Itre hawa qëmeken, hnei Iesu hna ini itre aposetolo la aqane troa ipië, hnei nyidrëti hna köle la lue ca i angatr. Nge enehila, thupene la Paseka, nyidrëti a qaja hmaca la itre trengewekë i Dravita, öni nyidrë: “Hnene la atre ka mele tingeting me eni, lo hnenge hna mejiune kow, nge ka xeni la falawang, hna xejë la tidöca i angeic koi ni.” Thupene lai, nyidrëti a qaja mekötine jë ka hape: “Tro la ketre e nyipunie a salemë ni.”—Salamo 41:9, MN; Ioane 13:18, 21.

Itre aposetolo a igoeë, matre öni angatr: “Joxu tha eni kö, eje hi?” Nge goi hnyinge fe Iudra. Matre Peteru a iele Ioane, lo ka lapa ezi Iesu, troa hnyinge ka hape, drei. Öni Ioane jë hi koi Iesu ka hape: “Joxu, drei lai?”—Mataio 26:22; Ioane 13:25.

Sa jë hi Iesu ka hape: “Ene la atr hnenge hna troa hamëne kow la falawa hna trapin.” Iesu a trapine jë la falawa ngöne la ketre kap, nge nyidrëti a line pi koi Iudra me hape: “Kola ha tro la Nekö i atr, tune lo hna cinyihane göi angeic. Ngo ekölö hi ni lai atre salemëne la Nekö i atr! Loi ju kö ekö e tha hna hnahone la atre cili.” (Ioane 13:26; Mataio 26:24) Ame hnei Satana hna löthi Iudra. Ngazo hë la thiina i Iudra, ngo enehila, angeice ha kuca la aja i Satana, matre angeice hi lo “nekö ne la hnëjin.”—Ioane 6:64, 70; 12:4; 17:12.

Öni Iesu jë hi koi Iudra ka hape: “Canga kuca jë la hnei eö hna troa kuca.” Itre xa aposetolo pe kö a mekune ka hape, pine laka, Iudra la atrekë hnëqane la trengene mani, ma Iesu jë a upi angeic ka hape: “ ‘Tro jë troa itöne la ka nyipiewekë thatraqane la feet,’ maine troa hamëne la ketre ewekë koi itre ka pë ewekë.” (Ioane 13:27-30) Ngo Iudra pe a tro troa salemë Iesu.

 Ngöne pala hi la heji celë, hnei Iesu hna acile la xeni ka ketre pengön. Nyidrëti a xome pi la falawa, me thithi ole, me thupathupa, me hamë itre aposetolo troa xen. Öni nyidrëti jë hi: “Celë hi hatrene la ngönetreing hna troa hamën thatraqai nyipunie. Tro pala pë hë nyipunie a kuca la, nyine mekune koi ni.” (Luka 22:19) Ame hnei itre aposetolo hna xen me ihamënekeune la sine falawa.

Iesu a xome pi la verë waina, me thithi ole, me line koi angatr. Angatr a isa iji jë ngöne lo vere hnei Iesu hna qaja ka hape: “Ame la vere celë, ej a nyihatrene la isisinyikeu ka hnyipixe, hna troa aejëne ngöne la eni a nenge la madrang thatraqai nyipunie.”—Luka 22:20.

Iesu hi lai a acile la drai ne amekunëne la meci nyidrë, drai hna troa feetën e nöjei macatre hnei itre ka xötrethenge nyidrë, hmekune la 14 Nisan. Tro lai a amekunë itre ka lapaun, la hnei Iesu me keme i nyidrë hna kuca, matre thepe angatr qa ngöne la ngazo me mec. Sisitria kö la feete celë hune la Paseka, ke ej a nyihatrene la ijine meci Iesu, atre amelene paluane la itre ka lapaun.

Iesu a qaja ka hape, ame la madra i nyidrë, tre “hna neng thatraqane la ka ala nyim, nyine köletrije la itre ngazo.” Nge itre aposetolo la itre xa hna nue ngazon, angatr me itre xan, itre ka troa ce musi me Iesu ngöne la Baselaia ne la Keme i nyidrë.—Mataio 26:28, 29.