Ngacama ase hë lep angazo Iesu me hnyimasai nyidrë, me isin hnei Pilato troa nue Iesu, ngo xele pala ha itre hene ne hmi. Pëkö ka troa sewe angatr troa humuthi Iesu. Angatre pala hi a suene ka hape: “Athipi angeice ju hune la sinöe! Athipi angeice ju hune la sinöe!” Matre sa jë hi Pilato ka hape: “Nga ketre xomi angeice jë nge humuthi angeice pi, ke pëkö ngazo hnenge hna öhne thei angeic.”—Ioane 19:6.

Tha kapa ju kö Pilato la kola nyizö Iesu pi politik, ngo tune kaa ju hë göi hmi? Angatr a qaja hmaca jë ka hape, hnei Iesu hna silitrengathoi Akötresie tune lo aqane qaja i angatr ngöne Hnakootr Ka Tru. Öni angatr: “Hetre wathebo hun, nge thenge la wathebo cili, tro hë angeic a mec, ke hnei angeic hna sipu qeje angeic ka hape, nekö i Akötresie.” (Ioane 19:7) Ewekë ka hnyipixe koi Pilato.

Angeic a lö hmaca pi kowe la uma troa thele jën troa amelene la atre ce, atre catr qëmekene la iaxösisi, nge atre hna pu ngazo hnei föi angeic. (Mataio 27:19) Nge önine fe la angetre Iudra ka hape “Nekö i Akötresie” Iesu! Ngo atre hi Pilato laka, atre Galilaia Iesu. (Luka 23:5-7) Matre angeic a hnyingë Iesu hmaca ka hape: “Atre kaa eö?” (Ioane 19:9) Hapeu, Pilato kö a mekun laka, hnei Iesu hna pane mel e hnengödrai, nge ketre akötresie nyidrë?

Ketre, ase hë Iesu lo qaja koi Pilato laka, joxu nyidrë, nge tha qa celë fene kö la Baselaia i nyidrë. Matre tha sa pi kö Iesu me qejepengön atrun. Dreng akötrëne pi hë Pilato, matre öni angeice koi Iesu: “Xele kö eö ma sa koi ni? Thatre kö eö ka hape, eni hi la ka troa amekötine troa nue eö maine humuthi eö?”—Ioane 19:10.

Sa jë hi Iesu ka hape: “Thatreine jë kö nyipëti musinë ni e tha ka qaa kö hnengödrai. Celë hi matre ame la atre nue ni koi nyipë, tre, ka tru catre kö la ngazo i angeice hui nyipë.” (Ioane 19:11) Tha Iesu kö a qeje ketre atr. Ngo eje hi laka, tru catre kö la zö i Kaiafa me itre sine xöle i angeic, me Iudra Isakariota hui Pilato.

Pilato pala hi a haine la aqane ujë me trengewekë i Iesu, nge angeice fe a xouene laka, ka qa hnengödrai nyidrë, matre angeic a thele hmaca jë troa nue Iesu. Ngo angetre Iudra a axouenyi Pilato jë me hape: “E tro eö a nue la atre cili, tha sinexöle i Kaisara hmaca kö eö, ke ame la atr acili angeic troa joxu, ithupëjia lai me Kaisara.”—Ioane 19:12.

Pilato a lö sai Iesu hmaca jë e trön, me të hune la ita ne iameköti, nge öni angeic: “Hane hi la Joxu i nyipunie!” Ngo kolo jë pe hi ka hape, sue catre hmaca jë angatr ka hape: “Humuthi angeice pi! Humuthi angeice pi! Athipi angeice ju hune la sinöe!” Öni Pilato hmaca kö: “A tro ni a humuthe la Joxu i nyipunie?” Ngacama cane methi angetre Iudra la musi Roma, ngo itre tane i angetre huuj a suene jë ka hape: “Pëkö ketre joxu hun, Kaisara hmekuje hi.”—Ioane 19:14, 15.

Pilato a kei thenge angatre jë, me nue angatr troa humuthi Iesu. Itre sooc a una pi la iheetre ka maea ngön, me heetrë nyidrëti hmaca jë la itre iheetre i nyidrë. Nge qa i nyidrë troa ajöne trongëne la sinöe ne iaxösisi.

Easë hë e Draikatru 14 Nisan. Tha meköle kö Iesu qaane Draikaco e hmakany uti hë enehila, nge ketre, hna traqa itrai la itre iaxösisi. Ngacama Iesu a catreihni troa xututhe la sinöe, ngo kola ha pë trengecatre i nyidrë. Matre hnene la itre sooc hna musinëne la ketre atr troa xatua Iesu, Simona la ëjen, atre Kurene e  Afrik. Ala nyimu la itre ka ixötrethenge, nge hetre itre ka xexe imaano hnei hleuhleu, nge angatr a treije pi Iesu.

Öni Iesu jë hi kowe la itre föe ka treije pi nyidrë: “Nekö jajinyi ne Ierusalema, the treije pi ni kö. Ngo treije pi nyipunieti jë pe, me itre nekö i nyipunie; ke hanawang! Tro ha traqa la itre drai ne tro la itre atr a qaja ka hape, ‘Madrine la itre föe ka thatreine hnaho, me ka tha hnaho petre kö, me itre ka tha iji thi nekönatr!’ Nge tro hë angatr a qaja kowe la itre wetr ka hape: ‘Mala pi koi hun!’ nge koi itre sasala, ‘Juetrë huni ju!’ Maine angatr a ujë tune nge ka ija petre kö la isinöe, nga ue ju hë elanyi e meci pi?”—Luka 23:28-31.

Iesu a qaja la nöje Iudra. Kola aceitunëne me sinöe ka troa mec. Ngo ka ija petre kö ke Iesu pala hi la, nge hetre angetre Iudra ka mejiune koi nyidrë. Ngo e traqa jë Iesu mec, nge itretre drei nyidrë a trotrije la hmi i angetre Iudra, tro hë la nöj a qaqacil tune la sinöe ka mec. Ala nyimu e cili la itre ka troa treij, ke tro Akötresie a huliwane la itre sooce i angetre Roma troa nyithupene kowe la nöje ce!