pune la ngazo i nyiso, ngo ame la atre celë, pëkö ngazo i angeic.” Thupene lai, angeic a sipone jë koi Iesu ka hape: “Iesu, the thëthëhmi ni kö e lö jë nyipë kowe la Baselaia i nyipë.”—Luka 23:40-42.

Sa jë hi Iesu ka hape: “Nyipici, eni a qaja hnyawa koi eö enehila, tro hë eö a ce me eni,” tha ngöne Baselaia, ngo “ngöne la Paradraiso.” (Luka 23:43) Tha ceitu kö lai memine lo hnei nyidrë hna thingehnaean koi itre aposetolo, laka, tro angatr a ce musi me nyidrë ngöne la Baselaia. (Mataio 19:28; Luka 22:29, 30) Ngo ma ase hë la atre cili drei mejene lo Paradraiso e celë fen, lo hnalapa hnei Iehova hna hnëkën koi Adramu me Eva, me itre nekö i nyidro. Enehila, tro hë la atrekënö cili a mec atre laka, hetre mejiune i angeice hë koi elany.