Drai tixenuë i Iesu hnine la uma ne hmi, nge nyidrëti pala hi a amamane la aqane huliwa thoi i itre Faresaio me itretre cinyihan, me jele atre thoi angatr. Nyidrëti fe a hamë ceitun nyine amamane la pengöi angatr. öni nyidrë: “Nyipunieti a wasine la tröne kap me pala, ngo tiqa lue ej hnei pi hetrenyi me aja hna thatreine xome hnöth. Itre Faresaio ka timek, pane wasine pi la hnin ne la kap me pala, matre porope jë fe la trön.” (Mataio 23:25, 26) Itre Faresaio a thupëne troa trongëne hnyawa la nöjei neköi hna amekötin göi iahmitrötrë, ngo luzi pë hë göi thiina, ke tha ahmitrötrëne kö angatr la itre hni i angatr.

Angatre fe a nyinyape troa xup amingömingöne la hua ne la itre perofeta. Ngo öni Iesu koi angatr: “Nyipunie la matrane lo itre ka humuthe lo itre perofeta.” (Mataio 23:31) Nge mama hi, ke angatr a isine troa humuthi Iesu.—Ioane 5:18; 7:1, 25.

Thupene lai, Iesu a qaja jë la pun e xele kö angatr ma ietra. Öni nyidrë: “Itre un, matra ne vaipa, tro nyipunieti a kötrene tune kaa la hnëjine ne la Gena?” (Mataio 23:33) Ame la “Gena,” tre kola hape, “Hnathup e Hinom.” Hna huliwane la hnathupe cili troa dreuthetrije la itre salite. Kola nyihatrene laka, tro ha apatrene paluane la itre Faresaio me itretre cinyihane ka ngazo.

Nge ame la itretre dreng, tro angatr a nyi qeneqaja i Iesu, tro angatr a “itre perofeta, me itre ka inamacan, me itretre hamë ini.” Hapeu, tro kö a kepe angatr? Iesu a qaja jë koi itre hene ne hmi ka hape: “[Tro] nyipunieti pe [a] humuth me jei faonyi itre xan, me wameucë itre xan ngöne la itre sunago i nyipunie, me axösisi itre xan ngöne la ketre traon me ketre traon. Matre tro ha atë hui nyipunie la madra ne la itre ka mele nyipici asë, qaane lo madra i Abela, atre hna jele mekötin, uti hë la madra i Zakaria nekö i Barakaia lo hnei nyipunieti hna humuth nyipine la uma ne hmi me ita ne huuj. Nyipici, eni a qaja hnyawa koi nyipunie, troa traqa asë lai kowe la xötre atr celë.” (Mataio 23:34-36) Celë hi ka traqa e 70 M.K., lo kola lep apatrenyi Ierusalema hnei angetre Roma, nge hna meci la itre thauzan lao atre Iudra.

Hace la hni Iesu troa mekun la ewekë ka troa traqa koi angatr. Matre öni nyidrë: “Ierusalema, Ierusalema fe, atre humuthe lo itre perofeta, me trane lo itre hna upe koi eö! Anyimua thele ni troa icasinekeune la itre nekö i eö, tune la ithine ne gutu a hajuhajum la ha nekön fene la lue hna iape ne ej, ngo xele kö nyipunie. Hanawang! Ase hë nuetrije la uma i nyipunie.” (Mataio 23:37, 38) Ma kolo jë a hnying hnei itre ka dreng ka hape, nemene la “uma”? Nyidrëti kö a qaja la uma ne hmi ka mingöming, lo hna mekune ka hape, hna thupën hnei Akötresie?

Thupene lai öni Iesu: “Eni a qaja hnyawa koi nyipunie laka, tha tro hmaca kö nyipunieti a öhnyi ni uti hë la tro nyipunie a qaja ka hape: ‘Manathithi la atre traqa ngöne la ëje i Iehova!’ ” (Mataio 23:39) Nyidrëti a amekunëne lo hna perofetan ngöne Salamo 118:26, kola hape: “Manathithi angeice la ate traqa ngöne la [ëje] i Iehova; eëhuni a amanathithi nyipunie qa hnine la [uma ne hmi] i Iehova.” Tro la itre atr a qaja la itre trengewekë celë, ngo tha ngöne kö la uma ne hmi e Ierusalema, ke tro ha lep apatren.

Enehila, Iesu a tro kowe la hnë kuië mani ngöne la uma ne hmi. Hetrenyi e cili la itre neköi  trengen, nge itre atr a kuië mani qa ngöne la neköi gaa xulu. Ala nyimu la angetre Iudra hnei Iesu hna öhn ka traqa troa kuië mani. Hetre trenamo “ka kuië pies atruny.” Ame hnei Iesu hna öhne la ketre sine föe ka pë ewekë, a kola kuiëne la “lue neköi pies ka co catr.” (Mareko 12:41, 42) Atre hnyawa hi Iesu laka, Akötresie a madrine kowe la ahnahna i eahlo.

Iesu a hëne jë la itretre dreng, me hape: “Eni a qaja hnyawa koi nyipunie laka, tru catre kö la hna kuiëne hnene la sine föe celë ka pë ewekë hnine la hnë kuië mani, hune la itre xan.” Hnauën? Öni nyidrë: “Ke hnei angatr asë hi hna kuiën qa ngöne la trengamo i angatr, ngo hnei eahlo pe hna hamëne la hnepe hnei eahlo hna hetreny, nge nyine mele i eahlo.” (Mareko 12:43, 44) Isa pengöi eahlo kö me itre hene ne hmi!

Kola ha fenesi la drai 11 Nisan, nge Iesu a tro ju qa hnine la uma ne hmi. Matre önine la ketre atre dreng ka hape: “Atre Ini fe, goeën! Mingöminge catre la itre etë memine la iuma celë!” (Mareko 13:1) Eje hi laka, iatraqatre pi hë la itre xa etë ne la itra etë, nge kösë ka catr nge ka troa cile hut. Matre tha nyipi trotrohnine kö angeic la Iesu a qaja ka hape: “Öhne hi eö la iuma atraqatre celë? Tha tro kö a të e celë la ketre etë hune la ketre etë, ke tro ha thëtrij asë.”—Mareko 13:2.

Thupene lai, Iesu me itretre dreng a tro sasaithe ju la sasala ne Kederon, me elëne la Wetr Elaio. Ce nyidrë me foa lao aposetolo—Peteru, me Anederea, me Iakobo, me Ioane. Nge qa cili, angatr a goeëne la aqane zane la uma ne hmi.