Thupene la mele hmaca i Iesu, hnei nyidrëti hna isapui memine la 11 lao aposetolo ngöne la wetr e Galilaia. Hetre itre xa atre dreng fe, ala 500 angatr, kolo itre ka nango luelu. (Mataio 28:17; 1 Korinito 15:6) Ngo enehila, tro la itre trengewekë i Iesu a apëne la luelue i angatr, nge tro ha xecie koi angatr laka, mele hmaca ha nyidrë.

Iesu a qaja jë laka, ase hë Akötresie nue koi nyidrë troa mus e hnengödrai me e celë fen. Matre nyidrëti a upe la itretre dreng me hape: “Tro jë nyipunie, nge inine jë la nöjei atr qa ngöne la nöjei nöj troa xötrethenge ni. Bapataiso angatre jë ngöne la ëje i Kaka, me ngöne la ëje ne la Nekön, memine la uati hmitrötr. Ini angatre jë troa trongëne lo nöjei ewekë hnenge hna amekötine koi nyipunie.” (Mataio 28:18-20) Eje hi, ka mele hnyawa Iesu, nge nyidrëti pala hi a sikusikune la huliwa ne tro fë maca ka loi.

Hna amekötine lai koi nöjei atre drei Iesu, itre trahmany, me föe, me ha nekönatr. Ngo eje hi, troa hetre ka icilekeu, tro angatr a thele troa apëne la huliwa ne cainöj, me huliwa ne ini itre atr. Ngo Iesu a akeukawane jë la itretre dreng me hape: “Ase hë Akötresieti nue koi ni troa musi hune la nöjei ewekë e hnengödrai me e celë fen.” Nemene la alien koi itre ka xötrethenge nyidrë? Öni nyidrë: “Hanawang, tro pala hi ni a ce me nyipunie uti hë la troa nyipune la fene celë.” Tha Iesu kö a qaja ka hape, tro asë hi la itre ka cainöj a atreine kuci iamamanyikeu. Ngo tro pe a xatua angatr hnene la uati hmitrötr.

Haawe, thupene la hna amele nyidrëti hmaca, hnei Iesu hna mama a “40 lao ijine” koi itretre dreng. Tha hnei nyidrëti kö hna mama ngöne la ca pengöne ngönetrei, ngo “hnei nyidrë hna anyimua mama koi angatr nyine anyipicin laka, mele hmaca ha nyidrë.” Hnei nyidrëti hna ini angatr la itre nyipici göne “la Baselaia i Akötresie.”—Itre Huliwa 1:3; 1 Korinito 15:7.

Kola mekune laka, ame la angatr e Galilaia, hnei Iesu hna upi angatr troa bëek e Ierusalema. Matre ame la nyidrëti a itronyi me angatr ngöne la traon, öni nyidrë: “The tro kö qaa Ierusalema, ngo lapa treqene ju lo hna thingehnaean hnei Kaka, ene lo hnei nyipunieti hna drenge qaatheng; ke hnei Ioane lo hna bapataiso hnei tim, ngo easenyi hë matre bapataiso nyipunieti jë hnei uati hmitrötr.”—Itre Huliwa 1:4, 5.

E thupen, hnei Iesu hmaca hna itronyi me itre aposetolo i nyidrë. Nyidrëti a “troxomi angatre jë tröne la traon a tro Bethania,” ngöne la götrane koië ne la Wetr Elaio. (Luka 24:50) Nge ngacama ase hë Iesu anyimua qaja koi angatr la aqane tro nyidrëti a tro, ngo angatre pala hi a mekune laka, e celë fen la Baselaia i nyidrë.—Luka 22:16, 18, 30; Ioane 14:2, 3.

Matre öni itre aposetolo: “Joxu, enehila hi la ijine tro nyipë a acile hmaca la baselaia thei angetre Isaraela?” Sa jë hi nyidrë ka hape: “Tha hna aijijë nyipunieti kö troa atre la traem, maine ijin hnei Kakati hna sa.” Ngo nyidrëti a uku angatre jë pe troa eatrëne la hnëqa i angatr. Öni nyidrë: “Ngo tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.”—Itre Huliwa 1:6-8.

Ce Iesu me itre aposetolo la nyidrëti a nyiqaane elë hnengödrai. Ame hnene la ketre iaw ka mit hna juetrë nyidrë. Thupene lo mele hmaca i Iesu, hnei nyidrëti pala hi hna mama ngöne la itre ngönetrei ne atr. Ngo enehila, Iesu ha nue la ngönetrei cili, me xome la ngönetrei ne hnengödrai. (1 Korinito 15:44, 50; 1 Peteru 3:18) Itre aposetolo pala kö a cile me goeëne la hnengödrai, nge mama pi hi ezi angatr la “lue trahmanyi ka heetrë  ka wië.” Lue angela ka xome la ngönetrei ne atr. Matre öni nyidro: “Angetre Galilaia fe, hnauëne laka, nyipunieti pala kö a goeëne la hnengödrai? Ame lae Iesu hna xome qa nyipi nyipunie a tro hnengödrai, tro hmaca kö nyidrëti a bëeke tune la aqane elë nyidrë hnengödrai eë.”—Itre Huliwa 1:10, 11.

Tha hnei Iesu kö hna nyi pengöne la aqane elë nyidrëti e hnengödrai, ce nyidrëti hi me itre ka mele nyipici. Nge tro “hmaca kö nyidrëti a bëeke tun”—tha tro kö a nyi pengön, nge tro hi itre ka mele nyipici a öhn la ijine celë hë nyidrë. Tro angatr a öhnyi nyidrë a kola mus ngöne la Baselaia.

Thupene lai, hnene la itre aposetolo hna bëeke hmaca a tro Ierusalema. Nge itre drai thupen, angatr a icasikeu jë me itre xa atre dreng. Ce angatr me “Maria thine i Iesu, me itre jini nyidrë,” me itre xane ju kö. (Itre Huliwa 1:14) Angatr a catre thith. Nge ame la ketre ewekë hnei angatr hna thithi fë, tre troa iëne la ketre atre dreng, matre nyihna i Iudra Isakariota. Tro hë a pexeje la etrune lo itre aposetolo, ala 12. (Mataio 19:28) Aja i angatr troa iëne la ketre atre dreng ka sine la huliwa i Iesu, me mele hmaca i nyidrë. Matre angatr a uthi trikitre jë troa atre la aja i Akötresie. Thupene lai, tha tro hmaca kö a qeje uthi trikitr hnine la Tusi Hmitrötr. (Salamo 109:8; Ite Edomë 16:33) Haawe, Matias la hna iën, ketre ne lo ala 70 hnei Iesu hna upe troa cainöj, matre hna “ce e angeice memine lo ala 11 lao aposetolo.”—Itre Huliwa 1:26.

Treene lao drai thupene la Iesu a elë hnengödrai, kola ha Feetëne e Ierusalema la Penetekos 33. Ala 120 lao atre dreng ka icasikeu e koho ngöne la hnahag. Ame hna aca tro nyi mej hnine la hnahag, kösë kola hnahna eny. Nge mama pi hi hune la he ne la nöjei atr, la itre ukahlokine eë kösë thinem. Matre itretre dreng a ithanatane jë la nyimu qene hlapa. Iesu hi lai a eatrëne lo hna sisinyi troa hamë uati hmitrötr!—Ioane 14:26.