Kola ha nyipune la hnaipajö ne Draikatru 14 Nisan. E lö hë la jö, tro ha nyiqaane la Sabath ne 15 Nisan. Meci hë Iesu, ngo mele pala kö lo lue atrekënö ezi nyidrë. Nge thenge la wathebo, tha tro kö a nue la ngönetrei ka mec troa thip “hune la sinö’ e jid,” ngo tro pe a canga keleme “la drai cili.”—Deuteronomi 21:22, 23.

Ketre, hna hëne la Draikatru ka hape, Drai Ne Hnëkë, ke angetre Iudra a hnëkë xeni koi elany, ke drai Sabath elany. Angatr fe a afenesine la itre huliwa nyine troa canga kuca. Matre ame hë la kola lö la jö, kolo fe a nyiqaane la Sabath “ka ketre pengön.” (Ioane 19:31) Ka ketre pengön la Sabathi cili, ke ame la 15 Nisan, tre pane drai ne la sevene lao drai ne feetëne la Itre Falawa Ka Pë Levenen. Nge hna hëne pala hi la pane drai ka hape, Sabath, ngacama ketre drai ju hë ne la wiik. (Levitiko 23:5, 6) Ngo ame la macatre cili, hna nyiqaan e Mecixen la pane drai ne Feet. Kolo drai Sabath koi angetre Iudra, haawe, pine laka, kola ihmeku la lue Sabath, hna hëne la drai cili ka hape, “Sabath ka ketre pengön.”

Matre angetre Iudra a sipo Pilato troa xatua Iesu me lue atrekënö troa mec. Hna tune kaa? Troa axeciëne la lue waca i angatr. Qa ngöne lai, tha ijiji angatre hë troa mano hnyawa. Itre sooc a tro ju troa axeciëne la lue ca ne la lue atrekënö. Ngo tha Iesu kö, ke kösë meci hë nyidrë. Kolo hi lai a eatrëne la Salamo 34:20, kola hape:  “Nyidëti a thupëne la ite [june] i angeic’ asë; tha tro kö a xecie la kete.”

Ngo hnene la ketre sooc hna thine la wengesisila i Iesu, uti hë la götrane la wenethëhmi. Angeic a pi atre ka hape, meci hnyawa kö nyidrë. ‘Ame hna neni pi la madra me tim.’ (Ioane 19:34) Nge kolo hi lai a eatrëne la ketre hna cinyihan, kola hape: “Tro angat’ a [goeën] lo hnei angate hna thin.”—Zakaria 12:10.

Iosefa fe e cili, “ketre trahmanyi qa Arimathea,” nge atre ka hlemu ngöne la Hnakootr Ka Tru. (Mataio 27:57) Hna qeje angeic ka hape, “atr ka meköt, nge ka lolo thiina,” nge atre “lapa treqene [ . . . ] la Baselaia i Akötresie.” Angeice la “ketre atre drei Iesu [ . . . ] ngo pine laka, xou i angeic e angetre Iudra, angeic a juetrëne lai,” ngo tha sajuëne kö angeic troa humuthi Iesu. (Luka 23:50; Mareko 15:43; Ioane 19:38) Enehila, Iosefa ha cilëgöli Iesu, angeic a tro ju koi Pilato troa sipone la ngönetrei Iesu. Pilato a hëne jë lo tane sooc ka sine lo kola humuthi Iesu, nge angeic a jelenyipicine jë ka hape, meci hë Iesu. Matre Pilato a kapa jë la sipo i Iosefa.

Iosefa a itöne jë la itre maano lino ka wië, me autine la ngönetrei i Iesu. Angeic a hnëkëne jë me atuthe la ngönetrei Iesu troa kelem. Nge hnei Nikodremo fe hna hane ixatua, ene “lo atre tro troa wai Iesu e jidr.” (Ioane 19:39) Angeic a traqa fë la 33 kilo ne muro, hna thue nyikön hnei aloes. Haawe, hnei nyidroti hna atuthe la ngönetrei Iesu hnei itre mano lino, me itre dröne hnitr ka pui lolo, thenge lo aqane kele wezipo i angetre Iudra.

Tha nanyi kö qa cili la hua hnei Iosefa hna itön, hua ka hnyipixe hna kuj hnine la git. Matre hna amë e cili la ngönetrei Iesu. Thupene lai, hna thinge la hnë lö hnene la ketre etë atraqatr. Hna keleme nyimenyimë Iesu qëmekene troa nyiqaane la Sabath. Nge ma hnei Maria Magadalena jë me Maria thine i Iakobo ka co, hna hane ixatua troa hnëkëne la ngönetrei Iesu. Nyidroti a canga bëeke jë koi hnalapa “troa hnëkëne la itre dröne hnitre me oele ka pui lolo,” nyine köle la ngönetrei Iesu thupene la Sabath.—Luka 23:56.

Ngöne la drai thupen, e Sabath, hnei itre tane i angetre huuj me itre Faresaio hna tro koi Pilato me hape: “Mekune hmaca ha huni lo hna qaja hnene lo atre thoi ka hape, ‘Thupene köni drai, tro ha amele ni hmaca.’ Matre, pane amekötine jë nyipë troa thupëne la hua uti hë la hnaakönine drai, wanga tro la itretre drei angeic a atrekënö la ngönetrei, me qaja kowe la itre atr ka hape, ‘Hna amele angeice hmaca qa hna mec!’ Ke ame hë e cili, loi ju kö lo tro hnapan.” Öni Pilato koi angatr ka hape: “Nga xome jë hö nyipunie la itretre thup matre thupëne la hua.”—Mataio 27:63-65.

E hmahmakany, thupene la Sabath, hnei Maria Magadalena, me Maria thine i Iakobo me itre xa föe, hna tro kowe la hua me itre dröne hnitr, troa kuca la ngönetrei Iesu. Angatr a ihnyingënekeune ka hape: “Drei la ka troa ukune koi së la etë qa ngöne la hnë lö?” (Mareko 16:3) Ame hna traqa pi la ketre sa, nge itre angela i Akötresie a ukune jë la etë. Ngo patre hë la itre ka thup me ngönetrei Iesu!