Easenyi hë matre lai pi lo Peteru a akönia xele Iesu. Matre thupene la hna pane waipengöne lai jol hnene la Hnakootr Ka Tru, angatr a isa ije pi. Nge ngöne la drai thupen, e hmakanyi ne Draikatru, angatr hmaca a icasikeu, ma angatre jë a thele troa nyi ka meköt, ke ase petre hi angatr eni wathebo troa iameköti e hej. Matre kola lö sai Iesu.

Önine hmaca la Hnakootr ka hape: “Maine eö hi la Keriso, qaja jë koi hun.” Sa jë hi Iesu ka hape: “Maine qaja ju hë ni, ngo tha tro pi kö nyipunieti lai a jelenyipicin. Nge ketre, maine tro ni a hnyinge koi nyipunie, tha tro jë kö nyipunieti lai a sa.” Hnei Iesu hna catr, me qaja mekötine koi angatr laka, nyidrëti lo atre hna perofetan ngöne Daniela 7:13. Öni nyidrë: “Qaane enehila, tro hë la Nekö i atr a lapa ngöne la götrane maca ne la Akötresie ka men.”—Luka 22:67-69; Mataio 26:63.

Angatr hmaca a hnyinge ka hape: “Nga eö hi la Nekö i Akötresie?” Öni Iesu jë hi: “Nyipunieti kö la ka qaja.” Angatr a thele troa humuthi Iesu pine silitrengathoi Akötresie. Matre öni angatr: “Nyine ue hmaca la troa hetre atr anyipicin?” (Luka 22:70, 71; Mareko 14:64) Angatr a othi Iesu jë, me tro sai nyidrë kowe la Gavena i angetre Roma, Ponetio Pilato.

Ma öhne hi Iudra Isakariota la kola upi Iesu koi Pilato. Matre ame la angeic a trotrohnine laka, hna amekötine tro Iesu a mec, kösë hace ju hi la hni angeic. Ngo tha ietra kö angeic koi Akötresie, hnei angeice pe hna bëeke fë lo 30 manie sileva. Öni Iudra jë hi koi itre tane i angetre huuj: “Ngazo hë ni, ke hnenge hna salemëne la madra ne la atr ka pë ngazon.” Ngo hnei angatre hna sa akötrën, öni angatr: “Matre tro pena huni a uën? Ketre wange ju kö eö!”—Mataio 27:4.

Iudra a hnatrije pi la 30 manie sileva hnine la uma ne hmi, nge angeic a nyixane jë la ngazo i angeic me hnöjua. Ngo ame la angeic a thele troa hnöjua, xecie ju hi lo picin hnei angeic hna thipi ngön, ame hnei angeic hna kei kowe la ketre etë e kuhu.—Itre Huliwa 1:17, 18.

 Sine hmakanyi pala kö la kola tro sai Iesu kowe la hnalapa i Ponetio Pilato. Ngo xele kö angetre Iudra ma lö. Angatr a mekun laka, e tro angatr a lö kowe la hnalapa ne la ketre atre ne fen, tro hë angatr a sis. Nge tha tro hë angatre lai a hmitrötr me xeni e 15 Nisan, pane drai ne la feet ne la itre Falawa Ka Pë Levenen. Feete lai hna atrun ngöne la ijine Paseka.

Matre Pilato a tro ju koi angatr me hape: “Nemene la ngazo hna kuca hnene la atre ce?” Öni angatr: “Maine pë ju ngazo hna kuca hnene la atre celë, tha tro kö huni a tro sai angeice koi nyipë.” Ma drenge hi Pilato laka, angatr a thele troa musinë angeic, matre öni angeic: “Xomi [Iesu] jë nge ketre ameköti angeice jë kö thenge la wathebo i nyipunie.” Matre angetre Iudra a amamane jë la aja i angatr, ke öni angatr: “Hna wathebo huni troa humu atr.”—Ioane 18:29-31.

Eje hi, maine tro angatr a humuthi Iesu ngöne la Paseka, tro ha agomegomëne la nöj. Ngo ijiji angetre Roma pe troa humu atr, ene lo itre ka icilekeu me mus. Haawe, maine tro la itre hene ne hmi a atreine ewathi Pilato troa humuthi Iesu, tha tro kö la itre xa atre Iudra a nyizö angatr.

Tha qaja pi kö itre hene ne hmi laka, hnei angatr hna ameköti Iesu pine silitrengathoi Akötresie. Angatre pe a qaja la itre xa kepin, öni angatr: “Hnene la atre celë hna thele troa [1] amejëne la nöj troa icilekeu me mus, me [2] wathebone troa kuiëne la mani hna athipe hnei Kaisara, me hape, [3] angeice hi la Keriso, ketre joxu.”—Luka 23:2.

Gavena i angetre Roma Pilato, matre angeic a seseu la angatr a qaja ka hape, Iesu a selëne laka, Joxu nyidrë. Matre Pilato a lö hmaca pi hnine la uma me hë Iesu, me hnyingë nyidrë: “Eö la joxu i angetre Iudra?” Angeice hi lai a hnyinge ka hape, ‘Eö kö a ena la wathebo i angetre Roma troa acili joxu eö, me icilekeu me Kaisara?’ E cili, Iesu a hnyinge jë troa atre la hnei Pilato hna dreng göi nyidrë, öni Iesu: “Qa kaa la ithanata cili, qaathei nyipë maine qaathene la itre ka qeje ni?”—Ioane 18:33, 34.

Ngo göi troa amamane ka hape, pëkö hnei angeic hna atre, nge angeic a pi trotrohnin, öni Pilato: “Atre hi eö laka, tha atre Iudra kö ni.” Öni angeice hmaca: “Nöje i eö me itre tane i angetre huuj la ka uti sai eö koi ni. Matre nemene la hnei eö hna kuca?”—Ioane 18:35.

Tha Iesu kö a thele troa juetrëne ka hape, joxu fe nyidrë. Nge drei jë kö la aqane sesëkötre i Pilato la aqane sa i Iesu!