Qëmekene troa othi Iesu, hnei itre aposetolo hna xou me nuaxöji nyidrë. Ngo hnene la lue xan hna pane cil me bëek. Ce Peteru “memine la ketre atre dreng,” ma Ioane. (Ioane 18:15; 19:35; 21:24) Ma nyidroti hmaca a öhnyi Iesu la kola tro sai nyidrë koi Ana. Matre ame hë la Ana a upi Iesu koi Kaiafa, atre huuje ka sisitria, nyidroti a ixötrethenge qa gaa nany. Nyidroti a xoue mec, me seseu kowe la Maseta i nyidro.

Atre Ioane hi hnene la atre huuj, matre hna nue angeic troa lö kowe la götrane gaa pë ihakun ne la hnalapa i Kaiafa. Ngo cile qëhnelö ju pe kö Peteru, uti hë la Ioane a bëek, me ithanata memine la hlu ka cilë qëhnelö, ketre nekö jajiny. Ame hna lö jë hnei Peteru.

Kola hnötre la jidri cili, matre hnei itre xan hna nyiqaane athi eë. Peteru a ce lapa ju me angatr troa hleng, me treqene “la ka troa traqa” koi Iesu. (Mataio 26:58) Ngo pine laka, mele hnyawa ha la eë, hnene lo nekö jajiny ka alö Peteru hna goeë angeice hnyawa. Matre önine lai hlu: “Tha nyipëti kö la ketre atre drei angeic?” (Ioane 18:17) Nge tha angeice casi kö la ka wangatrehmekun me catre fë ka hape, Peteru la ketre sinee i Iesu.—Mataio 26:69, 71-73; Mareko 14:70.

Jole hë Peteru, matre öni angeic: “Thatre angeice kö ni, nge ketre tha trotrohnine kö ni la hnei eö hna qaja.” (Mareko 14:67, 68) Angeic a sisinyi jë ka hape, thatre Iesu kö angeic, matre e traqa jë angeice thoi, tro hë Akötresie a të koi angeic.—Mataio 26:74.

Peteru a ithanata nge kolo pala hi a kootrë Iesu, ma ngöne la ketre hnahag ka draië hune la götrane gaa pë ihakun. Matre qa cili, ijiji Peteru me itre xan troa goeëne la itretre anyipicin ka traqa me tro.

Ngo atre hi la itre atr ezi Peteru laka, angeic a thoi, ke angeic a ithanata tune la itre atre Galilaia. Nge hnene la ketre hna qaja lo ka traqa koi Maliko, hlu hnei Peteru hna thupa la hnagenyë. Matre angeic a nyixane jë me hape: “Hnenge lo hna öhnyi eö me angeic ngöne la hlapa, eje hi?” Matre ame ju hi la Peteru a akönia catre fë ka hape, thatre Iesu kö angeic, kukahleke pi hi la trotro, tune lo aqane qaja i Iesu.—Ioane 13:38; 18:26, 27.

Ngöne la ijine cili, Iesu a cil ngöne ibalko hune la götrane gaa pë ihakun. Matre nyidrëti a thaujë jë, me goeë tili Peteru. Ma celë hi ka ketre la hni angeic. Angeic a mekune hmaca jë lo hnei Iesu hna qaja ekula. Pane mekune jë la aqane hace i Peteru! Matre Peteru a tro ju e trön, me treije latresi.—Luka 22:61, 62.

Hnauëne la angeic a tun? Itre hawa qëmeken, ka xecie hnyawa koi Peteru laka, atreine hi angeic mele nyipici. Ngo hnauëne hö la angeic a xelene la Maseta i angeic? Hnei angeic hna xou, ke itre atr a trotrohnine menune la itre trengewekë i Iesu, nge angatr a aceitunë nyidrë me atre ka kuca la ngazo. Maine ju, tro hi Peteru a cilëgöli Iesu, ngo hnei angeice pe hna xelene la Atre ka hetre “trengewekë ne mele ka pë pun.”—Ioane 6:68.

Kolo hi lai a amamane laka, ka lapaune ju hë ketre nge ka mele nyipici, ngo ijiji angeice fe troa kei. Tro angeice a kei ke tha ka hnëkë kö, nge tro la itupath a asesëkötrë angeic. Haawe, tulu lai nyine hmekëne la nöjei hlue i Akötresie enehila!