Iesu pala kö me itretre dreng hune la Wetr Elaio, nge nyidrëti a hamë angatre la ketre ceitun. Itre hnepe drai qëmeken e Ieriko, hnei Iesu hna hamëne la ceitun ne la itre mina troa amamane ka hape, tro pala kö a itreqe qëmekene troa traqa la Baselaia. Enehila, nyidrëti a hamëne la ketre ceitun ka sa la hnying göi ijine celë hë nyidrë, me ijine troa nyipune la fene celë. Kola amamane koi itretre dreng laka, nyipiewekë tro angatr a akötrehni huliwa.

Öni Iesu: “Ceitune fe la Baselaia ne hnengödrai memine la ketre trahmanyi ka tro koi gaa nany. Qëmekene troa tro, hnei nyidrëti hna pane ahnithe kowe la itre hlue i nyidrë la itre ewekë i nyidrë.” (Mataio 25:14) Ase hë aceitunë Iesu me nekö i joxu ka tro gaa nany “troa acili joxu angeic,” matre atre hi itre aposetolo ka hape, Iesu hi lo lai “trahmany.”—Luka 19:12.

Ngöne la ceitun, qëmekene tro la trahmany a tro gaa nany, hnei angeic hna pane ahnith koi itre hlu, la itre ewekë i angeic ka tru thupen. Ketre tun, ngöne la köni macatre nge sin ne cainöje Iesu, hnei nyidrë hna catre cainöjëne la maca ka loi ne la Baselaia i Akötresie, me inine la itretre dreng tro kuca la huliwa cili. Enehila, nyidrëti ha tro, nge xecie hnyawa koi nyidrë laka, tro itretre dreng a eatrën la huliwa hna ahnithe koi angatr.—Mataio 10:7; Luka 10:1, 8, 9; wange ju Ioane 4:38; 14:12.

Hnene lo trahmanyi hna thawa tune kaa la itre ewekë i angeic? Öni Iesu: “Nyidrëti a hamëne pi kowe la ketre la faifi lao talan, nge koi ketre luetre, nge casi koi ketre. Matre nyidrëti a isa thawa pi koi angatr thenge la hna isa atrein, me tro.” (Mataio 25:15) Tro hë angatr a uëne la hna ahnith? Tro kö angatr a huliwane hnyawan matre kapa atrune hmaca hnei maseta? Öni Iesu koi itre aposetolo:

“Hnene lo hlue ka kapa la faifi lao talan hna canga huliwan, ame hna kapa hmaca kö la faifi lao xan. Nge hna tune mina fe hnene la ka kapa lo lue talan, hnei angeic hna kapa hmaca kö la lue xan. Ngo ame pë hë lo ka kapa la ca talan, hnei angeic hna sine la dro, me keleme la manie i maseta.” (Mataio 25:16-18) Nemene la pun e traqa pi maseta?

Öni Iesu: “Qea pi hë la hna paatre la maseta, ngo ame hë la nyidrëti a bëeke hmaca, nyidrëti a hnyingëne jë lo manie i nyidrë.” (Mataio 25:19) Hnene lo lue pane hlu hna huliwa catr, “thenge la hna isa atrein.” Haawe, lue atre lai ka huliwa hnyawa, nge ka huliwa catr, matre hnei nyidro hna isa kepe thangane la huliwa i nyidro. Hnene lo ka kapa la faif talan, hna nyixane hnei faif, nge hnene la ka kapa la luetre,  hna nyixane hnei lue xan. (Ngöne la ijine cili, tro la hlu a huliwa koi 19 lao macatre matre kapa la ca talan.) Matre casi hi la aqane qaja aloinyi nyidro hnei maseta, öni nyidrë: “Ka lolo catr, hlue ka loi me ka nyipici! Hnei eö hna nyipici kowe la ewekënge celë, haawe, tro ni a acili eö hune la itre ewekëng ka tru catre hmaca kö. Ce madrine jë memine la maseta i eö.”—Mataio 25:21.

Ngo tha hna tune kö kowe la ka kapa la ca talan. Öni angeic: “Atre hi ni laka, atre kö nyipëti la hnei nyipëti hna ajan, nge nyipëti a menuëne la itre götrane tha hnei nyipëti kö hna tran, me hleme la qitr hna jum hnei itre xan. Matre, hnenge hna xou, ame hnenge hna keleme la talane i nyipë. Ngo hane kö la ewekë i nyipë.” (Mataio 25:24, 25) Nge goi tha amë fe ngöne baak, matre nyi neköne la mani i maseta, kösë angeice lai a icilekeu me maseta.

Trotrohnine hi së la maseta a jele angeic ka hape, “hlue ka ngazo me ka geny.” Matre hna thapa la talane i angeic, me ahnithe kowe la hlu ka pi huliwa. Ame hnei maseta hna qaja la ini celë: “Ame la ka trene ewekë, tro hmaca kö a nyixan, matre mana catr angeic. Ngo ame la atre pë ewekë, tro fe a xome qaathei angeic lai hnepe hnei angeic hna hetreny.”—Mataio 25:26, 29.

Nyimu ini nyine tro la itretre dreng a mekun, nge tro fe angatr a mekune la ceitune celë. Trotrohnine hi angatr ka hape, Iesu a ahni huliwa koi angatr—troa inine la itre atr—huliwa lai ka nyipiewekë catr. Nge aja i Iesu tro angatr a huliwa catr. Ame pe, tha Iesu kö a amekötine troa ceitu la etrune la huliwa i angatr. Ngöne lo ceitun i nyidrë, hnene la lue hlu hna isa catre huliwa, “thenge la hna isa atrein.” Ngo eje hi laka, tha tro kö Iesu a madrin e tro ketre a “geny,” kola hape, tha angeice kö a akötrehni huliwa.

Drei la kola akeukawanyi itretre dreng la angatr a drenge ka hape: “Ame la ka trene ewekë, tro hmaca kö a nyixan”!