Ngöne la drai thupen, e 9 Nisan, Iesu me itretre dreng a tro qa Bethania a tro Ierusalema. Ame la angatr a nyiqane traqa e Bethefage, ngöne la Wetr Elaio, öni Iesu kowe la lue atre dreng:

“Tro jë kowe la traone qëmeke i epon, nge tro epon a öhn e cili la ketre boliko föe hna ce hnöthe memine la nekön ej. Senge pi lue ej, nge traqa fë pi koi ni. Nge e traqa ju qaja la ketre ewekë koi epon hnei ketre atr, hape jë: ‘Joxu a ajane lue ej.’ Nge tro hë angeice lai a canga nue koi epon.”—Mataio 21:2, 3.

Tha canga trotrohnine kö itretre dreng laka, ame la hnei Iesu hna qaja, tre kola eatrëne la ketre hna perofetan. E thupen, trotrohnine ju hi angatr ka hape, kola eatrëne la hna perofetan hnei Zakaria. Hnei angeice lo hna qaja ka hape, tro la Joxu hna thingehnaean hnei Akötresie a lö e Ierusalema, me “ti boliko föe me neköi boliko.”—Zakaria 9:9, MN

Ame hë la lue atre dreng a traqa e Bethefage, me senge la neköi boliko me thinen, önine la itre atr ezine ka hape: “Hnauëne la epon a senge la neköi boliko?” (Mareko 11:5) Ngo ame ju hi la angatr a dreng ka hape, koi Joxu, angatr a nue nyidroti pi. Matre hnene la lue atre drenge hna una la lue iheetre ka qea i nyidro, me amë hune la boliko föe me nekön, ngo hnei Iesu hna iëne la nekön.

Kola kökötre trootro la etrune la itre atr ka xötrethenge Iesu a lö Ierusalema. Ala nyimu la itre ka selu iheetr ngöne gojeny, nge itre xan a sa dröne sinöe, me “picine sinöe ngöne la itre hlapa” troa amë ngöne gojeny. Angatr a sue ka hape: “Epi amele huni jë! Manathithi la atre traqa ngöne la ëje i Iehova! Manathithi la Baselaia ka troa traqa, Baselaia ne la keme së Dravita!” (Mareko 11:8-10) Ngo hetre itre Faresaio nyipine la ka ala nyim, angatr a elëhni troa drenge lai. Matre öni angatre koi Iesu: “Atre Ini fe, wesitrëne ju la itretre drei nyipë.” Sa jë hi nyidrë ka hape: “Eni a qaja hnyawa koi nyipunie, maine lapa thaupu ju angatre la, tro ha sue la itre etë.”—Luka 19:39, 40.

Ame hë la Iesu a öhnyi Ierusalema, nyidrëti a treije pin me hape: “Maine trotrohnine ju eö la itre ewekë ka hamë tingeting—ngo enehila, ase hë juetrëne koi eö.” Tro Ierusalema a xeni pune la aqane catre që i angeic. Iesu a thingehnaeane ka hape: “Tro ha traqa koi eö la drai ne tro la itre ithupëjia me eö a acile xötreithi eö la itre jo atraqatr, me thingi jë i eö. Nge tro angatr a lepe apatrenyi eö, me itre nekö i eö. Tha tro pi kö angatr a nue la ketre etë troa të hune la ketre.” (Luka 19:42-44) Thenge la hna qaja hnei Iesu, hna apatrenyi Ierusalema ngöne la macatre 70 M.K.

Ame hë la Iesu a lö Ierusalema, “hnene la itre atren hna nyi mejen me hape: “Drei lai?” Qaja jë hi la ka ala nyimu ka hape: “Iesu perofeta, atre Nazareta e Galilaia.” (Mataio 21:10, 11) Thene la itre ka ixötrethenge, hetre itre ka sine lo mele hmaca i Lazaro, matre angatr a porotrikëne jë. Nge itre Faresaio a elëhni ke pëkö hnei angatr hna atreine kuca. Matre angatr a nyiqaane iqajakeune ka hape: “Kola xötrethenge angeic hnene la fen asë.”—Ioane 12:18, 19.

Nge tune pala hi lo, Iesu a lö hnine la uma ne hmi troa hamë ini. E cili, nyidrëti a aloine la itre timek me itre ka peje ca. Ame hë la kola öhne lai hnei itre tane i angetre huuj me itretre cinyihan, elëhni jë hi angatr, ke kolo fe a sue hnei itre nekönatr hnine la uma ne hmi ka  hape, “Epi amele huni jë, Nekö i Dravita!” Matre öni itre hene ne hmi koi Iesu ka hape: “A tha drenge kö eö la hnei nyudreni hna qaja?” Sa jë hi nyidrë ka hape: “Tha hane kö nyipunieti e ka hape, tro ha atrunyi Akötresie hnene la që ne la nöjei nekönatre me medreng?”—Mataio 21:15, 16.

Thupene lai, Iesu a nyiqaane goeëne jë la itre ewekë hnine la uma ne hmi. Nge pine laka, hejiheji hë, nyidrëti a tro hmaca pi me itre aposetolo a tro Bethania troa meköl. Angatr a isine troa canga traqa qëmekene troa xejë la drai 10 Nisan.