Iesu a ase sa la hnyinge itre aposetolo göne la ijine celë hë nyidrë, me ijine nyipune la fene celë. Nge jëne la ketre ceitun, nyidrëti a troa hamë itre xa ixatua koi angatr. Ngo tro pë itre ka mel ngöne la ijine celë hë nyidrë, a öhne la kola eatre lai hna perofetan.

Nyidrëti a nyiqaane la ceitun me hape: “Ceitune la Baselaia ne hnengödrai memine la treene lao nekö jajinyi ka isa tro fë laame cile troa itronyi memine la atre faipoipo. Thei angatr la faifi lao hmo, nge faifi lao ka inamacan.”—Mataio 25:1, 2.

Tha Iesu kö a hape, tro la sin ne la itre ka musi ngöne la Baselaia a hmo, nge tro la munën a inamacan. Nyidrëti pe a amamane koi itretre dreng laka, ame göne la Baselaia, isa qanyi angatre kö iën troa hmek, maine mekun menune koilo. Ngo atre hnyawa hi Iesu ka hape, ijiji angatr asë hi troa mele nyipici, me kepe manathith qaathei Kem.

Ngöne la ceitun, hnene la treene lao jajiny hna tro troa itrony memine la atre faipoipo. Huliwa i angatr troa thina gojenyi kowe la atre faipoipo, me atrunyi angeic la angeic a lö sai föe koi hnalapa. Matre tune kaa la tronge ne la itre jajiny?

Öni Iesu: “Hnene la itre ka hmo, hna xome trongë laam, ngo tha hna xomi oele kö. Ngo hnene la itre ka inamacan, hna xomi laame me oele ne trem. Hmitre pala ha la atre faipoipo,  ame hnei angatr asë hna imeköleny.” (Mataio 25:3-5) Tha canga traqa kö la atre faipoipo, tune lo hna mekun hnei itre jajiny. Matre angatr a imeköleny, ke nango qea pi hë la ijine itreqe. Ma itre aposetolo a mekune hmaca jë lo hna qaja hnei Iesu göne la nekö i Joxu. Hnei angeice lo hna tro gaa nany, nge “thupene la hna acili joxu angeic,” angeic a bëeke hmaca jë.—Luka 19:11-15.

Ngöne la ceitun ne la treene lao jajiny, Iesu a qaja jë la ewekë ka traqa la kola fetra la atre faipoipo. Öni nyidrë: “Ngo e hnenyipa jidri hë, sue jë hi la ketre me hape: ‘Hane hë la atre faipoipo! Tro jë a ixelë me nyidrë.’ ” (Mataio 25:6) Hapeu, ka hmeke kö nge ka hnëkë kö la itre jajiny?

Öni Iesu: “Ame hnene lo treene lao jajinyi hna mejë, me hnëkëne la itre laame i angatr. Nge sipo jë hi hnei itre hmo koi itre ka inamacane ka hape: ‘Sipo oel, ke easenyi hë troa pi la itre laame hun.’ Sa jë hi la itre ka inamacane ka hape: ‘Waea, ke wanga tha ijije pi koi hun me koi epun, ngo tro jë pe kowe la itre ka salem, matre hetrenyi jë fe epun.’ ”—Mataio 25:7-9.

Haawe, tha ka hnëkë kö me hmeke la itre hmo. Kola ha pë oel la itre laame i angatr, matre angatr tro ju troa thele oel. Ngo öni Iesu: “Ame ju hi la angatr a tro troa itö, traqa pi hi la atre faipoipo, matre ame lo itre jajinyi ka hnëkë hë, hnei angatr hna ce lö memine la atre faipoipo kowe la hnë nyikein, ame hna thinge ju la qëhnelö. Thupene lai, traqa pi hi lo itre xa jajiny, me hape: ‘Joxu, Joxu, thawa pi koi hun!’ Sa jë hi nyidrëti ka hape: ‘Nyipici, eni a qaja koi nyipunie, thatre nyipunieti kö ni.’ ” (Mataio 25:10-12) Luzi hë lo itre ka tha hmek me hnëkë!

Atre hi itre aposetolo laka, Iesu la atre faipoipo, ke ase hë qeje nyidrëti tun. (Luka 5:34, 35) Matre, drei la itre jajiny ka inamacan? Ame lo Iesu a qeje “itre mamoe ka xalaith,” lo itre ka troa musi ngöne la Baselaia, hnei Iesu hna hape: “Heetre jë, hnëkë jë, nge loi e mele la itre laame cile i nyipunie.” (Luka 12:32, 35) Haawe, trotrohnine hi itre aposetolo laka, Iesu a qeje itre atr ka tui angatr. Ngo nemene la ini?

Iesu a qaja mekötine jë koi itre aposetolo. Öni nyidrë: “Haawe, hmeke jë nyipunie, ke thatre kö nyipunieti la drai me hawa.”—Mataio 25:13.

Iesu hi lai a hmekëne la itretre dreng, me amamane laka, nyipiewekë tro angatr a “hmek,” ngöne la ijine celë hë nyidrë. Eje hi, tro nyidrëti a traqa, nge nyipiewekë tro angatr a hnëkë me hmek, tune lo ala faif. E tro angatr a tun, tha tro kö a luzi la thupene hna hnëkëne koi angatr.