Tha Iesu kö a thele troa juetrëne koi Pilato laka, joxu nyidrë. Ngo ame pe, tha tro kö la Baselaia i nyidrë a cile kowe la musi angetre Roma. Ke öni nyidrë: “Tha ka qaa kö celë fene la Baselaiang, ke maine ka qaa ju la fene la Baselaiang, tro hë la itre hlueng a isine matre tha tro kö a nue ni koi angetre Iudra. Ngo eje hi laka, tha ka qaa kö la fene la Baselaiang.” (Ioane 18:36) Eje hi, hetre Baselaia i Iesu, ngo tha e celë fene kö.

Ngo Pilato pala kö a hnying, öni angeic: “Haawe, joxu eö?” Iesu a amamane jë koi Pilato laka, meköti hi la aqane trotrohnine i angeic. Öni Iesu: “Nyipëti lai ka qaja ka hape, joxu ni, ngo ame la kepin matre hnaho ni jë, nge uti pi ni kowe la fen, tre göi troa anyipicine la nyipici. Matre ame asë hi la nöjei atr ka sajuëne la nyipici, angatr a drenge la aqane ewekëng.”—Ioane 18:37.

Hnei Iesu lo hna qaja koi Toma ka hape: “Eni hi la gojeny, me nyipici me mel.” Nge enehila, drenge fe hë Pilato la kepin matre Iesu pi e celë fen, ene la troa anyipicine “la nyipici.” Nyipici göne la Baselaia i nyidrë. Ka xecie hnyawa koi Iesu laka, tro nyidrëti a mele nyipici, ngacama tro ju hë nyidrëti a mec. Öni Pilato jë hi: “Nemene la nyipici?” Ngo tha aja i angeice kö tro Iesu a sa. Ame koi angeic, ijiji hë la hnei angeic hna dreng troa amekötine la atre ce.—Ioane 14:6; 18:38.

Pilato a tro ju kowe la ka ala nyimu e trön. Nge ma ce Iesu jë me angeic. Öni angeic koi itre tane i angetre huuj: “Pëkö hnepe ngazo hnenge hna öhne thene la atre celë.” Elëhni jë hi angatr, matre angatr a catre fë pi ka hape: “Angeic la atre agomegomëne la nöje Iudra asë, hna nyiqaan e Galilaia uti hë la.”—Luka 23:4, 5.

Sesëkötre pi kö Pilato la aqane pi hun i angetre Iudra. Itre tane i angetre huuj me itre qatre ne la nöj a isueny, nge Pilato a hnyinge jë koi Iesu ka hape: “Tha drenge kö eö la nöjei ewekë hnei angatre la hna qaja göi eö?” (Mataio 27:13) Pë pi kö meje i Iesu. Nge Pilato a haine la aqane tingetinge Iesu, ngacama kola qajangazo nyidrë.

Ame la angetre Iudra a qaja ka hape, hnei Iesu ‘hna nyiqaan e Galilaia,’ trotrohnine ju hi Pilato laka, atre Galilaia Iesu. Haawe, mekune jë hi Pilato la aqane tro angeic a neëne troa ameköti Iesu. Herodra Anetipa (nekö i Herodra Ka Tru) la joxu ne Galilaia, nge angeic e Ierusalema la ijine Paseka. Haawe, Pilato a upi Iesu jë koi Herodra, lo Herodra ka thupa la nyinawa i Ioane. Nge angeice lo ka mekune menune ka hape, ame la Iesu ka kuci iamamanyikeu, tre Ioane hna amelene hmaca.—Luka 9:7-9.

Madrine catre Herodra troa iöhnyi me Iesu. Tha hnene kö laka, aja i angeic troa xatua Iesu, maine wange ka hape, ka nyipici kö la hna qaja göi nyidrë. Herodra pe a pi atre, me wai Iesu e kuci “iamamanyikeu.” (Luka 23:8) Ngo tha kuca pi kö Iesu. Ame la Herodra a hnyinge koi Iesu, tha sa pi kö nyidrë. Dreng akötrëne pi kö angeic, matre hnei Herodra me itre sooce i angeic hna “nyiqaane qenahmo nyidrë.” (Luka 23:11) Angatr a heetrë nyidrëti jë la ketre iheetr ka tru thupen, me hnyimasai nyidrë. Thupene lai, Herodra a upi Iesu hmaca jë koi Pilato. Lue ka imethinë Herodra me Pilato, ngo enehila, lue treme sinee hë.

Ame hë la Iesu a bëek, hnei Pilato hna hëne la itre tane i angetre huuj, me itre hene nöj i angetre Iudra, me itre atr, nge öni angeic: “Hnenge hna waipengö i angeic qëmeke i nyipunieti asë, ngo tha öhne kö ni la hnei nyipunieti hna nyizö angeic. Nge tui Herodra fe, ke hnei angeic hna upe hmaca la atre celë koi së, nge hanawang!  Pëkö ngazo hnei angeice hna kuca matre troa humuthi angeic. Ngo tro hi ni a pane thaucë angeic, me nue angeice hmaca.”—Luka 23:14-16.

Aja i Pilato troa nue Iesu, ke atre hi angeic ka hape, itre tane i angatre huuj a pi hun, celë hi matre angatr a othi Iesu. Nge ame la angeic a isine troa nue Iesu, traqa ju hi ketre a acatrene la mekuna i angeic. Ame la angeic a të hune la ita ne iameköti, xulu pi hi la ketre atre tro fë maca, hna upe hnei föi Pilato. Öni eahlo: “Nue pi lai atre ka meköti cili, ke ase petre hi ni pu ngazo göi angeic.”—Mataio 27:19.

Tro Pilato a nue tune kaa la atre ce?