Traqa ha ngöne la “hnaasikisine hawa,” maine e midi. Aca tro miti ju hi, “jidri ju hi la nöj asë, uti hë la hnaanaenene hawa,” maine 3:00 e hnaipajö. (Mareko 15:33) Tha treu kö la ka thunge la jö, ke hna traqa hi la ewekë cili e kola ija treu. Ngo ame la ijine Paseka, tre ijine dreumatreu. Ketre, qea catre pi kö la kola mit la drai cili. Haawe, Akötresieti hi la qaane la ewekë celë!

Pane mekune jë la aqane xou ne la itre ka hnyimasai Iesu. Ngöne la ijine jole cili, hnene la foa lao föe hna easenyine la sinöe ne iaxösisi. Kolo thine i Iesu, me Salome, me Maria Magadalena, me Maria thine i Iakobo ka Co.

Ioane aposetolo me thine i Iesu a ce cil “ezine lo sinöe hna athipi Iesu ngön.” Maria a goeëne la nekö i eahlo, lo hnei eahlo hna hnahon me thupën, a kola akötr. Ame koi Maria, kösë kola “thin axulune la hni [eahlo] hnei taua.” (Ioane 19:25; Luka 2:35) Ngacama akötre catre Iesu, ngo nyidrëti pe a mekune la thine i nyidrë. Matre, nyidrëti a catreihni jë troa xei koi Ioane, me qaja kowe la thine i nyidrë ka hape: “Nenë, qaane enehila, angeice pë hë la nekö i eapo.” Thupene lai, nyidrëti a amamai Maria me hape koi Ioane: “Eahlo pë hë la thine i eö!”—Ioane 19:26, 27.

Iesu a ahnith la thine i nyidrë koi Ioane, lo aposetolo hnei nyidrëti hna hnim, ke ma sine föe hë Maria. Atre hi Iesu ka hape, tha lapaune pala kö la itre jini nyidrë. Matre nyidrëti a hnehengazone la thine i nyidrë, ene la ka nyipiewekë kowe la mele i eahlo, me imelekeu i eahlo me Akötresie. Drei la ketre tulu ka lolo koi së!

Matre ame hë la kola troa lai hmaca, öni Iesu: “Eni a pi ij.” Nyidrëti lai a eatrëne la ketre hna perofetan. (Ioane 19:28; Salamo 22:15) Drenge hi Iesu laka, tha Keme i nyidrëti hmaca kö a thupë nyidrë. Qa ngöne lai, tro ha tupathe hnyawa la aqane mele nyipici i nyidrë. Thupene lai, Keriso a suene jë la ketre ewekë qene Arama ne Galilaia. Öni nyidrë: “Eli, Eli, lama sabachthani?” kola hape, “Akötresie, Akötresinge fe, hnauëne la nyipëti a nue ni?” Itre ka cil e cili a mekune menune koilo, me hape: “Goeën! Angeic a hë Elia.” Matre ketre a nyinyape pi me trapine la wene koto ngöne lo waina hna nyinyikön, me amë hune la hainy, me line koi Iesu. Ngo öni itre xan: “Ke nue pi! Matre wange jë së ka hape, tro kö Elia a hane traqa troa amele angeic.”—Mareko 15:34-36.

Iesu a sue jë ka hape: “Ase hë ni kuca la nöjei ewekë hnei nyipëti hna amekötine koi ni!” (Ioane 19:30) Eje hi, eatr ase hë la itre huliwa hnei Akötresie hna upi Iesu troa kuca e celë fen. Thupene lai öni Iesu: “Kakati fe, eni hë a nue la melenge koi nyipë.” (Luka 23:46) Iesu a nue la mele i nyidrë koi Iehova, ke atre hnyawa hi nyidrë ka hape, tro hmaca kö Iehova a hamë nyidrë. Ka catre la mejiune i Iesu, matre nyidrëti a meci pi.

Ame hna traqa pi la ketre sa atraqatr, nge kaqa pi hi la itre etë ka tru. Atraqatre pi hë  la sa, ene pe, nganga pi hi la itre hua e tröne Ierusalema, nge kola sesë la itre ngönetrei ka mec. Matre ame la itre ka tro e cili, nge ka öhne la itre ngönetrei, angatr a lö jë kowe la “traon ka hmitrötr,” me qaja asë la hnei angatr hna öhn.—Mataio 12:11; 27:51-53.

Ame hë la Iesu a mec, aca tro zezenyi pi hi la irido ne la Uma Ne Hmi. Kolo irido ka qea nge ka hace, lo ka aisane la hnahag Gaa Hmitrötr me Gaa Nyipi Hmitrötr. Akötresieti hi lai a amamane la trenge hni i nyidrë kowe la itre ka humuthe la Nekö i nyidrë, nge kolo fe a amamane laka, ase hë fe gojenyi kowe la Gaa Nyipi Hmitrötr, ene la hnengödrai.—Heberu 9:2, 3; 10:19, 20.

Xou ju hi la nöjei atr. Matre önine la tane la itre sooc ka humuthi Iesu ka hape: “Nyipici, Nekö i Akötresieti hi la atre celë.” (Mareko 15:39) Ma hnei angeice jë hna hane sine la kola kootrë Iesu troa atre ka hape, Nekö i Akötresieti jë kö? Ngo enehila, xecie hnyawa ha koi angeic ka hape, pëkö engazo i Iesu, nge nyidrë la Nekö i Akötresie.

Itre xan a sesëkötre la ewekë ka traqa, matre ame hë la angatr a bëeke koi hnalapa, angatr a “xexe imano,” hatrene akötr me hmahma ka tru. (Luka 23:48) Ala nyimu fe la itre föe ka goeëne qa gaa nany, itre xa sinatronge i Iesu. Angatr a hleuhleu pine la itre ewekë ka traqa.